Փաստ ինֆո

Ադրբեջանում իշխանական քարոզչամեքենաները հիստերիա են բարձրացրել Եվրոպական խորհրդի ղեկավար Շառլ Միշելի հայտարարության կապակցությամբ առ այն, որ Ադրբեջանը չի կարող տարածքային պահանջներ ունենալ Հայաստանի նկամտամբ։

«Ես երկու օր առաջ խոսել եմ նախագահ Ալիևի հետ և հստակ ասել եմ, որ նա չի կարող տարածքային պահանջներ ունենալ Հայաստանից։ Սա պետք է բարձրաձայն ասել և ապահովել, որ լինի տարածքային ամբողջականության փոխադարձ ճանաչում»,- Գրանադայում հայտարարել է Միշելը։

Ինչ վերաբերում է Ալիևի՝ Գրանադա չմեկնելուն և Հայաստանի ղեկավարի հետ հանդիպումից հրաժարվելուն՝ Միշելն ասել է. «Ես մտադիր չեմ հրապարակավ մեկնաբանել Ալիևի՝ Գրանադա չգալու որոշումը, ես անձամբ նրան կասեմ, թե ինչ եմ մտածում այդ մասին»։ Այս ամենից հետո ադրբեջանական մամուլը սկսել է գրոհը Միշելի վրա ու արդեն իսկ լծված են նրան սևացնելու գործընթացին. հրապարակումներ են լինում, թե «Միշելն այն գործիչը չէ, որ թելադրի Ալիևին»։

Նշենք, որ չնայած Ադրբեջանը՝ ի դեմս Ալիևի հայտարարում է, որ իբր տարածքային պահանջներ չունի Հայաստանից, դրան զուգահեռ հնչեցնում են հայտարարություններ, որոնք ոչ այլ ինչ են, եթե ոչ պահանջներ։ Խոսքը «Արևմտյան Ադրբեջան» հորինված եզրույթի մասին է, որ արագորեն շրջանառում են այդ երկրում՝ նկատի ունենալով Հայաստանի ներկայիս ինքնիշխան տարածքները։ Ադրբեջանը խոսում է այդ տարածք ադրբեջանցիների «վերադարձի» անհրաժեշտության մասին։ Միևնույն ժամանակ անընդմեջ թմբկահարում են «Զանգեզուրի միջանցքի» մասին, մինչդեռ իրենց պահանջած «միջանցքը» ևս գտնվում է Հայաստանի սուվերեն տարածքում։ Չմոռանանք նաև այն մասին, որ Ադրբեջանը նենգորեն հայաթափեց Արցախն ու օկուպացրեց այն, այժմ էլ շարունակում են կրակոցները ՀՀ տարբեր բնակավայրերի ուղղությամբ։ Եւ այն, թե ինչ սվիններով են ընդունել Միշելի հայտարարությունը՝ վկայում է, որ Ադրբեջանը սահմանափակվել չի պատրաստվում ու ծրագրվում է նոր ագրեսիա՝ ընդդեմ Հայաստանի։

Աղբյուր` Փաստինֆո