Փաստ ինֆո

Ձեր վերջը հաստատ գալու է։ Դուք երևի պետք է այնքան երկար մնաք, որ ձեր գնալու ճանապարհն էլ, ձեր պատիժն էլ ավելի արդար, ամենաարդար ձևով կազմակերպվի և որքան դուք երկար եք մնում, այնքան ձեր պատիժն ավելի դաժան է լինելու, իսկ ձեր գնալու ճանապարհը՝ ավելի արդար։ Այս մասին ԱԺ-ում հայտարարել է «Պատիվ ունեմ» խմբակցության պատգամավոր Աննա Մկրտչյանը՝ դիմելով իշխանություններին։

«Ողջ օրվա ընթացքում հետևում եմ ՔՊ-ականների դեմքերին, պահվածքին, ուզում եմ հասկանալ՝ ինչից եք այդքան գոհ։ Ինչից եք այդքան գոհ, ձեր ուզածին հասե՞լ եք, այս պատկերն եք ՀՀ համար նախատեսել, հանգստացել եք վերջապես, Արցախը հանձնել եք, հիմա հանգիս՞տ եք։ Երկրում սուգ է, Հայաստան աշխարհում ձեր բերած պարտության, ձեր բերած անարժանապատիվ կյանքի այս դառնության մեջ ենք, բայց ձեր ծիծաղը, անհասկանալի աղմուկն այս դահլիճից չի կտրվում։ Ինչից եք այսքան ուրախ։ Հայաստանին և Արցախին տարբեր ժամանակներում հաղթանակներ բերած մարդկանց բարեհաջող տվեցիք Բաքվին, դրանից՞։ Անկեղծ ասեք՝ որ մեկի գերեվարումից եք ամենաշատն ուրախացել՝ Դավիթ Մանուկյանի, Լևոն Մնացականյանի, Դավիթ Բաբայանի, թե Ռուբեն Վարդանյանի, Բաքվում հարյուրավոր գերիներից եք գոհ, որ մինչև հիմա խոշտանգում, սպանում են։ Դրանից՞ եք գոհ, թե հիշել եք, որ փողոցներում Արցախի մանուկներ են եկել՝ առանց հագուստ, առանց ապագայի, առանց ոչնչի։ Թե գոհ եք նրանից, որ ինչ անում եք ժողովրդի գլխին, միևնույն է, ձեր աթոռներին ոչ մի վնաս չի սպառնում։ Սրանի՞ց եք ուրախ։ Դուք հո վամպի՞ր չեք, այսքան արյան մեջ այսքան անհոգ դեմքերով ոնց եք ապրում դուք»,- նշել է Աննա Մկրտչյանը՝ հավելելով, որ մինչև վերջ հնարավոր չէ պատկերացնել, թե որքան վատն են նրանք․ հենց այն խավարն են, որը ցրելով է հնարավոր լինելու ինչ-որ լույսի շող բացել այս երկրի վրա։

Աննա Մկրտչյանի ելույթից հետո վիճաբանություն-լեզվակռիվ տեղի ունեցավ ԱԺ նախագահի և Մկրտչյանի միջև, երբ Սիմոնյանը, արձագանքելով Մկրտչյանի հայտարարությանը, «ռեպլիկ արձակեց»՝ նշելով․ «Մարդն իր փորձով է կիսվում»։
Մկրտչյանն էլ, արձագանքելով, ասաց՝ «Տխմար, ձենդ կտրի է»։ ԱԺ նախագահն էլ հայտարարեց՝ «Տխմարը դու ես ։ Այ չինական․․․Անդաստիարակ երևույթ ես, ամեն մեկին բերում շպրտում են այստեղ»։ Սիմոնյանի «լեզվակռիվը», սակայն, այսքանով չավարտվեց։ Ալեն Սիմոնյանը չմոռացավ իր ելույթում էլ անդրադառնալ Մկրտչյանին՝ նշելով․ «Աստված լրբից երես է թեքում»։

Աղբյուր` Փաստինֆո