Փաստ ինֆո

Ակցիաները վերսկսվում են, բայց մենք ինչ-որ աշխատանքեր ունենք ու պարտադիր չէ, որ ամեն օր հանրահավաք լինի։ Այսինքն, հանրահավաքները շարժման գործիքներից մեկն է, որ կօգտագործվի, այսօր հանրահավաք է լինելու, թե հաջորդը երբ կլինի՝ չեմ կարող ասել, կհայտարարենք։ Այս մասին այսօր «Ազգային կոմիտեի» հրավիրած հանրահավաքից առաջ լրագրողների հետ զրույցում ասել է Ազգային կոմիտեի անդամ Վազգեն Մանուկյանը։

Հարցին, թե Փաշինյանի հրաժարականն են պահանջում, բայց դեռ չեն ներկայացրել վարչապետի իրենց թեկնածուին՝ Մանուկյանն ասաց, որ դեռ ժամանակ կա թեկնածուի անուն հնչեցնելու համար։
«Ես կարծում եմ, որ իշխանության մեջ պետք է ճաքեր լինեն, որ իմաստ ունենա ԱԺ-ի միջոցով փոխել։ Դա դեռ տեղի չի ունեցել։ Մարդիկ պետք է հասկանան, որ երկիրը կործանվում է և, եթե Կոմիտեի կողմն էլ չլինեն, Նիկոլ Փաշինյանի դեմ են։ Փաշինյանին հանելը հասարակության պահանջն է, այլ բան, որ վստահության ու ճանապարհի հարց է։ Վստահ եմ, որ այս դեպքերից հետո ժողովրդի ճնշող մեծամասնությունը ակնկալում է Փաշինյանի հրաժարականը»։

Դիտարկմանը, թե որքանով է արդար, որ սպասում են, որ իշխանության շրջանակում ճաքեր լինեն այն դեպքում, երբ երկուշաբթի օրվանից իրենք մարդկանց ուղարկեցին տուն, իսկ Թևանյանն հայտարարել է, որ այսօրվա հանրահավաքին ներկա չի լինելու, սա նշանակո՞ւմ է, որ Կոմիտեի կազմում մարդիկ իրար չեն հասկանում՝ Մանուկյանն ասաց, որ կոմիտեի կազմում միշտ էլ վեճեր լինում են։ «Այս քանի օրը մարդիկ զբաղված էին արտագաղթածների խնդիրներով, մարդկանց տրամադրությունն էլ ավելի շատ սգային է, քան պայքարային։ Դրա համար էլ հետաձգելը ճիշտ էր»։

Նա նաև նշեց, որ դեռ չկա այնպիսի սցենար, որով Արցախը վերադարձնելու են։ «Ոչ թե մեզ մոտ չկա, այլ ընդհանրապես չկա, բայց որ պետք է այդ հարցը բաց պահել և մի օր կարող է հաջողություն լինի ու մենք կարողանանք Արցախի հարցը մեզ համար դրական ձևով լուծել՝ այդ դուռը փակ չէ»։

Մանրամասները՝ տեսանյութում․

Աղբյուր` Փաստինֆո