Փաստ ինֆո

Բազմիցս ասում էինք, որ «Հռոմի ստատուտ»-ի վավերացումը խիստ բացասական հետևանքներ է ունենալու մեզ համար։ Ռուսաստանի Դաշնությունն էլ, թեմայի վերաբերյալ կեցվածք դրսևորեց՝ հայտարարելով, որ դա թշնամական վերաբերմունք է։ Հետևաբար, այս իշխանություններն, այսօրվա իրենց քայլով ընդունեցին, որ իրենք, մեղմ ասած, բարեկամ չեն Ռուսաստանի Դաշնությանը, այլ՝ թշնամի,- «Փաստինֆո» լրատվականի հետ զրույցում ասում է ռազմական փորձագետ, պահեստազորի գնդապետ Հայկ Նահապետյանը։

Հիշեցնենք՝ այսօր ՀՀ Ազգային Ժողովը վավերացրեց Միջազգային քրեական դատարանի Հռոմի կանոնադրությունը՝ 60 կողմ և 22 դեմ ձայներով։ Վավերացմանը կողմ են քվեարկել միայն ՔՊ խմբակցության պատգամավորները։ ԱԺ ընդդիմադիր խմբակցությունները դեմ են քվեարկել։

Հայկ Նահապետյանն ասում է՝ ի՞նչ վնաս պետք է տա Ռուսաստանի Դաշնությանը Հայաստանի պես մի երկիր՝ վավերացնելով Հռոմի ստատուտը, հետևաբար, խնդիրն այստեղ ոչ այնքան իրավական, որքան բարոյական հարթության մեջ է. «Ըստ կնքված միջպետական պայմանագրերի, մենք Ռուսաստանի Դաշնության հետ ռազմավարական դաշնակիցներ ենք։ Սակայն այսօր այստեղ մի փաստաթուղթ է վավերացվել, որով ցույց է տրվել կոնկրետ վերաբերմունք այդ պետությանը։ Այս պահին դժվար է գնահատել՝ ինչպե՞ս Ռուսաստանի Դաշնությունը կարձագանքի այս քայլին՝ արդյո՞ք պատժամիջոցնե՞ր կկիրառի, թե՞ ոչ, կլինե՞ն այլ քայլեր՝ շատ դժվար է ասել»։

Բանախոսը նկատում է՝ երեկ ՌԴ ԱԳ նախարար Սերգեյ Լավրովին էր լսում, ով շատ հետաքրքիր գնահատական է տվել՝ իշխանություն բառի փոխարեն հայաստանյան օրվա իշխանություններին անվանելով ժամանակավոր ադմինիստրացիա. «Ի՞նչ ասել է՝ ժամանակավոր ադմինիստրացիա, մի ձևակերպում, որն, ակնհայտորեն, իշխանություն չի նշանակում։ Ինձ համար տարօրինակ է, որ սա Լավրովն է ասում, որովհետև նույն Լավրովը, ժամանակին, Նիկոլին այդքան էլ խիստ բացասական չէր վերաբերվում, նրանք, նույնիսկ, փորձում էին այս իշխանությունների հետ աշխատել։ Ստացվում է, որ Նիկոլ Փաշինյանը ժամանակին՝ 2021 թ. ընտրություններում հաղթել է և հիմա այդ ընտրված մարմինը, ըստ Լավրովի, գնահատվում է որպես՝ նշանակովի մարմին, որովհետև ադմինիստրացիան, դա նշանակովի մարմին է։ Ի՞նչ է սա նշանակում, այն, որ Ռուսաստանի Դաշնության համար Հայաստանում ընտրված իշխանություն գոյություն չունի։ Հաջորդ հարցը, որ ծագում է Լավրովի այս արտահայտությունից՝ ո՞ւմ կողմից է նշանակվել այս ժամանակավոր ադմինիստրացիան Հայաստանում։ Այն քաղաքականությունը, որ վարում է հայաստանյան օրվա այս իշխանությունն, ակնհայտորեն, սպասարկում է ինչպես Հայաստանի Հանրապետության, այնպես նաև՝ Ռուսաստանի Դաշնության թշնամիների՝ հավաքական Արևմուտքի շահերը։ Հետևաբար, ըստ Լավրովի, Հայաստանը ղեկավարում են այլ երկրների ուղղակի հանձնարարականները կատարող ժամանակավոր ադմինիստրացիայի անդամները», - ասում է պահեստազորի գնդապետը։

Անդրադառնալով երեկ հայտնի դարձած թուրքական հերթական պահանջին, այն է՝ փակել Մեծամորի ատոմակայանը, Հայկ Նահապետյանը նկատում է՝ այս հարցում, կրկին, հավաքական Արևմուտքի և Թուրքիայի շահերը համընկնում են. «Երբ Հայաստանը ԵՄ-ի հետ «Համապարփակ ընդլայնված համագործակցության» պայմանագիր էր ստորագրում, այնտեղ Մեծամորի ատոմակայանի հետ կաված կետ կար։ Եվ, եթե այդ մասին Արևմուտքը մեզ դեռ 7-8 տարի առաջ էր զգուշացնում, հիմա Թուրքիան հայտնվել ու պահանջներ է ներկայացնում և նրա պահանջներն այսքանով չեն ավարտվելու։ Թուրքիան դեռ Սյունիքի հետ կապված պահանջներ կներկայացնի, ինչպես նաև Հայաստանի 6-7 մարզերում ազգությամբ ադրբեջանցիների վերաբնակեցման և նրանց մշակութային ինքնավարությունը պաշտպանելու հարցերով պահանջներ նույնպես կլսենք Թուրքիայից։ Սա, ըստ էության, 1921 թ. կնքված Կարսի պայմանագրի չեղարկման է տանելու, որը մեզ կանգնեցնելու է 1920 թ. դեկտեմբերի 2-ին կնքված Ալեքսանդրապոլի պայմանագրի առաջ։ Թուրքիան գնում է ՀՀ-ում «Ալեքսանդրոպոլ 2» պայմանագրի ստորագրմանը։ Այսքան բան»։

Աղբյուր` Փաստինֆո