Փաստ ինֆո

ՔԿ նախագահ Արգիշտի Քյարամյանը, որն այսօր պետք է հարցաքննվեր Գառնիկ Իսագուլյանի գործով, չի ներկայացել դատարան՝ պատճառաբանելով, որ ծանրաբեռնված է։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Վաչե Մարգարյանի նախագահությամբ, այսօր հետաձգվել է Գառնիկ Իսագուլյանի գործով դատական նիստը։ Այսօրվա նիստի ընթացքում նախատեսված էր Արգիշտի Քյարամյանի, Սամվել Բաբայանի, Գարեգին Չուքասզյանш հարցաքննությունը, սակայն վկաները չեն ներկայացել նիստին։
Հիշեցնենք, որ Գառնիկ Իսագուլյանը մեղադրվում է ՀՀ քրեական օրենսգրքի (2003թ․ խմբ ) 333-րդ հոդվածի 2-րդ մասի 1-ին կետով՝ սուտ մատնություն կատարելու հատկանիշներով, որը զուգորդվել է ծանր կամ առանձնապես ծանր հանցագործության մեջ մեղադրելով։ Գործը վերաբերում է Նիկոլ Փաշինյանի նախկին մամուլի խոսնակ, այժմ՝ Ուկրաինայում ՀՀ դեսպան Վլադիմիր Կարապետյանի՝ թուրքական հատուկ ծառայությունների կողմից հավաքագրված լինելու մասին արված հայտարարություններին։ Մյուս դրվագը՝ պատերազմի նախորդող ժամանակաշրջանում Արգիշտի Քյարամյանի՝ դեռևս ԱԱԾ տնօրեն եղած ժամանակ նրա կողմից իբրև ադրբեջանցիներին հայկական անձնագրեր տրամադրելուն, ինչպես նաև՝ Շուշիի անկման վերաբերյալ է։

Հենց այդ դրվագների շուրջ էլ այսօր պետք է հարցաքննվեր ՔԿ նախագահ Արգիշտի Քյարամյանը, որը, սակայն չի ներկայացել նիստին՝ դատարան ներկայացված դիմումով նշելով, որ ծանրաբեռնված է, ինչը, ըստ պաշտպանության կողմի, հիմնավոր պատճառաբանություն չէ, ավելին, դիտավորություն է տեսնում։ Պաշտպանության կողմը միջնորդել է բերման ենթարկելու որոշում կայացնել, ինչը մերժվել է։ Դատակոչված մյուս վկաները չեն ներկայացել՝ պատշաճ ծանուցված չլինելու պատճառով, ըստ այդմ, դատարանը որոշել է ևս մեկ անգամ ծանուցել նրանց։ Դատական նիստը հետաձգվել է՝ մինչև նոյեմբեր։

Գառնիկ Իսագուլյանի պաշտպան Աննա Ծառուկյանի գնահատմամբ՝ Արգիշտի Քյարամյանի չներկայանալն անհիմն է, թեև նման սցենարը կանխատեսելի էր։

«Առանց պատշաճ հիմնավորման, բարձր իրավական գիտելիքներ ունեցող սուբյեկտը, որ ՔԿ նախագահ է, գիտի, թե ինչ է նշանակում անհարկի դատական նիստերի հետաձգումը, հասկանում է վկայի ինստիտուտի կարևորությունը և ունի շահագրգռվածություն այս գործով՝ հիմնավորելու թեկուզ իր անմեղությունը, որովհետև հարցը վերաբերում է սուտ մատնության։ Կարծում եմ՝ դիտավորություն կա, ինչ ծանրաբեռնվածության մասին է խոսքը»,- նշեց Ծառուկյանը։

Ինչ վերաբերում է բերման ենթարկելու միջնորդությունը մերժելուն, ապա Ծառուկյանը հիշեցրեց, որ նախորդ նիստին դատարանը սահմանափակել է բոլոր լրատվամիջոցների լուսաբանման հնարավորությունը՝ վկաների հարցաքննության պարագայում, ըստ այդմ, պարզ էր, որ բարձրաստիճան պաշտոնյաների հարցաքննությունը չի լուսաբանում։ Բացի այդ, Ծառուկյանը հիշեցրեց դատավոր Բորիս Բախշիյանի նկատմամբ հետապնդումը,երբ դատավորին կալանավորել էին՝ դատական նիստին անհարգելի չներկայացած անձին կալանավորելու համար։

Գառնիկ Իսագուլյանը, շարունակելով միտքը, հիշեցրեց Երևանի ավագանու ընտրությունները, որում ՔՊ-ն փաստացի չի հաղթել։ Իսագուլյանի համար աբսուրդային է նաև դատավորի որոշումը՝ ԶԼՄ-ների աշխատանքը սահմանափակելու վերաբերյալ։ Նրա գնահատմամբ՝ դատարանի վրա իրեն մեկուսացնելու շատ մեծ ճնշում կա։

Մանրամասները՝ տեսանյութում

Հեղինակ՝ Իզաբել Սահակյան

Աղբյուր` Փաստինֆո