Փաստ ինֆո

Այս օրերին տեսնում ենք այն, ինչը մեր սերունդը կարդացել էր միայն գրքերում. հազարավոր հայեր բռնել են գաղթի ճանապարհը, փլվում է հայկական երկրորդ պետությունը։ «Փաստինֆոն» զրուցել է Փաստաբանների ակադեմիայի ռեկտոր Արա Զոհրաբյանի հետ։

 - Պարոն Զոհրաբյան, այն ինչ հիմա կատարվում է արցախցիների հետ, արդյո՞ք կարելի է բնորոշել որպես ցեղասպանություն։

-  Այո, ադրբեջանական իշխանության կազմակերպած այս գործընթացը տեղավորվում է «Ցեղասպանության հանցագործությունը կանխարգելելու և  պատժելու մասին» Կոնվենցիայի 2-րդ հոդվածում նշված միջազգային հանցագործության սահմանման ներքո: Ըստ այդ կոնվենցիայի՝ ցեղասպանություն է նշանակում նաև հետևյալ գործողություններից ցանկացածը՝ կատարված ազգային, էթնիկական, ցեղական կամ կրոնական որևէ խմբի, որպես այդպիսին, լրիվ կամ մասնակի ոչնչացման մտադրությամբ,  (գ) որևէ խմբի համար կյանքի այնպիսի պայմանների միտումնավոր ստեղծումը, որոնք ուղղված են նրա լրիվ կամ մասնակի ֆիզիկական ոչնչացմանը:

- Եթե արձանագրում ենք, որ սա Ցեղասպանություն է, ապա արդյո՞ք սա հիմք չէ և հնարավորություն չէ Արցախի ինքնորոշման իրավունքը միջազգային նաև իրավական մեխանիզմներով առաջ մղելու համար:

-  Այո, հիմք է: Ավելին, 2023թ. հունվարի 9-ին պաշտոնապես դիմել ենք կառավարությանը պահանջելով ՄԱԿ-ի Արդարադատության միջազգային դատարան հայց ներկայացնել Ադրբեջանի դեմ՝ նաև «Ցեղասպանության հանցագործությունը կանխարգելելու և պատժելու մասին» Կոնվենցիայի շրջանակում, որը չարեց: Եթե հիշում եք կառավարությունը միայն խտրականության արգելքի թեմայով էր հայց ներկայացրել:

-Որքանով այս իրավիճակում կարևոր է տեղում փաստագրում իրականացնելը։ Այս պահին  միջազգային ու տեղական լրատվամիջոցներ չեն կարողանում աշխատատել Գորիսում, ուր ժամանում են  արցախցիները։

-  Շատ կարևոր են բոլոր փաստագրումները, այդ թվում՝ բռնի տեղահանման հետ կապված: Փաստաբաններով արդեն հավաքում ենք ապացույցներ ադրբեջանցիների վայրագությունների վերաբերյալ: Ունենք մի քանի տեսանյութեր: Պետք է ամբողջացնենք, որ ուղարկենք միջազգային կառույցներին, դեսպանատներին: Մի բան չպետք է մոռանանք: Այդ թուրքը չի փոխվել: 100 տարի առաջ մորթում էր, ականջ էր կտրում, հիմա էլ նույնն է անում:

-  Ձեր գնահատմամբ՝ ինչու է խոչընդոտվում լրատվամիջոցների և միջազգային կառույցների աշխատանքը:

-  Լրագրողների գործունեությունը խոչընդոտելը հանցագործություն է: Լրագրողների աշխատանքների խոչընդոտումը ձեռնտու է միայն թուրք-ադրբեջանական տանդեմին:

Աղբյուր` Փաստինֆո