Փաստ ինֆո

Փաշինյանի հայտարարությունը պայմանավորված էր վախով, որ Արցախում զարգացող իրողությունները ուղիղ հարվածելու են այստեղ՝ իր աթոռին։ Եթե Արցախում էթնիկ զտում է տեղի ունենում, իսկ այն, փաստացի, հիմա արդեն ընթացքի մեջ է, ապա, պարզ է, որ Նիկոլ Փաշինյանը պետք է վախեր ունենա։ ՄԱԿ-ի նիստում Բայրամով, իհարկե, ի օգուտ Սդրբեջանի օգտագործեց այդ արտահայտությունը, ինչն անսպասելի չէր, այդպես էլ պետք է լիներ,- «Փաստինֆո» լրատվականի հետ զրույցում ասում է «Բարգավաճ Հայաստան» կուսակցության ՔԽ անդամ Արման Աբովյանը ։

Հիշեցնենք՝ երեկ ՄԱԿ-ի անվտանգության խորհրդի նիստում, հակադարձելով ՀՀ ԱԳՆ Արարատ Միրզոյանի ելույթին, Ադրբեջանի ԱԳՆ Ջ. Բայրամովը հայտարարեց, թե հայկական պատվիրակությունը հիմնազուրկ մեղադրանքներ է ուղղում Ադրբեջանի հասցեին, իր խոսքում հղում տալով ՀՀ-ում վարչապետ աշխատող Նիկոլ Փաշինյանին. «Փաշինյանն ինքն է հայտարարում, որ Արցախում քաղաքացիական անձնանց նկատմամբ որևէ սպառնալիք չկա, և նրանց զանգվածային ոչնչացումների մասին պնդումները կեղծ են»,- ասել էր Բայրամովը։

Ինչ վերաբերում է Արարատ Միրզոյանի երեկ՝ ՄԱԿ-ում ունեցած ելույթին, ապա այն ճշգրիտ էր, ասում է Արման Աբովյանն ու հավելում. «Ցավում եմ շատ, որ թշնամի պետության Արտաքին գործերի նախարարը ՀՀ Արտաքին գործերի նախարարին հերքելու համար, մեջբերում է ՀՀ վարչապետ Նիկոլ Փաշինյանի խոսքերը և սա տեղի է ունենում միջազգային ամբիոնից։ Այստեղ մեկնաբանելու բան էլ չկա, պարզապես սա ցույց է տալիս իրավիճակի և պետական ապարատի նողկալիությունն ուղղակի, ինչպես նաև այն վախերը, որ իրանց մեջ կան։ Ցավալի է միայն, որ այդ վախերը վերադառնում են մեզ՝ ավելի մեծ մասշտաբների հասնող նվաստացումների և կորուստների տեսքով»,- ասում է բանախոսը։

Հարցին՝ կարո՞ղ էր արդյոք Փաշինյանի այս հայտարարությունն Ալիևի հետ հերթական պայմանավորվածության արդյունք լինել, Արման Աբովյանն ասում է՝ առանց փաստագրական հիմքերի չի կարող հաստատել կամ հերքել այս վարկածը, կարող է դատել միայն ընթացիկ գործընթացով, որն ասում է հետևյալը.«Ըստ էության, հայտարարությունն առ այն, թե հայերին Արցախում ոչինչ չի սպառնում, սպասարկում է միայն և միայն թուրք – ադրբեջանական տանդեմի հակահայկական շահերը»։

Խոսելով նաև Թուրքիայի նախագահ Ռ. Էրդողանի վերջին հայտարարություններից մեկի մասին, ըստ որի իրենց հիմնական նպատակը հիմա ոչ թե Արցախի հպատակեցումն է, այլ, այսպես կոչված, Զանգեզուրի միջանցքը, Արման Աբովյանն ասում է՝ իհարկե, կասկած չկա, որ թուրք – ադրբեջանկան տանդեմի հեռահար նպատակը հենց Սյունիքն է և այդ նպատակը միշտ է ակտուալ եղել նրանց համար, սակայն այստեղ կա մի նրբություն, որին անպայման պետք է ուշադիր լինել. «էրդողանն իր խոսքում ասած՝ համաձայն Հայաստանի խոստումի…Հիմա պետք է հասկանալ՝ ի՞նչ խոստումի մասին է խոսքը, ո՞վ է տվել այդ խոստումն ու ո՞վ այն պետք է իրականություն դարձնի։ Հավատացնում եմ՝ որքան էլ Էրդողանն անբռնազբոստ ֆաշիստ է, եթե նա այսպիսի հայտարարություններ է կատարում, ուրեմն ինքն իր ձեռքի տակ հստակ և իրական փաստեր ունի»։

Աղբյուր` Փաստինֆո