Փաստ ինֆո

Արցախցի գաղթականներին նոր փորձություններ են սպասվում Մայր Հայաստանում։

«Փաստինֆոյին» է ահազանգել արցախցի Նունե Արզումանյանը՝ պատմելով, որ Արցախից բռնի տեղահանվելուց հետո հայտնվել են փողոցում մնալու վտանգի առջև։

Նրա փոխանցմամբ՝ պետությունն իրենց կացարան է առաջարկել Դիլիջանում, բայց 3 երեխաներն ու ինքը լուրջ առողջական խնդիրներ ունեն և անընդհատ բժշկի վերահսկողության կարիք ունեն։ «Բժշկի գալու համար այդքան ճանապարհ ամեն անգամ չեմ կարող անցնել, ես էլ առողջական խնդիրներ ունեմ, թոքերս 10 տոկոսով են շնչում, էնտեղ էլ ցուրտ է։ Հիմա տեղավորվել ենք Մասիսում, Արցախցի մի ընտանիքի տունն է, արդեն 5 օր է այստեղ ենք, բայց իրենք էլ հիմա գալիս են, ճանապարհին են, ասել են՝ ազատենք տունը, գալիս ենք, իրենք էլ ուրիշ տեղ չունեն մնալու։ Հիմա որ գան՝ դուրսն ենք մնալու»։

Նունեն նշեց, որ մի քանի անգամ դիմել է Մասիսի քաղաքապետարան՝ կացարանի ակնկալիքով, բայց քաղաքապետարանից պատասխանել են, որ ազատ տուն չունեն։

«Ասացին՝ դուք գտեք, մենք պատրաստ ենք վարձը տալ, բայց տուն չկա, չեմ գտնում։

Հավատացեք, երեխաները շատ վատ վիճակում են, եթե սենյակից դուրս եմ գալիս, կամ խանութ եմ գնում երեխային «կրավաթից» կապում, նոր գնում եմ, 2-ը էպիլեպսիայով հիվանդ են, շատ ագրեսիվ ու վտանգավոր է մենակ թողնելը։ Տունն ուտելու բան էլ չունենք, քաղաքապետարանից մի քիչ մակարոն, ձեթ, բրինձ են տվել, մոտս 3000 դրամ գումար էր մնացել, դա էլ տվել՝ մի պլիտա եմ առել, որ ուտելու բան սարքեմ, Էս տանը ո՛չ բաղնիք կա, ո՛չ զուգարան, ո՛չ ջուր, ո՛չ գազ։

Մարտակերտում 9 ամիս սոված էինք, խանութները դատարկ էին, հիմա էստեղ էկել ենք, ամեն բան լիքն է, բայց էլի սոված ենք։ Երեխեքին ամեն ամիս 45 000 դրամ նպաստ էին տալիս, էնտեց վերջին ամսվա գումարը չտվեցին, մեր թոշակն էլ չտվեցին, մնացել եմ փաստի առաջ»,- ասում է Նունեն։

Ընտանիքը Մարտակերտում կարողացել է վարկով տուն գնել, բայց վարկն ամբողջությամբ դեռ չեն մարել։ «Հազիվ տուն -տեղ էի դրել, չհասցրեցի վայելել։ Մինչև հիմա էլ VTB բանկին գումար եմ պարտք, չեմ մարել էդ գումարը։ Հարկադիրը մեր գումարները սաղ վերցրել է, պիտի փոխանցեր VTB բանկին, բայց որ կռիվը սկսվել է՝ չեն փոխանցել։ Հիմա 45 000 իմ հաշվին գումար ունեմ, չեմ կարողանում ստանալ։ Գնում եմ բանկ լացում եմ, ասում եմ ես էդ իրավունքը ունեմ էդ գումարը ստանալու, տվեք տանեմ հաց առնեմ, չեն տալիս, որովհետև հարկադիրը գումարը չի փոխանցել բանկին։ Հիմա սպասում եմ, պետության խոստացած գումարին, չգիտեմ, երբ են տալիս ու ոնց։ Դեռ բան չեն ասում»։

Կնոջն ու իր ընտանիքին կացարանով աջակցելու համար կարող եք զանգահարել 093 37 30 28 հեռախոսահամարով։

Աղբյուր` Փաստինֆո