Փաստ ինֆո

Այն, որ Հայաստանի ու Արցախի վրա շարունակական ճնշումներ են իրականացվում, սա միանշանակ է։ Այդ ճնշումների ելքն այս ահավոր իրողութունն է, որն այսօր տեղի է ունենում Արցախում, որտեղ հայաթափմամբ ցեղասպանություն է իրականացվում,- «Փաստինֆո» լրատվականի հետ զրույցում ասում է ՀՀ Պաշտպանության նախկին նախարար, ՀՀ ԱԺ «Հայաստան» խմբակցության ղեկավար Սեյրան Օհանյանը։

Կատարվողի հիմնական հանցագործն Ադրբեջանն է, նշում է պարոն Օհանյանն ու հավելում. «Ասում եմ Ադրբեջանը, որովհետև, երբ Խորհրդային Միության օրենքների համաձայն, Արցախն ինքնորոշվեց, Ադրբեջանը դրան պատերազմով պատասխանեց։ Այն ժամանակ էլ՝ 1992- 94 թթ.-ին, էթնիկ զտումներ էին իրականացվում, տղամարդկանց էին հավաքում, մարտական գործողություններ էին կատարում։ Վերջին պատերազմը 2020 թ. 44 օրյան եղավ, ինչպես նաև՝ բոլոր այն սադրանքները, որ դրանից հետո իրականացրին Հայաստանում և Արցախում։ Առաջին պատերազմի ընթացքում Արցախին հաջողվեց ինքնակազմակերպվել և ինքնապաշտպանության կոմիտե ստեղծել, որը հեռագայում վերածվեց Պաշտպանության բանակի»։

Սեյրան Օհանյանը հիշեցնում է՝ Պաշտպանության բանակը ձևավորվել է Արցախի ժողովրդի իրավունքը պաշտպանելու համար։ Արցախի Հանրապետության ինքնորոշումն օրինական գործընթաց է, ընդ որում՝ հաստատված ժողովրդական հանրաքվեով և նրա կազմում Պաշտպանության բանակի ձևավորումը, նույնպես, օրինական գործընթաց է. «Այնինչ, այսօր միջազգային ագրեսորն ու հանցագործն իր հանցագործի պիտակն ուզում է հայ ժողովրդի, Արցախի և Հայաստանի վրա կպցնել։ Այս շրջանակներում նրանց գործողություններից մեկն էլ՝ հետապնդելն է այն մարդկանց, ովքեր պետական և ռազմական կառավարման, ինչպես նաև՝ պաշտպանության մեջ իրենց մասնակցությունն ու դերակատարումն են ունեցել»։

Այս ամենը՝ սկսած անցակետից, որն ադրբեջանական կողմը տեղակայել է Արցախի սահմանին ՝ Հակարիի կամրջի հարևանությամբ, բոլորն անօրինական են, ընդգծում է Սեյրան Օհանյանն ու հավելում՝ ապօրինի են նաև այն ձերբակալությունները, որոնք այսօր ադրբեջանական կողմն իրականացնում է։

Հարցին՝ հնարավո՞ր է արդյո՞ք, այսպես կոչված, Խաղաղության պայմանագրի ստորագրումով, Ադրբեջանն իրեն իրավունք վերապահի հայկական կողմից պահանջելու նաև ռազմական և քաղաքական այն գործիչներին, ովքեր գտնվում են Հայաստանի Հանրապետության տարածքում, Պաշտպանության նախկին նախարարն ասում է՝ հավանականորեն ստորագրվելիք փաստաթղթի բովանդակությանն ինքը ծանոթ չէ, սակայն, բանակցային գործընթացի փորձը, որ մինչ այսօր տեղի է ունեցել՝ հայաստանյան օրվա իշխանությունների մասնակցությամբ, ինչպես նաև՝ Փաշինյան – Ալիև հարաբերությունների և հանդիպումների ընթացքը ցույց են տվել, որ Հայաստանն, ի դեմս օրվա իշխանությունների, ամեն անգամ մի նոր ստորացուցիչ փոխզիջման է գնում. «Պրահայում ստորագրված համաձայնության արդյունքում է, որ ճանաչելով Արցախն Ադրբեջանի կազմում, թույլ տրվեց իրականություն դարձնել այն, ինչին ականտես ենք լինում այս օրերին՝ Արցախում։ Հետևաբար, եթե հայաստանյան օրվա իշխանությունների լուռ համաձայնությամբ Արցախի սահմանից մարդիկ են գերեվարվում, պարզ է, որ կարող են լինել նաև համաձայնություններ՝ հետագայում ինչ – որ անձանց տալ նաև Հայաստանի Հանրապետությունից։ Այս իշխանություններից ամեն ինչ սպասելի է։ Սակայն, այստեղ ուզում եմ ասել՝ ռազմական հանցագործներն Ադրբեջանի ռազմաքաղաքական կառավարման կազմում ներգրավված մարդիկ են, ինչպես նաև՝ Ադրբեջանի իշխանության ղեկավարը, ովքեր իրենց ողջ գոյության ընթացքում մշտապես տարատեսակ սադրանքներ են սանձազերծել Արցախի նկատմամբ, այդ թվում նաև՝ պատերազմներ և մարտական գործողություններ, իսկ Արցախն օրինական կերպով ինքնակազմակերպվել և ձևավորել է իր ինքնապաշտպանության համակարգը»։

Ամփոփելով զրույցը Սեյրան Օհանյանն ասում է՝ վերոհիշյալ ճշմարտության հետ հաշվի նստելու համար, պետական ողջ համակարգում պետք է համապատասխան աշխատանքներ տարվեն՝ վեր հանելով այն հանցագործությունները, որոնք կատարվել են Ադրբեջանի կողմից, իսկ Ադրբեջանի ղեկավարությունն, ինչպես տարբեր երկրների ղեկավարներ, պետք է այդ պատասխանատվությունը կրեն։

Աղբյուր` Փաստինֆո