Փաստ ինֆո

Նման վարքագիծ, որ դրսևորում է Նիկոլ Փաշինյանը, դրսևորում են պետություն չունեցող ժողովուրդները կամ օտարի խնամալակությանը հանձնված համայնքները, որոնք բոլոր դժբախտությունների պատճառներն իրենցից դուրս են փնտրում,-«Փաստինֆո» լրատվականի հետ զրույցում ասում է քաղաքագետ Սուրեն Սուրենյանցը՝ մեկնաբանելով ՀՀ-ում վարչապետ աշխատող Նիկոլ Փաշինյանի հայտարարություններն առ այն, թե Արցախում ստեղծված իրավիճակի և ՀՀ-ում բողոքի ակցիաների հիմնական մեղավորը Ռուսաստամի Դաշնությունն է։

Աշխարհի ոչ մի երկրի կառավարություն, այդ թվում՝ դաշնակից երկրի կառավարություն՝ ո՛չ բարոյական, ո՛չ քաղաքական հարթության մեջ, մեր շահերը պաշտպանելու պարտավորություն չունի, ասում է Սուրեն Սուրենյանցն ու հավելում. «Հայկական շահերի պաշտպանությամբ զբաղվելու գործառույթ ունի միայն այն ինստիտուտը, որը ժողովրդի քվեով իշխանություն է ստանձնել։ Հետևաբար, այս իշխանության խնդիրը ոչ թե պատասխանատվությունը սրա – նրա վրա գցելն ու թշնամիների թիվն ավելացնելն է, այլ սեփական սխալներն ու բացթողումները հասկանալով՝ այնպես անել, որ սեփական օրակարգի շուրջ առավել մեծ թվով դաշնակիցներ ներգրավի, թեև ես չեմ կարծում, թե Նիկոլ Փաշինյանն ընդունակ է սեփական սխալները գիտակցել»։

Վերլուծելով Փաշինյանի՝ նախօրեին ունեցած ելույթը, որտեղ վերջինս մեղադրանքի սլաքներն էր ուղղել Ռուսաստանի Դաշնությանը, Սուրեն Սուրենցյանցը նկատում է՝ փաստորեն, ստացվում է, որ 5 տարին բավարար չի եղել, որպեսզի այդ մարդը պետական գործիչ դառնա. «Փաշինյանը հեղափոխականի իր կերպարից այդպես էլ դուրս չեկավ, նա չհրաժարվեց իր համար թշնամիների կերպարներ ստեղծելուց ու դրանց դեմ պայքարելու իր արատավոր սովորությունից։ Եվ, եթե թշնամիների դերում սկզբում ՀՀ նախկին նախագահներն էին, օլիգարխները, հետո բանակը, Արցախը, հիմա էլ՝ Ռուսաստանի Դաշնությունն է։ Ես ոչ թե վարկած եմ առաջ քաշում, այլ պնդում եմ անում՝ մի քանի ամիս անց, Փաշինյանն Արևմուտքին է գամելու անարգանքի սյունին՝ ասելով, թե խոստումներ է տվել ու չի կատարել»։

Քաղաքագետն ասում է՝ մենք ձախողված պետության ենք վերածվել ու սա խիստ վտանգավոր վիճակ է. «Երկրում հիմա շատ խորքային ճգնաժամ է ստեղծվել, որը պետության հիմադրույթների պասիվ ճգնաժամի է վերաճում։ Որովհետև մեզ չի հաջողվում պետության ներսում որևէ ֆունդամենտալ հարցի շուրջ կոնսենսուսի գալ, սա հղի է ծայրահեղ անցանկալի հետևանքներով։ Տպավորություն է, որ մենք խոսում ենք նույն բանի մասին, բայց տարբեր լեզուներով։ Եվ սա այն պատճառով, որ պետության ղեկին գտնվում է մի մարդ, ով երկրի ներսում խրամատներ փորելն իր իշխանությունն ամրապնդելու միակ միջոցն է համարում։ Հիմա էլ նա որոշել է ողջ երկիրը պլացդարմի վերածել՝ Ռուսաստանի Դաշնության դեմ։ Գիտե՞ք՝ Ռուսաստանը լավ բարեկամ չի, բայց սարսափելի թշնամի կարող է լինել»,-ամփոփելով զրույցն ասում է Սուրեն Սուրենյանցը։

Աղբյուր` Փաստինֆո