Փաստ ինֆո

Գրանադայում հանդիպումից հետո ականատես ենք ենք լինում, թե ինչպես է իշխանական քարոզչամեքենան հորինել այսպես կոչված՝ տարածքային ամբողջականության ճանաչման միֆը։ Թե մենք կարիք ունեք, որ մեր տարածքային ամբողջականությունը ճանաչվի, և հիմա, տեսեք, ճանաչվեց։

Նախ՝ ՀՀ տարածքային ամբողջականությունը շատ վաղուց ճանաչված է, ճանաչված է ՄԱԿ-ի կողմից։ Երկորդը՝ ժամանակակից աշխարհում որևէ երկրի ճանաչված կամ չճանաչված լինելը այնքան քիչ բան է որոշում գետնի վրա քաղաքականության մեջ, որ դրանով ուրախանալը և համարելը, որ դա մեծ հաղթանակ է՝ ոչ այլ ինչ է, քան Պյուրոսյան հաղթանակ։

Այս մասին «Փաստինֆոյի» հետ զրույցում ասաց թյուրքագետ Վարուժան Գեղամյանը։

«Դե -ֆակտո իշխանությունները քարոզում են, որ ՀՀ 29 800 քկմ-ի սահմաններում մեզ համար ստեղծելու է անվտանգության երաշխիքներ՝ սպառնալիքների չեզոքացման տեսանկյունից։ Որպեսզի մենք հասկանանք, թե սա որքանով է ճշմարտությանը մոտ՝ նախ պետք է հասկանանք, թե որ պետություններ են սպառնում ՀՀ տարածքին, անվտանգությանը։ Այդ պետություններն առաջին հերթին 2-ն են՝ Ադրբեջանը և Թուրքիան։ Արդյոք Ֆրանսիայի, Գերմանիայի և ԵՄ ներկայացուցչի ներկայությամբ ստորագրված հայտարարությունը մեզ համար կարող է որևէ երաշխիք լինել, որ Թուրքիան և Ադրբեջանը չեն շարունակի ունենալ ծավալապաշտական նկրտումներ ՀՀ տարածքների նկատմամբ և չեն փորձի նվաճել Հայաստանի տարածքը»,- նշել է բանախոսը։

Նրա արձանագրմամբ՝ տեսնում ենք, որ 2020 թ-ից հետո ոչ միայն Արցախում, այլ նաև Հայաստանում միջազգայնորեն ճանաչված տարածքում շարունակում են տարածքներ նվաճվել և որևէ փաստաթուղթ, որևէ արձանագրում, որևէ «կադաստրի թուղթ» չի կարող կանգնեցնել բանակներին, բանակներին կանգնեցնում են բանակները։ «ՀՀ դե ֆակտո» իշխանությունները այս պահին ասում են, որ իր անվտանգության երաշխիքը կախված է ինչ-որ փաստաթղթից , բայց այդ փաստաթղթերը առոչինչ են, որովհետև Թուրքիան ճանաչում է, օրինակ, Սիրիայի տարածքային ամբողջականությունը, բայց դա չի խանգարում ավելի քան 8 տարի նվաճած պահել Սիրիայի հյուսիսային տարածքները։ Նման օրինակները շատ են։ Հետևաբար, Գրանադայում ստորագրված հայտարարությունը, որին չի մասնակցել Ադրբեջանը, որևէ կերպ հաղթանակ չի կարելի համարել»։

Թյուրքագետի խոսքով՝ ՀՀ-ն հայտարարում է, որ ճանաչում է Ադրբեջանի տարածքային ամբողջականությունը, ներառյալ՝ այսպես կոչված անկլավները և Արցախը։ «Փաստորեն, մենք առանց Ադրբեջանի մասնակցության էլ զիջում ենք մեր դիվանագիտական քայլը, որ կարելի էր անել, դրա դիմաց որևէ բան ստանալու համար։ Այսինքն, Ադրբեջանը, չգալով բանակցութունների, արդեն մեզանից զիջում է ստացել, հետևաբար, հաջորդ բանակցային շրջանում ստիպված ենք լինելու նոր բան պետք է զիջել։

Սա նաև Ադրբեջանի համար շատ լավ խաղաքարտ է, որպեսզի շարունակի իր հավակնություները ներկայացնել թե Տավուշի, թե Վայոց Ձորի ու թե Արարատի մարզերի, այսպես կոչված անկլավների հանդեպ»։

Մանրամասները՝ տեսանյութում

Աղբյուր` Փաստինֆո