Փաստ ինֆո

Ամբողջ նախընտրական քարոզարշավի ընթացքում կանխատեսել և հստակ ասել էի, որ «Քաղաքացիական պայմանագիր»-ը, նույնիսկ իր քաղաքական սատելիտների հետ միասին, չի կարող ստանալ 50 տոկոս + 1 ձայն, ինչպես որ եղավ։ Իմ շփումները՝ տարատեսակ խմբերի հետ, ինձ հանգեցրել էին այն համոզման, որ բողոքական էլէկտորատը չափազանց մեծ է, իսկ իշխանությունը պահպանվում է երկու գործոնի՝ արդյունավետ ընդդիմադիր հարթակի և օրակարգի բացակայության ու հայաստանյան օրվա իշխանության շուրջ առկա միջազգային կոնսենսուսի պատճառով,-«Փաստինֆո» լրատվականի հետ զրույցում ասում է քաղաքագետ Սուրեն Սուրենյանցը՝ վերլուծելով երեկ Երևանում անցկացված քաղաքային իշխանության ընտրությունները։

Բանախոսը հավելում է՝ արդեն կանխատեսել է՝ քաղաքապետի ընտրությունները երկրում քաղաքական ճգնաժամի են հանգեցնելու. «Անկախ նրանից՝ ի՞նչ մանիպուլացիաների կդիմի այս իշխանությունը կամ ինչպիսի՞ կոմպրոմատներով կփորձի իր թեկնածուին քաղաքապետի աթոռին նստացնել, երեկ ժողովուրդը կրկնակի ապտակ հասցրեց Փաշինյանին՝ նախ իր մասնակցության թվերով, ինչը նշանակում է անվստահություն՝ առաջին հերթին հենց այս իշխանության հանդեպ, երկրորդ հերթին՝ սրանով հասարակությունը մեսիջ ուղարկեց, որ ինքն այլևս չի հավատում ընտրությունների ինստիտուտին և փոփոխությունների այլ ճանապարհով է գնալու։ Եվ, իհարկե, այս ընտրությունների գլխավոր ցուցիչն իշխանությունների համար դարձավ դրա արդյունքը, որ, իսկապես, մտածելու տեղիք տվեց նրանց»։

Սուրեն Սուրենյանցն ասում է՝ ավագանու ընտրություններում անցողիկ շեմն անցած հինգը ֆավորիտների հարցում իր կանխատեսումներում ընդամենը մեկ վրիպում է ունեցել՝ իր համար հայտնություն են եղել Վարդան Ղուկասյանի գլխավորած կուսակցության ցուցանիշները, փոխարենը կարծում էր, թե «Ապրելու երկիր» կուսակցությունն ավելի շատ ձայներ պետք է գրանցի։ Առաջատար հնգյակի մեջ ես պատկերացնում էի «Ապրելու երկիր» կուսակցությանը, այլ ոչ թե Վարդան Ղուկասյանին, ասում է քաղաքագետը։

Հարցին՝ ի՞նչ կոալիցիաներ կկազմվեն և ո՞վ, ի վերջո, կգլխավորի ավագանին, բանախոսը պատասխանում է՝ բոլոր այն քաղաքական ուժերը կամ ավագանիում հայտնված մարդիկ, ովքեր ժողովրդի երեկվա կամարտահայտությունից հետո, որ ըստ էության, ՔՊ-ի մերժումն էր, դաշինք կկազմեն կամ կհամագործակցեն այդ ուժի հետ, կփորեն իրենց քաղաքական գերեզմանը.«Ես կարծում եմ, որ ոչինչ չի խանգարում ընգդծված ընդդիմադիր կեցվածք ընդունած երեք քաղաքական ուժերին՝ «Մայր Հայաստան», «Հանրային ձայն» և Հայկ Մարությանին ներկայացրած կուսակցությանը ժամանակավոր միավորվել՝ ընդամենը ՔՊ-ին իշխանությունից հեռացնելու համար։ Իհարկե, դժվարանում եմ ասել՝ կմիավորվե՞ն արդյո՞ք ի վերջո, այդ ուժերն այս նպատակի շուրջը , թե՞ ոչ, սա ցույց կտա ժամանակը»։

Լրագրողի նկատառմանը, թե քննարկումներն այն մասին, որ մեծ թվով ձայներ հավաքած Հայկ Մարությանն, այնուամենայնիվ, չի պատրաստվում միանալ այս եռյակին, թույլ չտալու համար ՔՊ-ի քաղաքապետի պաշտոնում վերարտադրվելը, պատճառաբանելով, թե նա արևմտյան պրոյեկտ է, քաղաքագետ Սուրեն Սուրենյանցը պատասխանում է՝ եկեք համարենք, որ Հայկ Մարությանը՝ դա Հայկ Մարությանն է և սպասենք նրա կայացրած որոշմանը։

Ամփոփելով զրույցն ու պատասխանելով հարցին՝ ի՞նչի ենք մենք ականատես լինելու ավագանու առաջին նիտին, քաղաքագետ Սուրեն Սուրենյանցը պատասխանում է՝ չի ցանկանա կենտրոնանալ նոր քաղաքապետի անձի վրա, սակայն, մի բան հստակ է՝ այս քաղաքային ավագանին ողջ մանդատով կառավարելու շանս չունի. «Որովհետև ավագանիում շատ անկայուն մեծամասնություն է սպասվում, նրանք ուշ թե շուտ, կառավարման ճգնաժամի մեջ են հայտնվելու։ Երեկ տեղի ունցած ընտրությունը հանգեցնելու է իշխանության ճգնաժամի խորացմանը, արդյունքում՝ 2024 թ. առաջին կիսամյակում Ազգային Ժողովում արտահերթ ընտրությունների անցկացմանը։ Մի բան հստակ է՝ ավագանու այս ընտրությունները քաղաքական բնույթ ստացան, չմնալով որպես զուտ քաղաքային իշխանության համար մղվող պայքար, ըստ էության ստանալով՝ «Քայլ արա, մերժիր Նիկոլին» նշանաբանով»։

Աղբյուր` Փաստինֆո