Փաստ ինֆո

Այս ընտրությունները փաստեցին մի շատ կարևոր բան. իշխող քաղաքական ուժի կողմից վարվող ներքին և արտաքին քաղաքականությունը վստահություն չունի առնվազն երևանցիների մոտ։ Այս մասին «Փաստինֆոյի» հետ զրույցում ասաց քաղտեխնոլոգ Արմեն Բադալյանն՝ անդրադառնալով Երևանի ավագանու ընտրությունների արդյունքներին։

«Ըստ էության՝ երևանցիները մերժում են ՔՊ-ին։ Ակնհայտ է, որ Արցախի նկատմամբ իրականացվող Նիկոլ Փաշինյանի քաղաքականությունը երևանիցիների կողմից պաշտպանված չէ»։

Բադալյանն ընդգծեց, որ այժմ վերահաշվարկի անհրաժեշտություն կա, քանի որ վստահ է, որ դրա արդյունքում պատկերը կարող է փոխվել՝ ի վնաս ՔՊ-ի և «Հանրապետություն» կուսակցության։

Ինչպես արդեն տեղեկացրել ենք՝ սեպտեմբերի 17-ին Երեւանում տեղի ունեցած ավագանու ընտրություններին աննախադեպ պասիվություն է արձանագրվել. Քվեարկությանը մասնակցել է ընդրողների ընդամենը 28.46%, որի արդյունքում 5 ուժ է հաղթահարել է ավագանի ընտրվելու շեմը։ Հատկանշական է, որ իշխող ուժը հավաքել է ընդամենը 32․57% ձայն, այսինքն՝ կորցրել է իշխանությունը մայրաքաղաքում, քանի որ չի կարող միայնակ քաղաքապետ ընտրել։

Անդրադառնալով հարցին, թե ինչի մասին է վկայում ընտրություններին մասնակցության ցածր ցուցանիշը՝ քաղտեխնոլոգն ասաց, որ չնայած, ըստ ԿԸՀ-ի՝ Երևանում կա մոտ 850 հազար ընտրող, բայց իրականում ակնհայտ է, որ Երևանում չկա այդքան ընտրող։ «Շատերը, ովքեր Հայաստանում չեն, հաշվառումից դուրս չեն գալիս։ Այսինքն, պետք է բացարձակ թվերով խոսել, ըստ այդմ՝ ընտրություններին մասնակցել է 230 հազարից մի փոքր ավելի մարդ։

Երևանի ավագանու ընտրություններին մասնակցել են հիմնականում այն մարդիկ, ում հետաքրքրում էր իրականում երկրում քաղաքական գործընթացները։ Չգնացին նրանք, ովքեր գումարով էին գնում ընտրություններին, որովհետև, ըստ տարբեր գնահատականների՝ շատերը նախկինում հենց գումարով են բերվել ընտրատեղամաս։ Չնայած, պետք է ասել, որ որոշ թաղային հեղինակությունների ջանքերով ՔՊ-ն կարողացել է նաև նրանցից շատերին բերել ընտրության»։

Դիտարկմանը, թե 2018-և 2021 թ-ի ընտրություններին էլի նույն իշխանություններն էին, բայց հենց Երևանում ընտրողների մասնակցությունը շատ ավելի բարձր էր՝ քաղտեխնոլոգն ասաց, որ համեմատել չի կարելի։ «2018-ին հեղափոխական էյֆորիա էր, ու դա էականորեն ազդում էր մասնակցության թվի վրա, իսկ 2021-ին կար Ռոբերտ Քոչարյանի գործոնը։ Կար «նախկին- ներկա» բանավեճը, որը լրացուցիչ գործոն հանդիսացավ, որպեսզի մարդիկ գնան ու քվեարկեն գործող իշխանությունների օգտին։ Հիմա իրավիճակները միանգամայն ուրիշ է»։

Նա նաև ընդգծեց, որ այն բովանդակությունը, որ հիմա առաջարկվում էր քաղաքական ուժերի կողմից՝ երևանցիներին չհետաքրքրեց։
Բադալյանի դիտարկմամբ՝ այս ընտրություններում 2 ֆենոմեն է նկատվել է։ «Հետաքրքրիր է, որ նախկին քաղաքապետն է բավական բարձր տոկոս ստացել և «Հանրային ձայնը»։ Վարդան Ղուկասյանի՝ Դոգի հավաքած ձայները ֆենոմենալ էին։ Անհասկանալի էր նաև «Հանրապետություն» կուսակցության անցողիկ շեմը։ Իհարկե, տարբեր աղբյուրներ խոսում են այն մասին, որ շատ են աշխատել այն ուղղությամբ, որ հենց «Հանրապետությունը» կարողանա անցնել չորրորդ տեղով, որպեսզի ՔՊ-ի հետ դաշինք կազմի, բայց մինրևնույն է, այդ դաշինքն անարդյունավետ կարող է լինել, քանի որ ՔՊ-ի ու «Հանրապետության» ձայները մեկով քիչ են, որպեսզի կարողանան քաղաքապետ ընտրել։

Հատկանշական է նաև, որ «Ապրելու երկիրը» չկարողացավ հաղթահարել անցողիկ շեմը։ Կարծում եմ, սրա պատճառն այն է, որ «Ապրելու երկրի» քաղաքապետի թեկնածուի նկատմամբ հանրությունը հակակրանք ունի։

Ամեն դեպքում, ամենակարևորն այստեղ այն է, որ ՔՊ-ի վարկանիշն էապես անկում է ունեցել։ Դեռ 5 տարի առաջ 80 տոկոս և ավելի ձայներ ունեցող կուսակցությունը, այդ թվում ՝ թաղային հեղինակությունների ջանքերով է, որ կարողացել է այս ցուցանիշն ապահովել»։

Աղբյուր` Փաստինֆո