Փաստ ինֆո

2020-ի սեպտեմբերի 27-ը հայ ժողովրդի պատմության ամենաարյունալի էջերից է, որը գլխիվայր շուռ տվեց հայ ժողովրդի կյանքը: Այս մասին «Եռաբլուր» պանթեոնում լրագրողների հետ զրույցում ասաց 44-օրյա պատերազմում զոհված Արցախի հերոս Ալեն Մարգարյանի մայրը՝ Նազելի Տերտերյանը:

«Ես վստահ եմ, որ յուրաքանչյուր ադեկվատ քաղաքացի, ով խղճի գեթ մի կաթիլ ունի իր մեջ, չի կարող անտարբեր մնալ այս տառապանքի նկատմամբ, որն արդեն երեք տարի մեր ընտանիքների ուղեկիցն է դարձել, որը մեր գիտակցության, ենթագիտակցության մեջ է, որը հավետ խաթարել է մեր երեխաների աչքերի լույսը:

Ես չեմ ուզում առանձնացնել Հայաստան եւ Արցախ, ինձ համար որպես կին, մայր, և մարդ ընդհանրապես, առաջնայինը մարդ արժեքն է: Այսօր կանգնած ենք ազգային գոյապահպանման խնդրի առջև, դրանում հավասարաչափ մեղավոր են բոլորը՝ առանց բացառության, հներն ու նորերը միասին, ձեռք ձեռքի տված: Ամենաստորին օղակում գտնվող պաշտոնյայից մինչև ամենավերին օղակում կանգնածը: Հավասարաչափ հանցագործ են բոլոր նրանք, որոնք տարիների ընթացքում ունեին այդ հնարավորությունը Արցախի հարցին իրավական կարգավիճակ տալու, սակայն հանցավոր անտարբերությամբ, անփութությամբ, մեծամտությամբ այդ հարցը մղեցին չգիտեմ որերորդ պլան: Եվ հավասարաչափ մեղավոր են նորերը, որոնք գալով իշխանության, խոստումներ տալով, դարձյալ հարցին լուծում չտվեցին, ու դեռ ավելին՝ մեր լուսավոր զավակներին դատապարտեցին մահվան»:

Նա պատմեց, որ երբ պատերազմի գուժը եկավ, իրենք Արցախում էին. «Եվ Արցախի հերոս Ալեն Մարգարյանը այնքան փայլուն էր իրեն դրսևորել իրեն այդ կարճ ժամանակահատվածում, որ հրամանատարությունը թույլ էր տվել տեսակցել մեզ հետ: Այսօրը, ժամը 6.40-ին ես իմ ձեռքով արել եմ վերջին լուսանկարը, որտեղ նշված էր Ադրբեջան: Ես հարց եմ ուզում տալ բոլոր հներին ու նորերին. Եթե այս տարածքն աշխարհի համար համարվում էր Ադրբեջանի մաս, ինչով էիք զբաղված դուք տարիներ շարունակ ու մինչև այսօր, որ ամբողջ մոլորակի համար այն Ադրբեջան էր: Տվեք իմ պարզագույն հարցի պատասխանը. Ի՞նչ գործ ունեին մեր զավակները Ադրբեջանի մաս համարվող տարածքում: Ո՞ր բարոյական իրավունքով էիք տարիներ շարունակ մեր երիտասարդ զավակների արյունը հեղում այդ հողի վրա: Այս հարցը տարիներ շարունակ հուզում է ինձ ու ինձ նման որդեկորույս ծնողներին»։

Աղբյուր` Փաստինֆո