Փաստ ինֆո

Գաղտնիք չէ, որ տարիներ շարունակ Հայաստանի տնտեսությունը գերի է հանձնվել ռուսական կայսրությանը, ինչի արդյունքում էլ Հայաստանի կողմից յուրաքանչյուր անկախ քայլ արժանանում է Ռուսաստանի կողմից լուրջ հակազդեցության ու պատիժների։ Այս մասին «Փաստինֆոյի» հետ զրույցում ասաց ՓՄՁ շահերի վերլուծաբան, գործարար Սասուն Գրիգորյանն՝ անդրադառնալով Հայաստանի արտաքին քաղաքականության վեկտորի փոփոխության ու Հռոմի ստատուտի վավերացման հետևանքներին։

«Հայաստանի ամբողջ էներգետիկ ու տնտեսական համակարգի գրեթե 90 տոկոսը ՌԴ-ին է նվիրված, իսկ Հայաստանի արտաքին քաղաքականության վեկտորի փոփոխությանը ՌԴ-ում հիվանդագին են վերաբերվում։ Հետևաբար, կարելի է սպասել ամենավատին, քանի որ մենք արդեն աչքի առաջ ունենք Վրաստանի փորձը և տեսնում ենք, թե ինչպես է Ռուսաստանն իրեն դրսևորում, ինչ խանդի տեսարաններ են լինում։ Հայաստանի հետ կապված էլ, համոզված եմ, որ Ռուսաստանը որոշակի տնտեսական դժվարություններ կստեղծի, թեև հիմա դժվար է ասել, որ քայլերը կանեի, որոնք՝ չէ։ Կարծում եմ, դա կախված է լինելու Հայաստանի և Ռուսաստանի հետագա գործողություններից։

Նախ՝ հնարավոր է, որ Ռուսաստանը լուրջ դժվարություններ ստեղծել հայկական ապրանքների Ռուսաստան ներմուծման համար։ Գիտեք՝ «Ռոսգոսնադզորը» ՌԴ-ի կողմից օգտագործվում է որպես գործիք ոչ ցանկալի երկրներից ապրանքների ներմուծման խոչընդոտներ ստեղծելու համար։ Սա ուղիղ ազդեցություն է ունենալու մարդկանց գնողության վրա։

Հաջորդ լծակը՝ արտագնա աշխատողների և նրանց կողմից ուղարկվող տրանսֆերների նկատմամբ վերահսկողությունն ու հարկումը կարող է լինել։

Սրանք, սակայն մեղմ սցենարների դեպքում, առավել ծանր սցենարների դեպքում կարող են խնդիրներ ստեղծել Ատոմակայանի և գազի գների հետ կապված, որը ուղղակի հարված կհասցնի Հայաստանի ողջ բնակչությանը»։

Գրիգորյանի գնահատմամբ՝ Թուրքիայի դիմումը ՄԱԳԱՏԷ-ին՝ Մեծամորի Ատոմակայանը փակելու պահանջով, ռուսական գլոբալ խաղի սկիզբն է, որի առաջին հարվածը իրականացվում է Թուրքիայի ձեռքով։ «Վստահ եմ, որ այս օրերին նման մոտեցումները հանկարծակի չէին և նախապես պլանավորված էին։ Իմանալով ՌԴ-ի՝ Թուրքիայի հետ բավական ջերմ հարաբերությունների մասին՝ ներքին համոզվածոթւյուն ունեմ, որ այս դեպքում ՌԴ-ն Թուրքիայի միջոցով է տնտեսական առաջին հարվածն հասցնելու Հայաստանին, հետագայում, եթե ստացվի այնպես, որ Ռուսաստանը դադարեցնի Ատոմակայանի շահագործումը՝ վերջնականապես կամուրջները չայրելու համար կարող է մեղքը բարդել ՄԱԳԱՏԷ-ի և Թուրքիայի վրա»

Ինչ վերաբերում է գազի գների վերանայմանը, ապա վերլուծաբանը վստահ է, որ առաջին իսկ հնարավորության դեպքում ՌԴ-ն սա որպես խաղաքարտ օգտագործելու է մեր դեմ։

«ՀՀ իշխանությունները արտաքին քաղաքականություն վարելիս պարտադիր պետք է հաշվի առնեին այս բոլոր հետևանքները, այժմ էլ պետք է փորձեն ժամանակ շահելու միջոցով՝ նվազագույն կորուստներով դուրս գալ այս իրավիճակից։ Իշխանությունը նախ պետք է վստահություն ունենար, որ, այս րոպեին ՌԴ-ին հաջողություն ասելով, հարվածի տակ չի դնի տնտեսությունն ու մեր երկրի անկախությունը»։

Աղբյուր` Փաստինֆո