Փաստ ինֆո

Ես ինձ վատ եմ զգում, որ ես նստած եմ Հայաստանի բանտում, իսկ իմ տասնյակ հայրենակիցներ՝ Բաքվում, որ ինձ զրկել են իմ օջախից, բայց իմ հարյուր հազարավոր հայրենակիցներ ընդհանրապես արդեն օջախ չունեն։ Այս մասին դատարանում հայտարարեց ՀՀԿ փոխնախագահ Արմեն Աշոտյանը։

Ինչպես արդեն տեղեկացրել ենք՝ այսօրվա նիստում դատարանը քննում է Արմեն Աշոտյանի խափանման միջոցի հարցը։ Պաշտպանության կողմը միջնորդել է վերացնել Աշոտյանի նկատմամբ որպես խափանման միջոց կիրառված կալանքը և այն փոխարինել անազատության հետ չկապված խափանման միջոցով։

Հատկանշական է, որ մինչ Արմեն Աշոտյանը դիրքորոշում կներկայացներ, նախագահող Վահե Դոլմազյանը նախազգուշացրեց՝ չանել քաղաքական հայտարարություններ։ Դատավորի նման «նախազգուշացման» համար, ըստ Դոլմազյանի, հիմք է դարձել փաստաբան Տիգրան Աթանեսյանի հայտարարությունը, թե Արմեն Աշոտյանը գտնում է, որ իր նկատմամբ քաղաքական հետապնդում է իրականացվում, ինչի մասին առավել մանրամասն կհայտնի հենց Աշոտյանը։ Այդուհանդերձ, ներկայացնելով դիրքորոշում, Արմեն Աշոտյանը դիմեց ներկաներին և դատավորին՝ նախ շնորհակալություն հայտնելով Հայաստանի ու Արցախի համար այս ծանր օրերին ժամանակ գտնելու, իր վերաբերյալ գործով հետաքրքրված լինելու համար։ Աշոտյանը նաև շնորհակալություն հայտնեց իր համար անձնական երաշխավորություն ներկայացրած անձանց՝ Հայաստանից և Սփյուռքից, արտերկրից և ներսից, հոգևոր և աշխարհիկ թևերի ներկայացուցիչներին, տիկնանց ու տղամարդկանց, իր քաղաքական համակիրներին և ոչ այնքան, շատ պարտավորեցնող թիմ էր հավաքվել այն մարդկանց, որոնք իրար չեն ճանաչում, բայց իրեն են ճանաչում ու պարզվեց միակարծիք են։

«Բոլորդ, բացի պարոն դատավորից, ոնց որ, որին թվում է, թե ես չեմ կարող տարբերակել քաղաքական խոսքը կամ չեմ կարող կառուցել խոսքս այնպես, որ ասելիքս տեղ հասնի առանց դատական գործընթացների իրավական նորմատիվ սահմանները հատելու՝ բայց միևնույն ժամանակ օգտվելով իմ երաշխավորված խոսքի իրավունքից։ Ես կանխակալ եմ համարում մինչև իմ ելույթը ձեր արած ռեպլիկը, ես համարում եմ ավելի շատ իմ անձի գոյության հետ կապված գնահատական, քանի որ հնչել է մինչև իմ ասելիքը։ Ես իմ ֆիզիկական ներկայությամբ քաղաքական եմ, ես քաղաքական եմ, այդպես է ստացվել իմ ճակատագիրը, չլինե՞մ ընդհանրապես։ Ես քաղաքական գործիչ եմ, ըստ Արիստոտելի՝ քաղաքական կենդանի եմ, քաղաքական բանտարկյալ՝ ըստ եվրոպական և ոչ միայն քաղաքական գնահատականի։ Ես խնդրում եմ ապահովել իմ տարրական, այդ թվում Մարդու իրավունքների եվրոպական կոնվենցիայով ամրագրված իրավունքները և առնվազն այս պուճուր տեղը կիրառել անմեղության կանխավարկածը։ Ես դեռ բան չասացի, դուք ինչ-որ բաներ եք փորձում ինձ սահմանափակել, ի՞նչ գիտեք, ես ինչ եմ ասելու»,- ասաց Աշոտյանը՝ արձանագրելով, որ մինչև իր բերանը բացելն արդեն խնդիր կա ոմանց մոտ և դա լավագույն հիմնավորումն է այն փաստի, թե ինչու է ինքը կալանավորված։

«Ներողություն եմ խնդրում, որ այս համատարած դարդ ու ցավի մեջ ուշադրություն եմ սևեռել իմ համեստ անձի իրավունքների ակնհայտ սահմանափակման, այս դատավարության և մնացածի վրա։ Ես ինձ վատ եմ զգում։ Ես ինձ վատ եմ զգում, երբ համեմատում եմ իմ դարդը հազարավոր այն մարդկանց հետ, որոնք ընտանիքի անդամին անվերադարձ կորցրեցին։ Ես ինձ վատ եմ զգում, որ ինձ կտրել են իմ օջախից, բայց 100 000 մարդ ընդհանրապես այլևս օջախ չունի։ Ես ինձ վատ եմ զգում, որովհետև նստած եմ Հայաստանի բանտում, իսկ իմ տասնյակ հայրենակիցներ նստած են Բաքվի բանտերում։ Ես ինձ վատ եմ զգում դրա համար։ Ես ինձ վատ եմ զգում, որ այս ամենով հանդերձ՝ ստիպված եմ խոսել իմ մասին»,- նշեց Արմեն Աշոտյանը։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո