Փաստ ինֆո

Եթե որևէ մեկը զինվորական է, սա դեռ չի նշանակում, որ նա չի կարող քաղաքականությամբ զբաղվել։ Սա նորմալ պրակտիկա է։ Ինչ վերաբերում է ՀՀ ՊՆ նախկին նախարար Արշակ Կարապետյանի հայտարարությանը, ապա, կարծում եմ, այնտեղ բավականին հետաքրքիր անդրադարձներ եղան, սակայն դրանք լայնածավալ մեկնաբանության կարող են ենթարկվել միայն այն ժամանակ, երբ նրա մասնակցությամբ կոնկրետ գործողություններ կսկսվեն։ Մի բան, սակայն, հստակ է՝ նրա կողմից հնչեցին այնպիսի մեղադրանքներ, որոնք, ցանկացած քիչ թե շատ կայացած, նորմալ երկրի պայմաններում, կընդունվեին որպես հանցագործության մասին հայտարարություններ և համապատասխան իրավական պրոցեդուրաներ կսկսվեին,- «Փաստինֆո» լրատվականի հետ զրույցում ասում է քաղտեխնոլոգ Վիգեն Հակոբյանը։

Հիշեցնենք՝ երեկ ՀՀ պաշտպանության նախկին նախարար Արշակ Կարապետյանը հայտարարեց քաղաքականություն մտնելու մասին՝ Նիկոլ Փաշինյանին մեղադրելով Հայաստանի շահերին դավաճանելու մեջ։ Ավելին՝ նա պնդել է, որ արժանահավատ տեղեկություններ ունի, որ հենց կառավարության ղակավարը, վախենալով իր աթոռի համար, ադրբեջանցիներին խնդրել է ձերբակալել Ռուբեն Վարդանյանին ու նրան թույլ չտալ` գալ Հայաստան:

Իր հայտարարությամբ արմատական ընդդիմադիր կեցվածք որդեգրած ՊՆ նախկին նախարարը, ըստ Վիգեն Հակոբյանի, խիստ կարևոր շեշտադրումներ է կատարել. «Օրինակ, դատելով նրանից, որ նա իր ելույթի տեքստը կարդաց երկու լեզուներով՝ հայերեն և ռուսերեն, կարելի է հետևություն անել, որ սրանով նա ակնարկեց իր աշխարհաքաղաքական նախընտության մասին։ Պատահական չէր նաև իր խոսքում սեփական ստատուսի ընդծումը, այն, որ ինքը գեներալ է, ռազմական հետախուզության նախկին պետն ու Պաշտպանության նախկին նախարար։ Սա, իմ տպավորությամբ, հստակ մեսիջ էր՝ ուղղված զինվորականությանն ու գեներալիտետին, որ իր անձի շուրջ կարելի է կոնսոլիդացիա կազմակերպել և հստակ գործողություններ իրականացնել, եթե, իհարկե, նրանք կիսում են իր այդ հայացքները»։

Վիգեն Հակոբյանը նշում է՝ նախկին նախարարը երեկ հստակ գնաահատականներ տվեց օրվա ռեժիմին, ինչպես նաև՝ կոշտ մեղադրանքներ ներկայացրեց, այդ թվում Ռուբեն Վարդանյանին ադրբեջանական կողմին հանձնելու վերաբերյալ, որն, ըստ իր ունեցած տեղեկությունների՝ Նիկոլ Փաշինյանի բանավոր խոսքի հիման վրա է տեղի ունեցել. «Նա Նիկոլ Փաշինյանին մեղադրեց պետական դավաճանություն իրականացնելու մեջ։ Ես, իհարկե, իրավաբան չեմ, բայց հասկանում եմ՝ եթե դու մեկին բավականին ծանր հանցագործության մեջ ես մեղադրում՝ հայտարարելով, որ նա իր երկրի քաղաքացուն վաճառել է թշնամի երկրին, այն էլ՝ այնպիսի հանրային ճանաչում ունեցող մարդու, ինչպիսին Ռուբեն Վարդանյանն է, ապա՝ կամ դու ես հանցագործության մասին հայտարարություն ներկայացնում, կամ քեզ են մեղադրում՝ զրպարտության մեջ։ Բայց, քանի որ Արշակ Կարապետյանն իր խոսքում ընդգծեց, որ ինքն, իր ձեռքի տակ ստույգ տվյալներ ունի՝ նման հայտարարություն անելու համար, ապա այստեղ, միանշանակ, պետք է իրավական գործընթաց սկսվեր։ Հաշվի առնելով, որ ստույգ տվյալներին, այսինքն՝ նյութականացված փաստերին հղում կատարող մարդն էլ՝ իր հերթին, ռազմական հետախուզության նախկին պետ և Պաշտպանության նախախար է եղել, այդ գործընթացը պետք է որ ժամ առաջ մեկնարկեր։ Սակայն, ես չգիտեմ և չեմ կարող ասել, թե ինչպես կվարվի տվյալ պահին ՀՀ օրվա իրավապահ համակարգը»։

