Փաստ ինֆո

Նիկոլ Փաշինյանի երեկվա հարցազրույցը հերթական խայծն էր, որով հերթական անգամ նա կամեցավ ստուգել, թե ինչ արձագանք են ունենալու իր անհեթեթ մտքերը։ Մտքեր, որոնք հինգ տարի շարունակ մեկը մյուսին ժխտել են, քանի որ դրանք արտաբերող անձը տառապում է պարբերական հիվանդությամբ՝ յուրաքանչյուր հաջորդ օրը ժխտելով իր նախորդ օրվա բարձրաձայն ասված մտքերը։

Ընդ որում, ուշագրավ է այն, որ իր մտքերի, խոսույթի զգալի մասը, լինի կառավարության նիստում, հարցազրույցների ու ասուլիսների ընթացքում և կամ՝ Աժ ամբիոնից հիմնականում հղումներ են՝ ալիևին և ադրբեջանի այս կամ այն ներկայացուցչին։ Ընդհանրապես, ՀՀ վարչապետի աթոռն զբաղեցնող անձի խոսույթը բացարձակ նույնականացված է թուրքադրբեջանական տանդեմի ներկայացուցիչների խոսույթին։

Երեկ, փաշինյանական գավառական շուստրիությունը կրկին «եթե-ապա» տրամաբանությամբ էր կառուցված։

Երեկվա նրա ողջ թվաբանությունը՝ Հայաստանի Հանրապետության և Ադրբեջանի Հանրապետության տարածքների ճանաչման համատեքստում, այդ միտումն ուներ։ Սակայն, որքան էլ նա փորձեց բխեցնել մեկը մյուսից, սերտորեն պայմանավորելով մեկը մյուսով՝ չստացվեց։ Քանի որ ինքն ի սկզբանե ոչ թե Հայաստանի շահերով է առաջնորդվում, այլ՝ Ադրբեջանի դիրքերից է խոսում, ինչը, ըստ ամենայնի, իր անձնական շահի հետ է զուտ համընկնում։

Երբ ինքն իբրև ՀՀ ղեկավար առաջ ընկնելով ճանաչում է Ադրբեջանի Հանրապետությունը՝ կոնկրետ քառակուսի կիլոմետրերով, իսկ այդ պետության ղեկավարն ի պատասխան ոչինչ չի բարձրաձայնում, վերջինս բնականաբար ցայտնոտային վիճակում պիտի հայտնվի։

Հայաստանի խորհրդայնացման պատմությունը դպրոցում սերտած՝ փաշինյանը հայտարարում էր, որ ԽՍՀՄ տարիների ՀՀ տարածքի տերն է ինքը։ Թե որքանով է տեր, ՀՀ ներկա անտեր վիճակն է ցույց տալիս։

Հիշեցնենք՝ 2020 թվականի 44-օրյա պատերազմից հետո հետո երբ ադրբեջան- թշնամի պետության զինուժը ՀՀ տարածք էր մտել՝ տարբեր կողմերից խախտելով Հայաստանի անկախ Հանրապետության սահմանները, փաշինյանը շռայլորեն նվերներ էր տալիս ալիևին՝ մի դեպքում՝ բարձունքներ նվիրաբերելով, թե բա՝ ու՞մ է պետք, տարին 12 ամիս ձյուն է, մյուս դեպքում՝ ջրային տարածքներ, թե՝ ինչ է՝ Սև լճի 30 տոկոսի համար պատերա՞զմ ենք սկսելու․․․Ի հավելումն, անցյալ տարի սեպտեմբեր 13-ին Ջերմուկի վրա հարձակումից հետո ադրբեջանական զինուժի հետ չքաշվելը․․․

Հիմա, կարևոր հարցեր կան, որ մնացել են առկախ՝ «Ես, կներեք, 29800 քառակուսի կմ-ի վարչապետն եմ»՝ հայտարարության հեղինակի խոսքը որքանո՞վ է նույնական փաշինյանական ներկա թվաբանությանը։ Մասնավորաբար, նրա հայտարարությունն ու նրա թվաբանությունը ՀՀ սահմանները դիտարկում է մեր ռազմավարական բարձունքներո՞վ, ջրային տարածքներո՞վ, թե՞ ձեռքերը վեր պարզած՝ ՀՀ բարձունքները՝ Սյունիքում, Գեղարքունիքում, Ջերմուկում և այլն, նաև՝ Սև լիճը նվիրել է դե ֆակտո, որ հետո՝ ամրագրի՞ դե յուրե։ Թե՞ պահանջելու՞ է, որ ալիևը վերջապես հե՛տ քաշի իր զորքերը ՀՀ ինքնիշխան տարածքից։

Ա․Ե․

Աղբյուր` Փաստինֆո