Փաստ ինֆո

Գեղարքունիքում ազատ կացարանների, տների բավական մեծ բազա ունենք, արցախցիների բավական մեծ հոսք ենք սպասում, վստահ ենք, որ կարողանալու ենք նրանց ապահովել կացարաններով։ Այս մասին «Փաստինֆոյի» հետ զրույցում ասաց Գեղարքունիքի մարզպետ Կարեն Սարգսյանը։

Նա նշեց, որ անվտանգային հարցերով պայմանավորված՝ չի կարող հստակ թիվ նշել, թե քանի կացարան են առանձնացրել, ինչպես նաև թե քանի արցախցի է այս պահին արդեն Գեղարքունհիք տեղափոխվել։

Հարցին, թե արդյոք հիմնականում սահմանհամերձ համայնքերում են տեղավորում տեղահանված արցախցիներին՝ նա պատասխանեց, որ ոչ միայն։

«Բոլոր համայնքերում կացարաններ առանձնացված են, սահմանամերձ բնակավայրերում քիչ քանակությամբ են ազատ կացարանները։

Այսինքն, չենք կենտրոնացել որևէ բնակավայրի վրա։ Առաջին հերթին հաշվի ենք առնում մարդկանց սոցիալական վիճակը, ցանկությունները, փորձում ենք իրենց կարծիքն հաշվի առնելով գործընթացը կազմակերպել»։

Գեղամասարի նախկին համայնքապետ, Սոթքի բնակիչ Հակոբ Ավետյանն ասաց, որ այս պահին դեռ Սոթք տեղահանվածների չեն տեղափոխել։ «Առայժմ բերում են Վարդենիս, տեղավորում են մշակույթի տանը, հետո արդեն առանձին տներ են տանելու համայնքներում։

Սոթքում շատ չկա ազատ տուն, բայց որքան էլ կա՝ առաջարկել ենք, 2 տուն էլ ես ունեմ, ճիշտ է՝ հին տներ են ու այնքան էլ լավ պայմաններում չեն, պետք է մաքրվի կարգի բերվի, բայց ես ամեն դեպքում պատրաստ եմ տրամադրել»։

Նա նշեց, որ Գեղարքունիք հիմնականում նախընտրում են գալ մարդիկ, ովքեր այդտեղի բնակիչներ էին։ «Գալիս են ավելի շատ նրանք, ովքեր այստեղից գնացել էին Քարվաճառ ապրելու, հիմա նրանք այստեղ հարազատներ ու բարեկամներ ունեն։ Շատերը, որ գալիս են՝ արդեն տեղ ունեն մնալու, նրանց այստեղ արդեն բարեկամները դիմավորում են, Սոթքից էլ այդպիսի մարդիկ կան, որ նախկինում գնացել էին, հիմա էլ հետ են գալիս»։

Աղբյուր` Փաստինֆո