Փաստ ինֆո

Ադրբեջանական ագրեսիայի օրերին Փաշինյանը ուղերձով դիմեց և ասաց, որ ինքը պատրաստ է ինչ-որ թուղթ ստորագրել, դրան նախորդել էր բավական հստակ ազդանշանը Ադրբեջանին, որ իրենք որևէ կերպ չեն մասնակցելու ադրբեջանական ագրեսիայից հայ ժողովրդի մի հատվածին պաշտպնելուն, այսինքն Արցախին թողնելու են ադրբեջանցիների բզկտմանը։ Դա նշանակում է՝ Արցախը կտանք՝ հանուն ինչ-որ թղթի։ Հավանաբար, հույս ուներ, որ Ադրբեջանը իր արյան ծարավը կհագեցնի ինչ-որ թղթով, բայց երեկվա Ալիևի դեմարշը նշանակում էր, որ իրենք միայն Արցախով չեն բավարարվելու և լրացուցիչ պահանջ են ներկայացրել ՀՀ իշխանություններին, ճիշտ այն, ինչ մենք տարիներ ի վեր զգուշացնում ենք, միայն Արցախը զոհելով կամ Արցախը խժռելով Ադրբեջանը չի բավարարվելու։ Այս մասին այսօր խորհրդարանական ճեպազրույցների ընթացքում ասաց «Հայաստան» խմբակցության պատգամավոր Արթուր Խաչատրյանը։

«Ամենայն հավանականությամբ՝ առաջին պահանջը եղել է այսպես կոչված անկլավները, որի «լեգիտիմության» համար նրանց «բերանը լեզու» են դրել Փաշինյանն ու իր խմբակը՝ խոսելով այն մասին, որ այդ անկլավները կան։ Հավանաբար հիշեք՝ Երևանում որոշ քարտեզներ հրապարակվեցին, փողոցներում կախվեցին, որտեղ մեր տարածքների վրա անցքեր կային։ Իհարկե նաև միջանցքի խնդիր կա։

Այնպես որ, եթե Փաշինյանը կարծում էր, որ կտա Արցախը՝ կփրկվի՝ Հայաստանը, մենք տեսնում ենք, որ դրանով Ալիևը չի բավարարվի՝ Գրանադա չգնալու Ալիևի այս դեմարշը դրա արդյունքն է»։

Խմբակցության պատգամավոր Լիլիթ Գալստյանն էլ ասաց, որ 21-րդ դարում՝ հայոց պետականության պայմաններում Արցախում տեղի ունեցած ցեղասպանությունը ողբերգությունից անդին է և մեծ խարան մեր՝ ՀՀ-ի վրա։

«Նիկոլ Փաշինյանը խորապես մեղսակից է, հանցակից և քաղաքական պատասխանատվություն է կրում այդ ցեղասպանության համար։ Ես ուզում եմ մեկ անգամ էլ ընդգծել, երբ դու իջեցնում ես նշաձողը, Պրահայում հայտարարում ես Ադրբեջանի տրածքային ամբողջականության մասին՝ միջազգային հանրությունից չունենալով ԼՂ բնակչության անվտանգության որևէ երաշխիք և մեխանիզմ՝ աներկբա է, որ դու տեղի ունեցած ցեղասպանության մեղսակիցն ես, քաղաքական պատասխանատվությունը ամբողջականությամբ երկրի իշխանության վրա է, անկախ նրանից, որ դու ճամարտակությամբ սադրանքներով, ստով կփորձես արդարանալ։

Ակնհայտ է նաև, որ Փաշինյանին զուգահեռ ԱԺ քաղաքական մեծամասնության պատգամավորները բոլոր միջազգային հարթակներում հայտարարում էին Ադրբեջանի տարածքային ամբողջականության մասին։ Որքան բովանդակությամբ և բարոյականությամբ զրո պետք է լինել՝ վերջին 4-5 օրվա ընթացքում կատարվածի պատասխանատվությունը Արցախում քաղաքական իշխանության վրա նետելու համար»։

Աղբյուր` Փաստինֆո