Փաստ ինֆո

Շատերի մոտ հարց է առաջանում, թե Ադրբեջանի կողմից Արցախի օկուպացիայի և այնտեղ իրականացված էթնիկ զտումներից հետո, որքանով է արդիական մնում այս նախագիծը, մենք կարծում ենք, որ ավելի քան արդիական է։ Այն ինչ տեղի է ունեցել Արցախում՝ միջազգային իրավունքի կոպտագույն խախտում է։ Այս մասին այսօր «Հայաքվեի» նախագիծը Ազգային Ժողով ներկայացնելուց առաջ ասաց նախաձեռնող խմբի անդամ Ավետիք Չալաբյանը։

«Հասկանալի է, որ Արցախը հանդիսացել է միջազգային իրավունքի սուբյեկտ, եղել է բանակցությունների կողմ, Արցախի վերջնական կարգավիճակի հետ կապված եղել են Մադրիդյան սկզբունքներ, որոնք մշակվել են Մինսկի խմբի եռանախագահների կողմից, ուստի Արցախը որպես միջազգային իրավունքի ուբյեկտ՝ չի կարող վերանալ էթնիկ զտման արդյունքում։

Հայաստանի Հանրապետության որևէ իշխանավոր իրավունք չունի իր գործունեությամբ ամրագրել Արցախում տեղի ունեցած ցեղասպան գործողությունները։ Արցախում էթնիկ զտումներ են տեղի ունեցել, որոնք ուղեկցվել են խաղաղ բնակչության նկատմամբ բռնություներով, դա ցեղասպանության տարատեսակ է, և այն ամենն ինչ այսօր անում է Նիկոլ Փաշինյանը՝ դա ցեղասպանությանը հանցակցություն է և ցեղասպանության մաքրագործում։

Մենք՝ հայ ազգի այն ներկայացուցիչները, ովքեր դեմ են դրան այսօր պետք է շարունակեն պայքարը, որպեսզի թույլ չտան Նիկոլ Փաշինյանին Ադրբեջանի ցեղասպանության արդյունքում ստեղծված իրավիճակն ամրագրել միջազգային պայմանագրերով»։

Նա հիշեցրեց, որ այն, ինչ արել է Փաշինյանը՝ միայն բանավոր հայտարարություն է, միջազգային պայմանագիր գոյություն չունի և իրենք այժմ պայքարելու են նրա համար, որ այդպիսի միջազգային պայմանագիր գոյություն չունենա։

«Եթե նման պայմանագիր գոյություն ունենա, առաջինը՝ կվերացնի Արցախը, որպես պետություն և միջազգային իրավունքի սուբյեկտ, երկրորդը՝ ճանապարհ կբացի ՀՀ-ի նկատմամբ ագրեսիայի համար։

Ընդ որում՝ ինչպես հայտնի է, Ադրբեջանը չի ճանաչում ՀՀ տարածքային ամբողջականությունը և շարունակում է պահանջներ դնել ՀՀ-ի նկատմամբ»,-ասաց Չալաբյանը։

Նշենք նաև, որ սեպտեմբերի 25-ին նախաձեռնության անդամները ստացել են ԿԸՀ-ի որոշումը, որով հաստատվել է, որ «Հայաքվե» նախաձեռնությունը օրենքով պահանջվող 50 000 ստորագրությունը հավաքել է։ Այսօր նախաձեռնության անդամները նախագիծն ու կից դիմումը ներկայացրին Ազգային Ժողով։

Աղբյուր` Փաստինֆո