Փաստ ինֆո

Երևանի նախկին քաղաքապետ Ալբերտ Բազեյանին կալանավորելու որոշման դեմ բողոք կներկայացվի։ Այս մասին «Փաստինֆո»-ի հետ զրույցում ասաց Ալբերտ Բազեյանի պաշտպան Գեորգի Մելիքյանը։

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Մարտին Արզումանյանի նախագահությամբ, բավարարել է Բազեյանի նկատմամբ կալանավորումը որպես խափանման միջոց ընտրելու մասին միջնորդությունը։

Նա ձերբակալվել, ապա՝ կալանավորվել է իշխանությունն իբրև յուրացնելու նախպատրաստման վերաբերյալ քրեական վարույթի շրջանակներում։ Նրանից բացի ձերբակալվել է ևս յոթ անձ։

Բազեյանի պաշտպան Գեորգի Մելիքյանը «Փաստինֆո»-ի հետ զրույցում հայտնեց, որ դատարանը հիմնավոր է համարել հիմնավոր կասկածի առկայությունն այն դեպքում, երբ նման ապացույցներ չեն եղել։

«Ընդամենը մեկ անձի ցուցմունք է դրվել, որը ուղղակի ձևով որևէ կերպ չի փաստել, այլ ընդամենը նշել է, որ այսինչից լսել է, որ «Ալբերտ Բազեյանն է այդ ամենը ղեկավարել, բայց մանրամասնեը չգիտեմ, թե ինչ են խոսել»։ Ոչ ունեն ապացույց, որ Ալբերտ Բազեյանն այդ անձի հետ ընդհանրապես հանդիպել է, ոչինչ, ավելին, ունենք ապացույց, որ օգոստոսի 8-ից Ալբերտ Բազեյանն այդ միջանկյալ անձին հեռացրել է Խորհրդից, մինչդեռ, ասում են, թե իբրև սեպտեմբերին հանդիպում են ունեցել։ Ոչ ապացույց ունեն, որ հանդիպում են ունեցել, ոչ ապացույց ունեն, որ խոսել են, ոչ մի ապացույց չունեն, բայց կալանքը տվեցին»,- նշեց Մելիքյանը։

Դիտարկմանը, որ այս գործը «հիշեցնում է» 2020թ. նոյեմբերի 9-ին կապիտուլյացիոն ակտի ստորագրմանը հաջորդած ակցիաների ընթացքում զանգվածային ձերբակալությունները և այդ օրերին հարուցված՝ Արթուր Վանեցյանի, Աշոտ Մինասյանի և մյուսների վերաբերյալ քրեական գործը՝ իբրև Փաշինյանի սպանության, իշխանության յուրացման նախապատրաստման վերաբերյալ, որը հետագայում կարճվեց հենց ԱԱԾ-ի կողմից՝ արդարացման հիմքով, Մելիքյանն արձագանքեց՝ նշելով․ «Ես այդ գործի մանրամասներին ծանոթ չեմ։ Բայց ամենամեծ կապիկությունը, որն իսկապես այլկերպ չես կարող բնութագրել, այն է՝ իրար հետ խոսում են, թե իբրև խումբ է կազմվել, իբրև հեղաշրջումը պետք է սեպտեմբերի 22-ին տեղի ունենար, պետք է իշխանությունը զավթեին, գային ընդամենը վեց հոգով, ֆիզիկական ներգործությամբ ճեղքեին կառավարության շենքի դիմաց կանգնած ոստիկանների պատնեշը, մտնեին ներս, Նիկոլին հեռացնեին իր պոստից, ֆիզիկապես ոչնչացնեին, իհարկե, ցուցմունքով ոչնչացնել չէր, հայհոյանք էր՝ «մաման ․․․», և, իշխանազավթումը պետք է դա լիներ իբրև, մինչդեռ, Ալբերտ Բազեյանն իր տանն էր՝ մինչև սեպտեմբերի 23-ը, կառավարության շենքի վրա այդ օրը հարձակում չի էլ եղել։ Սա ինչ կապիկություն-հեքիաթ էր, անձին մեղադրում եք մի բանում, որն ընդհանրապես տեղի չի ունեցել այդ օրը, ընդամենն ասեկոսե-խոսակցություն էր, ընդ որում, ցուցմունքով անձը նշում է, որ տեղյակ չէ մանրամասներից։ Նման աբսուրդ մեղադրանք է »։ Նշված ցուցմունքը տված անձի հետ Ալբերտ Բազեյանը դեռևս չի առերեսվել, թեև պաշտպանության կողմը պահանջել է։ Մեղադրանքում այլ տվյալներ, օրինակ, ՕՀՄ-ներ, առկա չեն, համենայն դեպս, պաշտպանության կողմին դա հայտնի չէ։ Իր նկատմամբ քրեական հետապնդումը Ալբերտ Բազեյանը քաղաքական է համարում՝ թիրախավորված։

«Այսինքն, իրենք թիրախավորված ընտրում են անձանց, որոնք ունեն հակաիշխանական հայացքներ, բոլորին նման ապօրինի մեղադրանքներ ստեղծագործելով ընդամենը մեկուսացնում են»,- ասաց փաստաբանը։

Ինչ վերաբերում է Ալբերտ Բազեյանի տանը հայտնաբերված զենքերին, ապա փաստաբանը նշեց, որ դրանք բոլորն օրինական զենքեր են՝ պարգևատրված, այդ թվում, Վազգեն Սարգսյանի կողմից պարգևատրված զենքեր։

Հեղինակ՝ Իզաբել Սահակյան

Աղբյուր` Փաստինֆո