Փաստ ինֆո

Հոկտեմբերի 9-ին հրազենային վիրավորման հետևանքով մահացած Նարեկ Նազարյանը Լոռու մարզի Գյուլագարակ համայնքի Գարգառ բնակավայրից էր, 7 ամսվա զինծառայող։ Գարգառ բնակավայրի վարչական ղեկավար Գոռ Աղաջանյանը «Փաստինֆո»-ի հետ զրույցում Նարեկի մասին խոսելիս նրան բնութագրեց որպես շատ լավ դաստիարակված, խելացի, խելոք, հոյակապ անձնավորություն։

«Հայրը գյուղի վարսավիրն էր, մայրը՝ տնային տնտեսուհի։ Մեկ քույր ուներ՝ իրենից փոքր էր։ Ստեփանավանի Կարմիր խաչի Ճգնաժամային կառավարման բաժնում էր սովորում։ Կռվարար չէր, խելոք, շատ օրինակելի էր՝ իր հասակակիցների համար»,- նշեց Աղաջանյանը։
Իսկ թե ինչը կարող էր լինել դեպքի պատճառը, հատկապես, որ Նարեկը կոնֆլիկտային չի եղել՝ Աղաջանյանը տեղեկություն չունի, նշում է, որ քննություն է իրականացվում, իրավապահները կպարզեն և կհրապարակեն։

Հիշեցնենք, որ հոկտեմբերի 9-ին կյանքի հետ անհամատեղելի հրազենային վնասվածքից մահացել է ՀՀ ՊՆ N զորամասի զինծառայող Նարեկ Արմենի Նազարյանը: Դեպքի հանգամանքներն ամբողջովին պարզելու նպատակով ընթանում է քննություն:

«Փաստինֆո»-ն դիմել է նաև ՔԿ-ին՝ պարզելու, թե ինչ հատկանիշներով է նախաձեռնվել քրեական վարույթը, սակայն վարույթն իրականացնող մարմնից այս պահին զերծ են մնացել մանրամասներ հայտնելուց՝ նշելով, որ հաղորդագրություն կտարածեն։

Աղբյուր` Փաստինֆո