Փաստ ինֆո

Արցախահայությունը ցեղասպանվում է։ Արցախցի ուսանողներն այսօր վաղ առավոտից իրազեկման ակցիաներ են իրականացնում բուհերում՝ խնդրելով ուսանողներին միանալ, դասադուլ իրականացնել։

«Արցախը մեռնում է, այնտեղ 120 հազար հայերի ցեղասպանություն է տեղի ունենում, դուրս եկեք փողոց: Երեխաներ են զոհվել: Հայաստանը պետք է տեր կանգնի իր 120 հազար քաղաքացիներին»,-ասաց ակցիայի մասնակիցներից մեկը»,- ասաց ակցիայի մասնակիցներից մեկը:

Արցախցի երիտասարդներն առաջարկում են թև-թիկունք լինել, նշում են՝ առանձին չեն կարող, պետք է համախմբվել, այլապես, ցեղասպանվում են․ «Ամենածայրահեղ իրավիճակն է, որ կարող էր լինել։ Ձեր ընկերն եմ․ Ձեզ պես ուսանող եմ։ Ես չեմ ուզում, որ դուք էլ տեսնեք այն, ինչ ես եմ տեսել»։

Արցախցիներից մեկն էլ արցունքներն աչքերին հավելեց, որ այնքան անճար վիճակում են, որ պատրաստ են ծնկի իջնել, աղաչել իրենց միանալ։

«Ես մեղավոր չեմ, որ Արցախում եմ ծնվել, իմ գերեզմաններն այնտեղ են։ Մեր, ձեր կուրսեցիներն են այնտեղ զոհվել 44-օրյա պատերազմին, հիմա այդ Արցախը հանձնվում է, եթե անգամ հանձնվում է, թող պետությունն այնպես կազմակերպի, ժողովրդին տարհանի։ Ոչինչ չեն անում, հետո երգեր են երգելու, ասեն՝ վայ, Ղարաբաղի ժողովուրդը ցեղասպանվել է։ Չասեք՝ բան չենք կարող անել, կարող ենք։ 120,000 հիմա ցեղասպանվում է, 120,000 հայ հիմա պետք է լինի Հանրապետության Հրապարակում, պահանջի տեր կանգնել արցախահայությանը։ Ես Արցախի Հանրապետության քաղաքացի եմ, իմ արյունը ձեր արյունից է, ես չեմ պահանջում, ուղղակի աղաչում եմ՝ մի ապրեք այնպես, ասես ոչինչ չի կատարվում։ Կատարվում է, հայեր են ցեղասպանվում։ Հետո չերգեք Արցախի մասին, բանաձևեր չընդունեք։ Ուսանողներ եք, կարող եք իջնել հրապարակ, պահանջել իշխանություններից՝ տեր կանգնել իրենց քաղաքացիներին»,- նշեց նա։

Աղբյուր` Փաստինֆո