Փաստ ինֆո

ՀՀ ԱԺ նախագահ Ալեն Սիմոնյանը չի հերքել Արցախի Հանրապետության  ԱԺ նախագահ Դավթ Իշխանյանի հայտարարությունն առ այն, որ  Արցախի Հանրապետության Անվտանգության խորհրդի հայտարարության տեքստին Հայաստանի վարչապետ Նիկոլ Փաշինյանը նախօրոք ծանոթ է եղել:

Հիշեցնենք, որ Դ. Իշխանյանն այսօր, արձագանքելով Փաշինյանի հայտարարությանը, մասնավորապես ասել էր. «․․․ Ադրբեջանի կողմից սույն թվականի սեպտեմբերի 19-ին իրականացված ռազմական գործողությունների առաջին իսկ պահից ՀՀ վարչապետը տեղյակ է եղել բոլոր գործընթացներից և զարգացումներից: Առավել դրան, զինադադարի գին հանդիսացող Արցախի Հանրապետության Անվտանգության խորհրդի հայտարարությունը քննարկման նյութ է, եղել և հայտարարության տեքստային տարբերակին նախօրոք ծանոթ են եղել ՀՀ պատասխանատու շրջանակներ, այդ թվում` անձամբ ՀՀ վարչապետը»:

 ՀՀ ԱԺ նախագահ Ալեն Սիմոնյանը հանրայինի եթերում խոստովանել է, որ հայտարարության բովանդակությանը նախապես ծանոթ են եղել։  

«Իհարկե, մեզ տեղյակ են պահել, բայց որևէ մասնակցություն Երևանից չի եղել, նույնիսկ խորհուրդ չենք տվել։ Այն փաստաթուղթը, որի մասին պարոն Իշխանյանը խոսել է, մենք տեսել ենք, և միակ զանգն ու խոսակցությունը, որը տեղի է ունեցել վարչապետի կողմից, այն արտահայտությունն է եղել, որ մեզ համար մտահոգիչ ու անընդունելի է, որ այդ փաստաթղթում նշված է՝ Հայաստանի Հանրապետության զինված ուժեր։ Վարչապետն ասել է, որ դա մեզ համար անընդունելի է, այնտեղից էլ պատասխան է հնչել, որ մենք այս փաստաթուղթը չենք ստորագրում, այն հայտարարություն է լինելու։ Բայց փաստաթուղթը մեզ հետ չի համաձայնեցվել, մեր կողմից չի հաստատվել, նույնիսկ խորհուրդ չենք տվել»,- ասաց Սիմոնյանը՝ հավելելով, որ նույնը եղել է նաև Արցախի նախագահի ընտրության հետ կապված հարցում»,- ասել է Ալեն Սիմոնյանն ու ավելացրել, թե «նաև նախագահի ընտրության հետ կապված որոշմանը չենք մասնակցել, որովհետև Ադրբեջանը դրա մասին բաց խոսել էր, որ նախագահի ընտրությունը իրենց համար բավականին ծանր և սադրիչ գործողություն է։  

Աղբյուր` Փաստինֆո