Փաստ ինֆո

Հայ ժողովուրդն այսօր ապրում է իր պատմության ամենաողբերգական ժամանակներից մեկը՝ Արցախը հայաթափված է, իսկ Հայաստանը բռնել է թրքացման ճանապարհը, այն, ինչի մասին զգուշացնում էինք շարունակաբար,- այսօր ՀՀ Ազգային Ժողովի ամբիոնից ասել է ընդդիմադիր «Հայաստան» խմբակցության պատգամավոր Արմեն Ռուստամյանը։

«Թուրք – ադրբեջանական հրոսակներն, աշխարհի անտարբեր հայացքի ներքո, հերթական անգամ, արդեն՝ Հայաստանի աչքի առաջ, հայերի նոր ցեղասպանություն գործեցին, չնայած նրան, որ միջազգայնորեն ամրագրված է՝ չմիջամտելն ու ահնրաժեշտ բոլոր միջոցներով ցեղասպանությունը չկանխելն ու չդատապարտելը հանցակցություն է։ Սա վերաբերվում է նաև Հայաստանին։ Սա գիտակցելով էր, թերևս, Նիկոլ Փաշինյանը շտապում հայտարարել, որ Ադրբեջանի գործողությունները չեն սպառնում խաղաղ բնակչությանը, որն օգտագործվեց ու շարունակելու է օգտագործվել մեր դեմ։ Հիմա, փոխանակ պատասխան տան, թե ինչո՞ւ ցեղասպանվող ու արյունահոսող Արցախի ժողովրդին միայնակ թողեցին՝ իրենցից բազմակի գերազանցող ազերի հրոսակներին դեմ հանդիման, փորձում են Արցախում իշխանության օրեցօր ծանրացող բեռի պատասխանատվությունից փախուստի դիմածներին, փոխարինման եկածներին ու ժողովրդին անտերության չմատնելու համար այդ բեռի տակ մտածներին մեղավոր կարգել։ Չի՛ ստացվի, որովհետև Արցախի ժողովուրդը շատ լավ գիտի ով՝ ով է և նա է միակ դատավորը, ոչ թե դուք»,- ասել է Ռուստամյանը։

Այս իշխանությունն, իսկապես, շատ է շտապում կատարվածն ամփոփել յուրովի և մեղավորներ նշանակել ուրիշներին, ասում է պատգամավորն ու հավելում.«Ձեր վարած քաղաքականությունը միշտ էլ աղետաբեր հետևանքեր է ունենալու և դա դեռ առջևում է։ «Տանք Արցախը, որ փրկենք Հայաստանը» թեզով Արցախը հայաթափեցիք, հերթը հասավ Հայստանի թուրքացմանը։ Արցախը հանձնելով Հայաստանը ոչ միայն չի փրկվել, այլ հայտնվել է Ադրբեջանի դրած մյուս վերջնագրերի առջև։ Դրանք կան և ավելի հստակ կդրսևորվեն առաջիկայում, որոնք կներկայացվեն Հայաստանին, հիմնականում՝ հետևյալ ուղղություններով՝ Ադրբեջանի պայմաններով սահամանզատում և սահմանագծում, որով կորոշվեն, թե ինչքան տարածք է մեզ հասնում, անկլավենրի վերադարձ, որով կվերահսկեն մեր միջպետական ճանապարհները, մեր ինքնիշխանության էական սահմանափակումներով՝ կապ Նաախիջևանի հետ, ազերի փախստակնների վերադարձ՝ մինչև 1988թ. նրանց զբաղեցրած բնակավայրեր, իհարկե ոչ բնականության սկզբունքով, այլ այս ընթացքում նրանց բնական աճն ի նկատի ունենալով։ Հայաստանին ներկայացվելու է ավելի քան 100 մլրդ ռեպարացիայի պահանջ՝ հատուցելու համար Ադրբեջանի, այսպես կոչված, կորուստները հատուցելու համար՝ սկսած 1988 թ.-ից։ Սրանք լրջագույն սպառնալիքներ են առաջացնելու՝ ուղղված մեր ինքնիշխանությանը, տարածքային ամբողջականությանը և որ չափազանց կարևոր է՝ մեր դեմոգրաֆիական անվտանգությանը»,- ասել է պատգամավորը։

Մանրամասները՝ տեսանյութում։

Աղբյուր` Փաստինֆո