Փաստ ինֆո

Մենք ազգովի մտահոգված ենք ադրբեջանական գերության մեջ գտնվող մեր հայրենակիցների ճակատագրով, միևնույն ժամանակ չպետք է մոռանանք, որ բազմաթիվ հանրային գործիչներ քաղաքական պատճառներով անազատության մեջ են գտնվում նաև Երևանի բանտերում։ Արմեն Աշոտյանը, այլ քաղբանտարկյալներ բանտերում են գտնվում Արցախի հետ կապված հարցերով, որովհետև փորձում էին իրենց գործունեությամբ կանխարգելել այն աղետը, որը տեղի ունեցավ սեպտեմբերի 19-ին և հետագա օրերին։ Փորձում էին իրենց գործունեությամբ թույլ չտալ այն ամենը, ինչ տեղի ունեցավ և հենց այս հանրային, ընդդիմադիր գործունեության համար են գտնվում անազատության մեջ։ Այս մասին լրագրողների հետ հանդիպմանն ասաց Արմեն Աշոտյանի փաստաբանական խմբի անդամ Ռուբեն Մելիքյանը։

Ռուբեն Մելիքյանը, անդրադառնալով Արմեն Աշոտյանի գործի հանգամանքներին, նշեց, որ Արմեն Աշոտյանի քրեական գործի 30-ից ավելի հատորներին ծանոթանալու ընթացքում «հետաքրքիր բաներ» են հայտնաբերել. նրա նկատմամբ իրականացվել է անձնական կյանքի տոտալ սահմանափակման գործառույթ։

«Ինչ գործիք որ առկա է քրեական դատավարության օրենսգրքում՝ այստեղ տեսնում ենք։ Սկսած 2015 թվականից՝ բանկային գաղտնիք, նոտարական գաղտնիք, գաղտնալսումներ, թվային խուզարկություններ են իրականացվել, 2015-ից սկսած բոլոր հեռախոսանգերը, սմս-ները վերահսկվել են։ Մի կողմից գործ ունենք իրավիճակի հետ, երբ առկա է տոտալ ներխուժում անձի անձնական կյանք, և մյուս կողմից՝ մեղադրական եզրակացություն, որի մասին շուտով կլսեք դատական դահլիճում, և զրո փաստ»,- ասաց Մելիքյանը։

Նրա դիտարկմամբ՝ քրեական գործի անվան տակ քաղաքական հետապնդումը պատրվակ է դարձել տոտալ սքանավորման ենթարկելու ընդդիմադիր քաղաքական գործչի ամբողջ քաղաքական գործունեությունը։ Պաշտպանը վստահություն հայտնեց առ այն, որ արդեն դռնբաց դատական նիստի ընթացքում կբացահայտվի, որ գործ ունենք դասական քաղաքական հետապնդման հետ։

Մանրամասները՝ տեսանյութում

Աղբյուր` Փաստինֆո