Փաստ ինֆո

Արցախում աղետի չափերը պատկերացնել այստեղ' Երեւանում գտնվելով, անհնարին է։ Թուրքաադրբեջանական հրոսակների երախում հայտնված հազարավոր մեր հայրենակիցներ մինչև հիմա հարազատներից որեւէ լուր չունեն։

Արկերի տարափի տակ իրենց տներից սարսափահար դուրս եկած ու հրաշքով փրկված հարյուրավոր ընտանիքներ մնալու տեղ չունեն...

«Տեղահանվածներին տեղավորելու ուղղությամբ որոշակի աշխատանքներ են տարվում։ Նաեւ մարդիկ, որոնք հնարավորություն ունեն, իրենց մոտ տեղավորում են անտուն մնացածներին, կիսում իրենց ունեցածը, ձեռք մեկնում' ինչով կարող են։ Ով այգի ունի, բերքը հավաքում, բերում է կիսում մյուսների հետ»,- «Փաստինֆո»-ին Արցախից իրավիճակը ներկայացնում է Հովիկ Ավանեսովը։

Քաղցած ու անտուն մնացած արցախցիների համար Ստեփանակերտի մի քանի ռեստորանների տարածքում սննդի կետեր են բացվել։ Բազմաթիվ տեղահանվածներ էլ փողոցներում են փայտի վառարաններ դրել ու այդտեղ են ուտելու ինչ-որ բան պատրաստում։

«Բազմաբնակարան շենքերի բնակիչների մի մասին եւս փայտի վառարաններ են տրամադրվել, որպեսզի կենցաղային տարրական պայմանները գոնե բավարարեն»,- նշեց մեր զրուցակիցը։

Այդքանով հանդերձ, ամենաբարդն ու հրատապը վիրավորների տարհանման, զոհերի մարմինների դուրսբերման, անհետ կորածների հայտնաբերման հետ կապված խնդիրներն են։

Աղբյուր` Փաստինֆո