Փաստ ինֆո

Մեր երկրում ընդդիմության հրավիրած հավաքները տապալվում և դատապարտվում են պարտության, որովհետև ընդդիմության մի հատված, ինչպես որ այս իշխանությունը, մաս են կազմում Արևմուտքի վարած քաղաքականությանը, այն է՝ Արցախը թողնել Ադրբեջանի կազմում,- «Փաստինֆո» լրատվականի հետ զրույցում ասում է քաղտեխնոլոգ Արմեն Բադալյանը՝ պատասխանելով հարցին՝ ինչո՞ւ հայաստանյան ընդդիմությանն այդպես էլ չի հաջողվում իշխանափոխություն իրականացնել, նույնիսկ այնպիսի ճգնաժամային և ողբերգական իրավիճակում, ինչպիսին Արցախի հանձնումն էր։

Արմեն Բադալյանը հավելում է՝ ցանկացած դիմադրություն, որը կարող էր խոչընդոտել Արցախն Ադրբեջանի կազմում թողնելու արևմտյան ծրագրին, պետք է չեզոքացվեր։ Եվ ահա, ընդդիմության մի հատված, հետևողականորեն, հավաքները ներսից չեզոքացնում էր՝ թույլ չտալու համար արևմտայան՝ Արցախի հանձնման ծրագրի տապալումը, ասում է քաղտեխնոլոգը։

Հարցին՝ ընդդիմադիր ո՞ր ուժի մասին է խոսքն, Արմեն Բադալյանն ասում է՝ կգա ժամանակը կիմանաք, այդ ժամանակին քիչ է մնացել, սակայն այն, որ ընդդիմության մի հատված, ուղղակիորեն, մաս է կազմել Արևմուտքի և հայաստանյան օրվա իշխանությունների ծրագրերին, սա փաստ է. «Ընդդիմության մի հատվածն իրականացրեց այդ ծրագիրը։ Կլինի՞ նոր շարժումը, նորից կչեզոքացնի, որի դիմաց հետագայում Արևմուտքի կողմից Ազգային Ժողովում որոշակի տեղեր կստանա»։

Հարցին՝ ի՞նչ կարելի է սպասել հրապարակներ դուրս եկած, սակայն առանց առաջնորդի մնացած ժողովրդից, Արմեն Բադալյանն ասում է՝ բողոքող մարդիկ, ինչքան էլ նրանց թիվը մեծ լինի, էական ոչինչ անել չեն կարող առանց առաջնորդի. «Հնարավոր է, որ ինչ – որ մի ժամանակահատված նրանց հաջողվի փոքրամասշատ ակցիաներ իրականացնել, օրինակ՝ մեկ – երկու փողոցներ փակել, բայց դա վերջնական արդյունքի վրա էական որևէ նշանակություն չի ունենալու։ Համակարգված դիմադրություն կազմակերպելու համար համապատասխան կառույցների օժանդակությունն է անհրաժեշտ, որն առանց առաջնորդների հնարավոր չէ ստանալ»։

Հարցին՝ ո՞ւր է տանում ստեղծված ներքաղաքական իրավիճակը, քաղտեխնոլոգ Արմեն Բադալյանն ասում է՝ ամեն ինչ կախված է նրանից, թե ինչպիսի՞ իշխանություն կլինի երկրի ղեկին.«Եթե խոսքը հայաստանյան օրվա այս իշխանության մասին է, ապա գնալու ենք Ռուսաստանի Դաշնության հետ կապերի խզման ճանապարհով։ Հայաստանն Արևմտյան զոնայի մեջ աննշան ինչ – որ խաղաքարտ կդառնա ու վերջ»։

Աղբյուր` Փաստինֆո