Փաստ ինֆո

Իրավապահները կա՛մ պետք է քրեական հետապնդում հարուցեն ԱԺ «ՔՊ» խմբակցության պատգամավոր Հովիկ Աղազարյանի նկատմամբ՝ խուլիգանության համար, կա՛մ ընդունեն, որ Աղազարյանին իբրև ապտակելու համար կալանավորված զոհված զինծառայողի հոր և եղբոր գործողություններում հանցակազմ չկա։

Հիշեցնենք, որ սեպտեմբերի 21-ին «Եռաբլուր» զինվորական պանթեոնում միջադեպ է տեղի ունեցել՝ զոհված զինծառայողի ծնողների և ԱԺ «ՔՊ»-ական պատգամավորներ Հակոբ Ասլանյանի և Հովիկ Աղազարյանի մասնակցությամբ, որի ընթացքում ծնողներից մեկը՝ Արմեն Գալստյանը, ապտակել է Հովիկ Աղազարյանին։ Իրավապահներն էլ ժամերի ընթացքում «հայտնաբերել» և ձերբակալել են զոհված զինծառայողի հորը, ապա՝ տարել կալանքի։ Արմեն Գալստյանի կալանավորումից հետո նույն վարույթի շրջանակներում մեղադրանք է ներկայացվել նաև Արմեն Գալստյանի կրստեր որդուն՝ 18-ամյա Տիգրան Գալստյանին։

Գալստյանների պաշտպան Վահան Հովհաննիսյանը «Փաստինֆո»-ի հետ զրույցում հայտնեց, որ Հովիկ Աղազարյանի հետ միջադեպի գործով, խուլիգանության համար մեղադրանք ներկայացվեց նաև զոհված զինծառայող Լևոն Գալստյանի 18-ամյա եղբորը՝ Տիգրան Գալստյանին՝ պնդելով, որ այս քրեական վարույթով, ի սկզբանե, բացակայել է իրավական որևէ գործընթաց:

«ՀՀ քրեական օրենսգրքի յուրօրինակ մեկնաբանումը դուրս է իրավական ընկալման ու տրամաբանության սահմաններից: Ստացված ենթադրյալ պատվերը չկարողանալով կատարել օրենքի շրջանակներում՝ վարույթն իրականացնող մարմինը դիմում է հանցակազմերի այնպիսի ձևախեղումների, որոնք աննախադեպ են»,- նշեց փաստաբանը:

Մասնավորապես, Տիգրան Գալստյանին մեղադրանք է ներկայացվել խմբի կազմում խուլիգանություն կատարելու և Հովիկ Աղազարյանին մեկ հարված հասցնելու համար, ընդ որում՝ մարմնական վնասվածք պատճառած մեկ հարվածը ՀՀ քրեական օրենսգրքով, ինչպես նաև վարույթն իրականացնող մարմնի կարծիքով, պատժելի արարք չէ: Հետևաբար, Վահան Հովհաննիսյանի գնահատմամբ, ենթադրաբար ստացած լինելով երիտասարդին մեղադրանք ներկայացնելու պատվեր եւ ՀՀ քրեական օրենսգրքում չգտնելով համապատասխան հանցակազմ, հսկող դատախազը հանրային քրեական հետապնդում է հարուցել, իսկ քննիչը մեղադրանք ներկայացրել այնպիսի գործողության (խմբի կազմում խուլիգանություն) համար, որը Տիգրան Գալստյանը չի կատարել;

«Հովիկ Աղազարյանին հարվածելու տեսանյութերն առկա են բաց համացանցային հարթակում, որոնցից պարզ է դառնում, որ Տիգրան Գալստյանը, բացի Հովիկ Աղազարյանին մեկ անգամ հարվածելուց, խուլիգանությանը բնորոշ որևէ այլ գործողություն չի կատարում, այն է՝ չի հայհոյում կամ վիրավորում որևէ անձի, չի մտնում կոնֆլիկտի մեջ ոչ Հովիկ Աղազարյանի, ոչ Հակոբ Ասլանյանի հետ, չի քաշքշում կամ հրմշտում նրանցից որևէ մեկին: Եվ այնուհանդերձ, պաշտպանական կողմը երախտապարտ է վարույթն իրականացնող մարմնին, որ սահմանափակվել է միայն անօրինական մեղադրանք ներկայացնելով և ընտանիքի երկրորդ անդամի նկատմամբ ևս կալանքի միջնորդություն չի ներկայացրել»,- նշեց փաստաբանը։

Քրեական վարույթի շրջանակներում տղաների հայրը՝ Արմեն Գալստյանը, պնդել է իր ցուցմունքները, որ Հովիկ Աղազարյանին թուրք է անվանել, վերջինիս կողմից զոհվածի ծնողին քաշքշելու և հայհոյելու համար՝ հիմնավորելով, որ ցանկացած անձ՝ ով կարող է վիրավորել զոհվածի ծնողին՝ թուրք է:

«Վերջինս նշել է նաև, որ միջադեպի ընթացքում Հովիկ Աղազարյանը ոտքով հարվածել է իր ոտքին և սեռական հայհոյանք տվել իրեն: Հ.Աղազարյանն իր ցուցմունքով հերքել էր Արմեն Գալստյանին հայհոյելու և հարվածելու իրողությունը, մինչդեռ, վարույթն իրականացնող մարմնի կողմից կատարված զննության արձանագրությամբ արձանագրվել է Արմեն Գալստյանին ուղղած Հովիկ Աղազարյանի սեռական հայհոյանքը, ստացվել է դատաբժշկական փորձաքննության եզրակացությունը, որ Արմեն Գալստյանի ոտքին առկա են մարմնական վնասվածքներ»,- նշեց Հովհաննիսյանը՝ ընդգծելով, որ հիմա վարույթն իրականացնող մարմինը հայտնվել է իրավական փակուղում, կամ պետք է ընդունի, որ Գալստյանների արարքում խուլիգանության հանցակազմ չի պարունակվում, կամ նույն արարքի համար պետք է մեղադրանք ներկայացնի Հովիկ Աղազարյանին:

Հեղինակ՝ Իզաբել Սահակյան

Հ.Գ. Նկատենք, որ ՀՀ գործող վարչապետ Նիկոլ Փաշինյանն ԱԺ ամբիոնից հայտարարել էր, որ «թուրք» որակումը ինքը վիրավորական չի համարում, մինչդեռ քննիչները, պարզվում է, այն գնահատել են որպես հայհոյանք ու կալանավորվել զոհված զինծառայողի հորը։

Աղբյուր` Փաստինֆո