Փաստ ինֆո

Մետրոպոլիտենի ղեկավարությունը, ի վերջո, որոշ պարզաբանումներ է ներկայացրել այսօր մետրոյի փակ լինելու վերաբերյալ:

Նկատենք, որ դռները փակ են եղել վաղ առավոտից, ժամը 9:30-ի սահմաններում մետրոյի ֆեյսբուքյան էջում կարճ հաղորդագրություն հայտնվեց, թե այն այսօր փակ է լինելու` տեխնիկական խնդիրներով պայմանավորված` առանց որեւէ այլ պարզաբանում ներկայացնելու:

Սա առաջացրել էր քաղաքացիների դժգոհությունը, ինչին արձագանքելով մետրոպոլիտենը հավելյալ պարզաբանում է ներկայացրել.

«Երեկ արդեն իսկ տեղեկացրել էինք,որ ժամը 08:15-ի դրությամբ «Կարեն Դեմիրճյանի անվան Երևանի մետրոպոլիտեն» ՓԲԸ-ի «Սասունցի Դավիթ» կայարանից «Գործարանային» կայարան ուղեհատվածում տեղի էր ունեցել գնացքի տեխնիկական խափանում։

Դեպքի վայրում աշխատում էր ՆԳՆ ՓԾ փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական խումբը։

Մանրամասնել էինք նաև, որ վագոնի առջևի ձախակողմյան անիվը վնասվել էր և կիսով չափ դուրս էր եկել ռելսից։ Ամբողջ օրվա ընթացքում փրկարարները մետրոպոլիտենի մասնագետների հետ աշխատանքներ են իրականացրել՝ վագոնը ռելսերի վրա տեղափոխելու և բնականոն երթևեկությունն ապահովելու ուղղությամբ։

Հանրությանը իրազեկվել էր,որ ժամը 18:00-ի դրությամբ Երևանի մետրոպոլիտենի երթևեկությունն ամբողջ գծով վերականգնվել էր։

Հաշվի առնելով վերոնշյալը՝ մետրոպոլիտենի տնօրինությունը որոշեց այսօր դադարեցնել մետրոպոլիտենի աշխատանքները՝ բոլոր գնացքների տեխնիկական զննումն ապահովելու նպատակով»։

Սակայն այդպես էլ չկա պարզաբանում, թե երբ է այդ որոշումը կայացրել, եթե երեկ, ապա ինչու նախապես բնակիչները չեն ծանուցվել, իսկ եթե այսօր վաղ առավոտյան, ապա ինչն է եղել պատճառը, որ քնից չարթնացած որոշել են փակել:

Աղբյուր` Փաստինֆո