Փաստ ինֆո

 Ալբերտ Բազեյանը կալանավորվեց՝ 2 ամսով: «Փաստինֆո»-ն տեղեկացավ, որ Երևանի ընդհանուր իրավասության դատարանը՝ դատավոր Մարտին Արզումանյանի նախագահությամբ, բավարարել է Բազեյանի նկատմամբ կալանավորումը որպես խափանման միջոց ընտրելու մասին միջնորդությունն ամբողջությամբ։

Հիշեցնենք՝ սեպտեմբերի 23-ին ձերբակալվել էր ենթարկվել «Երկրապահ» պատգամավորական նախկին խմբի ղեկավար, ԵԿՄ նախկին փոխնախագահ Ալբերտ Բազեյանը՝ իբրև իշխանության զավթման վերաբերյալ քրեական վարույթի շրջանակներում։

Ըստ ԱԱԾ-ի՝ «Խաչակիրներ ռազամահայրենասիրական» ՀԿ անդամներ՝ Ս.Խ-ն, Կ.Դ-ն, Դ.Տ-ն, Վ. Մ-ն, Մ.Մ-ն, Գ.Ն-ն, Ա.Հ-ն, ինչպես նաև Ա.Բ-ն, և այլ անձինք, ունենալով հակաիշխանական հայացքներ, ՀՀ կառավարության անդամների և ղեկավարի նկատմամբ՝ գաղափարական թշնամանք, նախնական համաձայնության գալով միմյանց հետ, պայմանավորվածություններ են ձեռք բերել իրենց մոտ պահվող զենք-զինամթերքը որպես հանցագործության գործիք  օգտագործելու միջոցով կյանքի կամ առողջության համար վտանգավոր բռնություն գործադրելու եղանակով և դրա սպառնալիքով զավթելու իշխանությունը, մասնավորապես՝ Սահմանադրությամբ չնախատեսված այլ եղանակով տիրանալ Հայաստանի Հանրապետության կառավարության լիազորություններին: Քրեական վարույթի շրջանակներում ութ անձ է ձերբակալվել, նրանց մեղադրանք է ներկայացվել՝ ՀՀ քրեական օրենսգրքի 43-419-րդ հոդվածի 1-ին մասով։

Հատկանշական է, որ այս գործը «հիշեցնում է» 2020թ. նոյեմբերի 9-ին կապիտուլյացիոն ակտի ստորագրմանը հաջորդած ակցիաների ընթացքում զանգվածային ձերբակալությունները և այդ օրերին հարուցված՝ Արթուր Վանեցյանի, Աշոտ Մինասյանի և մյուսների վերաբերյալ քրեական գործը՝ իբրև Փաշինյանի սպանության նախապատրաստման վերաբերյալ։ Քրեական գործը, իհարկե, կարճվեց հետագայում՝ հենց ԱԱԾ-ի կողմից։ Փաստացի, այս դեպքում ևս նույն ձեռագրի հետ գործ ունենք։

Ի. Ս.

Աղբյուր` Փաստինֆո