Անդրադառնալով Արշակ Կարապետյանի խոսքում՝ պաշտոնից հեռացման պատճառներին, քաղտեխնոլոգը նկատում է՝ այս մասին խոսակցությունները լայն շրջանառության մեջ էին մտել, դեռևս, վերջինիս պաշտոնանակության հենց օրերին.«Այս վարկածը մամուլում շրջանառվում էր դեռևս նրա պաշտոնանկության օրերեին՝ թե նա չի ենթարկվել հայաստանյան օրվա իշխանությունների պահանջին և այցելել է Արցախ, ինչպես նաև՝ թշնամու նախահարձակ ռազմական սադրանքներին համարժեք պատասխանելու հրահանգ է իջեցրել։ Ես, կարծում եմ, որ սա բավականին մոտ է իրականությանը, որովհետև իր խոսքում էլ Արշակ Կարապետյանը երեկ ընդգծեց՝ պաշտոնավարման ընթացքում երեք անգամ եղել է Արցախում, ինչը, բնականաբար, չէր կարող խրախուսվել հայաստանյան օրվա այս իշխանությունների կողմից։ Դուք հիշո՞ւմ եք որևէ դեպք, երբ այս վարչախմբի որևէ անդամ 44 օրյա պետարզմից հետո, այն էլ մի քանի անգամ, այցելած լինի Արցախի Հանրապետություն…

Ես, օրինակ, չեմ հիշում նման բան։ Այնպես որ, հաշվի առնելով հայաստանյան օրվա այս իշխանությունների վարքագիծը, կարծում եմ, Պաշտպանության նախկին նախարարի կողմից հանրայնացված այդ վարկածը ևս հավաստի դրվագ պետք է համարել։ Ճշմարտանման է նաև այն պնդումը, թե վերջինս՝ ադրբեջանական ռազմական ագրեսիաների ժամանակ կարող էր կրակով պատասխանելու հրաման հնչեցրած լիներ։ Թեև նա բավականին կարճ պաշտոնավարում ունեցավ Պաշտպանության նախարարի պաշտոնում, սակայն, այդ ամիսների ընթացքում, այո, հայկական բանակը ունեցավ դրվագներ, որտեղ Ադրբեջանի կողմից проходной двор-ի վերածված մեր սահմաններին թշնամու հրահրած ռազմական սադրանքներն հայկական կողմից համարժեք պատասխաններ տրվեցին։ Թեև այնպես չէ, որ հիմա մեր սահմանները նույն՝ проходной двор-ի կարգավիճակում չեն, եթե չասենք՝ ավելի վատ վիճակում, ցավով եմ ասում»։

Ամփոփելով թեման՝ քաղտեխնոլոգն ընդգծում է՝ ՊՆ նախկին պաշտոնյայի հայտարարությունը, կարծես, ոչ միանշանակ է ընդունվել ընդդիմության տարբեր թևերի կողմից և սա ակնհայտ է. «Արշակ Կարապետյանի անձի շուրջ տարատեսակ կարծիքներ են շրջանառվում, գուցե այն պատճառով, որ վերջին տարիներին իր կողմից կատարված այս կամ այն քայլերը, նույնպես, ոչ միանշանակ գնահատականի են արժանացել և հակասական քննարկման թեմա դաձել։ Նա միշտ չէ, որ հանդես է եկել այնպիսի դիրքորոշմամբ, ինչպիսն, առնվազն, երեկ արված իր հայտարարությունն էր՝ ընդգծված և արմատական ընդդիմադիր դիրքերից։ Մենք գիտենք, թե, մասնավորապես, ընդդիմադիրների հետ կապված որոշ դրվագներում նա ինչպիսի դերակակատարում և մասնակցություն է ունեցել տարբեր տարիների ընթացքում, մասնավորապես՝ ՀՀ երկրորդ նախագահ Ռոբերտ Քոչարյանի պարագայում և այլն։ Հավանաբար, այս է պատճատը, որ ընդդիմադիր կոնկրետ շրջանականեր բավականին քննդատաբար արձագանքեցին Արշակ Կարապետյանի երեկվա հայտարարությանը։ Ամեն դեպքում, մի բան հստակ է՝ պրոցեսն իր մասնակցությամբ, նոր է սկսվում, եթե, իհարկե, առհասարակ այն սկսվում է։ Զարգանալու պարագայում, այստեղ բավականին լուրջ խմորումներ են կատարվելու, որին, դեռևս, ականատես կլինենք, եթե, նորից եմ կրկնում, այն այսքանով էլ չավարտվի»,- ասել է քաղտեխնոլոգը։

Հ.Գ.«Փաստինֆո»-ն դիմել է դատախազություն՝ պարզելու, թե արդյոք նախկին նախարարի հայտարարությունները քննության առարկա դարձրել են, բայց այս հարցի պատասխանը դատախազությունը չուներ ու գրավոր հարցում է պահանջել, ինչը բնականաբար, ուղարկել ենք։

Աղբյուր` Փաստինֆո