Փաստ ինֆո

Գլխավոր դատախազությունն ազնիվ է գտնվել՝ քրեական գործը վերապահելով այս ՝ «Պետական իշխանության դեմ ուղղված» ստորաբաժանմանը՝ առանց թաքցնելու քաղաքական իմաստը և հետապնդումների փաստը։ Այս գործը կարվել է սեփական իշխանության պահպանման համար։ Այս մասին դատական նիստում հայտարարել է ՀՀԿ փոխնախագահ Արմեն Աշոտյանը։

«Գլխավոր դատախազությանը ազնվության համար պետք է անպայման կրեդիտ տալ, որ պետական իշխանության դեմ ուղղված համապատասան հանցագործությունների ստորաբաժանման ներկայացուցիչներն են զբաղվել այս գործով, որտեղ, որ չկա պետական իշխանության դեմ որևէ արարք։ Ազնիվ է, որ գլխավոր դատախազությունը կարծում է, որ սա պետք է արձանագրվի որպես փաստ»,- հայտարարել է Արմեն Աշոտյանը՝ ներկայացնելով դատախազներին բացարկի միջնորդությունը։

«Փաստինֆո»-ի թղթակցի հաղորդմամբ՝ Հակակոռուպցիոն դատարանում՝ դատավոր Վահե Դոլմազյանի նախագահությամբ, այսօր կայացել է Արմեն Աշոտյանի, ԵՊԲՀ նախկին ռեկտոր Միքայել Նարիմանյանի, ԵՊԲՀ նախկին հաշվապահ Լարիսա Պարսեղյանի, դեղագետ Մարթա Սիմոնյանի, Ռոլան Դավթյանի վերաբերյալ քրեական գործով առաջին դատական նիստը։ Դատարանին բացարկ կողմերը չներկայացրին, սակայն Արմեն Աշոտյանի պաշտպան Տիգրան Աթանեսյանն արձանագրեց՝ բացարկի միջնորդություն չունեն, քանի որ չեն կարծում, թե Հակակոռուպցիոն դատարանում ավելի լավ դատավոր կարող է լինել, քանի որ Հակակոռուպցիոն դատարանը ստեղծվել է այս իշխանությունների կողմից, սակայն այս պահին գտնվում են այդտեղ՝ ենթարկվելով կանոններին։ Հանրային մեղադրողներին, սակայն, պաշտպանության կողմը բացարկի միջնորդություն ներկայացրեց՝ հիմքում դնելով այն հանգամանքը, որ գործով դատավարական հսկողության իրականացումը պատշաճ սուբյեկտի կողմից չի կատարվել, մասնավորապես, գործով հսկողություն պետք է իրականացվեր ոչ թե պետական իշխանության դեմ ուղղված հանցագործությունների քննության հսկողության վարչության, այլ՝ սեփականության դեմ ուղղված գործերով հսկողություն իրականացնող վարչության կողմից։ Ըստ Տիգրան Աթանեսյանի՝ դատախազներն անաչառ, անկողմնակալ չեն, հակառակ դեպքում՝ իրենց վերադասներին կտեղեկացնեին և գործը կփոխանցեին համապատասխան վարչություն՝ իմանալով, որ դա իրենց ոլորտը չէ։ Նրա դիտարկմամբ՝ հերթական անգամ հաստատվում է՝ գործով քաղաքական հետապնդումների հանգամանքը։ Հանրային մեղադրողներն առարկեցին միջնորդության դեմ, դատարանն էլ՝ մերժեց միջնորդությունը։ Հաջորդիվ՝ պաշտպան Սուքիասյանը միջնորդություն ներկայացրեց՝ Մարթա Սիմոնյանի նկատմամբ քրեական հետապնդումը դադարեցնելու և քրեական գործի վարույթը կարճելու վերաբերյալ։ Պաշտպանը կասկածի տակ է դնում քրեական վարույթի օրինականացման հարցը՝ նշելով, որ քրեական վարույթի համար առթի չի եղել, ֆորմալ առումով հիմքը եղել է ՊՎԾ ուսումնասիրությունը, սակայն ինչպես է այն հայտվել վարույթն իրականացնող մարմնի ձեռքում՝ պարզ չէ, փաստաբանը վստահեցնում է, որ քրեական գործի նյութերում հաղորդում չկա։ Դատարանը նշված միջնորդությունը ևս մերժեց։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Մանրամասները՝ տեսանյութում

Հեղինակ՝ Իզաբել Սահակյան

Աղբյուր` Փաստինֆո