Փաստ ինֆո

Իշխանություն ասվածը վերջին տարիներին շատ հարաբերական բան է դարձել Հայաստանում։ Պետք է շեշտվի, որ սրանք թուրք – ադրբեջանական դրածոներ են և կամակատարը՝ Թուրքիայի և Ադրբեջանի։ Ուրիշ որևէ այլ տրամաբանական բացատրություն, քան սա է, ես չեմ կարող տալ, թե ինչո՞ւ են, օրինակ, սրանք, ողջ պետական համակարգով մեկ լռում, երբ այսօր Արցախում բռնի տեղահանություն է իրականացվում, երբ 44 օրյա ողբերգական և արյունալի պատերազմի տարելիցն է, երբ տեղի են ունենում աղմկահարույց ձերբակալություններ՝ Ադրբեջանի կողմից։ «Փաստինֆո» լրատվականի հետ զրույցում ասում է ադրբեջանագետ Գառնիկ Դավթյանը՝ մեկնաբանելով, թե ինչո՞ւ այսօր պետական համակարգից ոչ մեկ չհիշեց և չհիշատակեց 44 օրյա պատերազմի տարելիցը։

Բանախոսը նկատում է՝ օրվա իշխանությունների այս տոտալ լռելյանությունն առաջին հերթին, իհարկե, բխում է թուրք – ադրբեջանական տանդեմի շահերից։ Երկրորդ հերթին՝ այս լռությունը ձեռնտու է նաև միջազգային հանրությանը, որը նրանց հնարավորություն է տալիս՝ պատշաճ կարգով չարձագանքել Արցախում տեղի ունեցողին։

Գառնիկ Դավթյանը հիշեցնում է՝ ՀՀ Անկախության հռչակագրով ամրագրված է, որ Հայաստանի Հանրապետության ձևավորման հիմքում դրված է Արցախի ինքնորաշման իրավունքի և Ցեղասպանության միջազգային ճանաչման հարցը, հետևաբար, քանի դեռ Արցախի հիմնախնդիրն այլևս ակտուալ չէ և մոտակա ապագայում չկա Արցախը նորից վերապրելու հավանականություն, ապա հայաստանյան օրվա իշխանություններին, հավանաբար, թվում է, թե չկա դրան անդրադառնալու որևէ պատճառ, ընդհուպ մինչև անգամ, եթե խոսքը բռնի տեղահանման, ցեղասպանական գործողությունների կամ արյունալի պատերազմի տարելիցի մասին է.«Եվ փոխանակ մեզ համար այսքան զգայուն, ցավալի և կարևոր օրերին այս իշխանությունները ցույց տան, որ պետությունն իր զինվորի կողքին է, աջակցում և ոգևորում է նրան կամ այն ծնողներին, ովքեր այդ պատերազմում իրենց զավակներին են կորցրել, սրանք լռելյայն իրենց համաձայնությունն են տալիս, որ այդ պատերազմն արվել է հանուն Ադրբեջանի»,- ամփոփելով զրույցն ասում է ադրբեջանագետ Գառնիկ Դավթյանը։

Հիշեցնենք, որ այսօր լրանում է 44 օրյա ողբերգական պատերազմի երրորդ տարելիցը, սակայն, հայաստանյան օրվա իշխանությունների քար լռության ներքո մոռացության մատնվեց, չհիշատակվեց որևէ պետական կառույցի կամ գերատեսչության մակարդակով։

Աղբյուր` Փաստինֆո