Փաստ ինֆո

Երկիրը, ազգը ներսից դարպաս բացողներից ազատագրելու ընթացքն, ըստ էության, մտնում է անկասելիության փուլ։ Այն, ինչ տեղի ունեցավ Արցախում՝ այլևս նախկին նախագահ Արայիկ Հարությունյանի հրաժարականով՝ պիտի իր հայելային արտացոլումն ունենա նաև Հայաստանում՝ Նիկոլ Փաշինյանի հեռացմամբ, փաշինյանական մահաբեր հնգամյակի ավարտով։

Այդ է փաստում սեպտեմբերի 17-ին տեղի ունեցած Երևանի ավագանու ընտրությունը՝ երևանցիների աննախադեպ պասիվության և սակավ մասնակցության նշանային արդյունքներով...

Այս ընտրությունն, իսկապես, Փաշինյանի իշխանության երկրորդ առարկայական պարտության մասին էր, որն արդեն իսկ ճաքեր էր տվել Ստեփանակերտում՝ Արայիկի հրաժարականով։ Ապա նաև՝ նոր նախագահի՝ Սամվել Շահրիմանյանի արհամարհական վերաբերմունքով։
Իսկ երեկ Փաշինյանին մերժեց նաև Երևանը։ Միայն թե իրերը պիտի կոչել իրենց անուններով, առանց աղավաղելու թվերի և տոկոսների իրականությունը։

Տեսեք, Երևանի ընտրողների ռեգիստրում հաշվառված է 824250 քաղաքացի, մինչդեռ քվեարկությանը մասնակցել է 234553 քաղաքացի կամ ընտրական իրավունք ունեցող քաղաքացիների 28.46%-ը։ Ինչը նշանակում է՝ երբ ասվում է՝ Տիգրան Ավինյանի ձայները 32 տոկոս են, ապա հստակ պիտի շեշտվի, որ այդ 32 տոկոսը 28․46 տոկոսի՛ 32 տոկոսն է։ Այսինքն, 100 տոկոսից՝ ընդամենը 28․46 տոկոսի 32 տոկոսը։

Այսինքն, ՔՊ-ն Երևանում չունի 32 տոկոս ձայն, ՔՊ-ի ձայները Երևանում շատ քիչ են, չնչին են։

Սա ցուցիչ է, որը նշանակում է՝ երևանցին լուրջ չի ընդունում իրեն իշխանություն երևակայող և հոխարտացող քպական զանգվածին և նրանց առաջնորդին։

Այս ընտրությունը քպական զանգվածին ցույց տվեց, որ իրենց տեղը Երևանում, այսինքն, քաղաքականության հայաստանյան կենտրոնում բորդյուրային է, որքան էլ վարչական ռեսուրս կիրառեն և այլազգիներ բերեն ընտրության...

Այս համատեքստում պետք է դիտարկել նաև հիմնական ընդդիմադիր ուժի ստացած ձայների արդյունքը:

Փաստորեն, Երևանի ավագանու ընտրությունների միջոցով մայրաքաղաքը երեկ շեշտակի մերժեց Փաշինյանին, բայց վերջինս դեռևս շարունակում է մնալ իշխանության։ Եվ որքան շարունակի, որքան ձգվի այս անտրամաբանական վիճակը, այնքան ավելի ակնառու է լինելու ընդդիմության մեղավորությունը և համախմբված առաջնորդելու կարողականության պակասը։

Համոզված ենք, որ այս ցուցանիշն անսպասելի չէր Փաշինյանի համար. Դա էր պատճառը, որ ակտիվ չէր մասնակցում քարոզարշավին ու այս խայտառակ ցուցանիշի ամբողջ պատասխանատվությունը կբարդի Ավինյանի վրա՝ չեզոքացնելով նրան՝ իր ամբիցիաներով հանդերձ։

Նա այլ կոմբինացիա է մտածել, ինչը ի հայտ կգա առաջիկայում։

Աղբյուր` Փաստինֆո