Փաստ ինֆո

Արցախի Հանրապետությունն ինքնալուծարման վերաբերյալ ակտ է ստորագրել։ Այդ ակտը կարող էր ուժի մեջ մտնել ցանկացած օր, ասենք՝ հոկտեմբերի 1-ին կամ նոյեմբերի ինչ- որ մի օր, բայց դրա համար նշանակված է 2024 թ. հունվարի 1-ին։ Ինչո՞ւ է այդպես, որովհետև Ռուսաստանի Դաշնությունը մեզ մեր վերջին հնարավորությունն է տալիս՝ վերջին երեք ամիսը, հեռացնելու այս հակահայ, ազգադավ իշխանութուններին և փրկելու Հայաստանն ու Արցախը,-«Փաստինֆո» լրատվականի հետ զրույցում ասում է «Ազգային անվտանգություն» կուսակցության ղեկավար Գառնիկ Իսագուլյանն ու հավելում՝ եթե մենք այս վերջին շանսը չօգտագործենք, «Ալեքսանդրապոլ 2» պայմանագիր ենք ստորագրելու, այլընտրնաք չի լինելու։

Նրա փոխանցմամբ՝ որևէ ակնկալիք կամ սպասելիք, ի սկզբանե, չի ունեցել հրապարակային ընդդիմությունն առաջնորդող վերջին նորակազմ կոմիտեից՝Վազգեն Մանուկյանից ու Չալաբյանից մասնավորապես, սակայն, որևէ կերպ չի կարողանում հասկանալ կամ գոնե տրամաբանական որևէ բացատրություն գտնել խորհրդարանական ընդդիմության որդեգրած վարքից. «Չեմ հասկանում՝ ի՞նչ են ուզում նրանք էս կյանքից ու աշխարհից, ինչի՞ են ուզում հասնել, ի վերջո, կամ դեռևս ի՞նչ են պատրաստվում անել՝ ստեղծված իրավիճակում։ Ինձ համար սա, մեղմ ասած, անհասկանալի է, այն պարագայում, երբ խնդրում – աղաչում ենք նրանց, որ կոնկրետ և հստակ քայլերի դիմեն, որովհետև մեր բոլոր հնարավորություններն արդեն սպառված են, ժամանակ, ինչպես տեսնում ենք՝ նույնպես չունենք։ Արդեն ասացի՝ մեզ ընդամենը երեք ամիս ժամանակ են տվել՝ փրկելու Արցախն ու Հայաստանը թրքացումից՝ մինչև 2024 թ. հունվարի 1։

Հռոմի ստատուտի վավերացումը մեզ ոչինչ չի տալու, բացի նրանից, որ գործող իշխանությունների, այսինքն՝ օտարերկրյա գործակալների ձեռամբ ապացուցեցինք մեր ռազմավարական դաշնակցին, որ թշնամաբար ենք տրամադրված իր նկատմամբ, ասում է պարոն Իսագուլյանն ու հավելում. «Սա, արդեն, Հայաստանի կորստի առաջին ազդանշանն է, որովհետև Ռուսաստանի Դաշնությունն իր պետական շահը, բնականաբար, գերադասելու է Հայաստանի այսպիսի դավաճանությունից։ Արդյունքում, Հայաստանը վերածվելու է մի տարածքի, որտեղ հայկական պետականություն, այլևս, չի լինելու։ Ռուսաստանի Դաշնությունը, վաղ թե ուշ վերադառնալու է այս տարածաշրջան, բայց այստեղ, այլևս, Հայաստան պետություն չի լինելու։ Հայաստանյան օրվա այս իշխանությունների վարած քաղաքականությունն, անգամ, Իրանի Իսլամական Հանրապետությանը դարձրեց մեր մեծագույն թշնամին։ Նույն Իրանն այսօր, արդեն, համաձայն է նրան, որ այս տարածաշրջանում Հայաստան պետություն, որպես այդպիսին, չլինի, որովհետև Հայաստանն այստեղ՝ Իրանի քթի տակ ՆԱՏՕ-ի զորքեր և Իսրայել է ցանկանում բերել։ Ասինքն, հիմա թե՛ ՌԴ-ն, թե՛ Իրանի Իսլամական Հանրապետությունը գտնում են, որ Հայաստանի գոյությունը տարածաշրջանում որպես պետություն ավելի մեծ սպառնալիք է, քան նրա չգոյությունն, առհասարակ»։
Հարցին՝ ինչո՞ւ է Թուրքիան հանդես գալիս Մեծամորի ատոմակայանի փակման պահանջով, Գառնիկ Իսագուլյանը պատասխանում է՝ իրականում, Թուրքիան ոչ թե ատոմակայանի, այլ Հայաստանի Հանրապետության փակման պահանջով է հանդես գալիս և քանի որ մենք ունենք թրքական կապիտալով իշխանության եկած թշնամի գործակալների մի խումբ, ապա նրանց անմիջական օգնությամբ, Թուրքիան կարող է մոտ ապագայում հասնել իր երազանքին՝ Հայաստան պետության չգոյությանը, իսկ մենք ատոմակայանից ենք խոսում, ասում է բանախոսը։

Ամփոփելով զրույցը, Գառնիկ Իսագուլյանը կրկին դիմում է խորհրդարանական ընդդիմությանը. «Վերցնենք հենց այսօրվա նրանց պահվածքը՝ Հռոմի ստատուտի հետ կապված՝ իշխանություն կոչվածն արդեն քվեարկել ու այն ընդունել է, սրանք նոր – նոր փորձում են հետին թվով ինչ – որ բաներ խոսել։ Թե՛ Ալեն Սիմոնյանը, թե՛ Ռուբեն Ռուբինյանը շատ հստակ ասեցին նրանց՝ պատերազմից հետո սրեր չեն ճոճում...Նրանք սխալ չեն ասում՝ փոխանակ սրանք գնային, հերթագրվեին, իրենց հարցերը հանրային կերպով հնչեցնեին, թողեցին գնացին դահլիճից, իսկ կատարվածից հետո եկան, սկսեցին խունջիկ – մունջիկ լինել...Կներեք՝ դուք, իրոք, ադեկվատ ե՞ք..Լավ, ձեր ուզածը ո՞րն է, ասեք՝ իմանանք, հասկանանք, որովհետև այսքանից հետ ընդամենը մեկ տրամաբանական հարց է ծագում՝ ինչո՞ւ եք դուք պահում ձեր այդ մանդատները՝ վայր դրենք դրանք»։

Աղբյուր` Փաստինֆո