Փաստ ինֆո

Արցախից Հայաստան գաղթելու ճանապարհին մահվան դեպքեր են գրանցվել։ Գորիսում տեղի ունեցած ճեպազրույցում այս մասին հայտնել է ՀՀ առողջապահության նախարար Անահիտ Ավանեսյանը։

«Ցավոք սրտի, նման դեպքեր էլ կան։ Մարդիկ 40 ժամից ավելի ճանապարհին են եղել, և այդ ընթացքում գրանցվել են մահեր՝ ինսուլտից, մեծահասակ մարդկանց մահ»,- նշել է նա:

Նախարարի փոխանցմամբ՝ բռնի տեղահանված մեր հայրենակիցները գտնվում են բավական ծանր առողջական վիճակում։ «10 ամիս լինել շրջափակման մեջ, հիմնականում թերսնված, երկար ժամանակ խրոնիկ հիվանդությունների համար դեղորայք չունենալով, դրա համար իրենց համար շատ կարևոր է հենց առաջին կետում նրանց առաջին բուժօգնության տրամադրումը»,- ասել է Ավանեսյանը՝ նշելով, որ նախնական զննումից հետո բոլոր նրանք, որոնք հոսպիտալացման կարիք ունեն, շտապօգնության մեքենաներով տեղափոխում են արդեն հիվանդանոցային բուժօգնության ։

Նա միաժամանակ կարեւորել է, որ տեղահանված քաղաքացիները գրանցվեն իրենց նոր բնակության վայրի պոլիկլինիականերում՝ հետագա բուժծառայություններից օգտվելու համար։

Ինչ վերաբերում է Ասկերան-Ստեփանակերտ ճանապարհին վառելիքի պահեստում տեղի ունեցած պայթյունից տուժած մեր հայրենակիցներին՝ Ավանեսյանը նշել է, որ ընդհանուր առմամբ 140-ից ավելի պացիենտներ տեղափոխվել էին ԲԿ-ներ միայն այրվածքներով. «Պայթյունից տուժածների առումով հիմնական ծանր ընթացքը դեռ շարունակվում է։ Ունենք ծայրահեղ ծանր վիճակում պացիենտներ, և բժիշկները պայքարում են նրանց կյանքի համար: Գիտեք, որ այրվածքները երկար վերականգնման շրջան են ունենալու, և այդ ամբողջ ընթացքը մենք նաև պլաստիկ վիրաբույժների և այլ անհրաժեշտ մասնագետների օգնությամբ ապահովելու ենք»:

Աղբյուր` Փաստինֆո