Փաստ ինֆո

Մենք սպասում էինք, որ տեղի կունենա վարչական լծակների այսպիսի օգտագործում, սակայն, մյուս կողմից, գիտեինք, թե որքան ցածր վարկանիշ ունի իշխող կուսակցությունը։ Մեզ համար անակնկալ էր միայն այն արբանյակ կուսակցության գրանցած ձայների թիվը, որը որևէ կապ չուներ Երևան քաղաքի հետ, սակայն առանձին տեղամասերում, ընդհանրապես, իրար հետևից նրանց քվեներն էին դուրս գալիս, որն, արդն իսկ, հուշում էր ոչ միայն այն մասին, թե ինչի արդյունք կարող էր լինել դա, այլ, թե ովքեր կարող էին կանգնած լինել այդ երևույթի հետևում։ Խոսքը «Հանրապետություն» կուսակցության մասին է, որն, ըստ էության, ասպարեզում չկար, հետո, հանկարծ, նրանք սկսեցին ընդգծված հակառուսական դիրքորոշումներով հանդես գալ, այսինքն, կարելի է ասել, որ դա ներդրված կուսակցություն էր՝ իրեն վերապահված բոլոր գործառույթներով,- «Փաստինֆո» լրատվականի հետ զրույցում ասում է գրականագետ, «Մայր Հայաստան» դաշինքի անդամ Սերժ Սրապիոնյանը՝ վերլուծելով երեկ տեղի ունեցած Երևանի քաղաքային ընտրությունները։

Հիշեցնենք՝ նախնական արդյունքներով Երեւանի ավագանու ընտրություններին մասնակցել է 234 436 ընտրող, որի արդյունքում Երևանի ավագանի ընտրվելու անհրաժեշտ շեմը հաղթահարել է հինգ ուժ, ընդ որում` ՔՊ-ն, կարելի է ասել, պարտվել է: Այսպես` իշխանության կուսակցության` ՔՊ-ի, օգտին քվեարկել է ընդամենը 75463 ընտրող, որը կազմում է քվեարկությանը մասնակցածների 32.57 %, երկրորդ տեղում է «Ազգային առաջադիմությունը»` 18,89 % (43.765), երրորդ տեղում է «Մայր Հայաստանը»`15, 43 %, (35.739), «Հանրապետությունը» ստացել է`11, 32 % ձայն (26.236): Ավագանի ընտրված հաջորդ ուժը «Հանրային ձայնն» է, որի օգտին քվեարկել է մասնակիցների `9, 68 %-ը (22.431)։

Բանախոսը նկատում է՝ թեև իսկզբանե բազմաթիվ խնդիրներ ու խոչընդոտներ կային, սակայն «Մայր Հայաստան» դաշինքը կարողացավ հասնել գոնե նրան, որպեսզի Երևանում ապօրինի կերպով գրանցված վիթխարի մի քանակություն չմասնակցի ընտրություններին, ինչը, կարելի է ասել, ճիշտ քարոզչության արդյունք էր. «Հիմա էլ քննում ենք այն ահավոր չափերի հասնող խախտումների դեպքերը, որոնք գրանցվել են ընտրությունների ընթացքում, որոնց մասին լրացուցիչ կհայտարարենք։ Դրանք իրենցից ներկայացնում են մեզ արդեն ծանոթ, ինչպես նաև՝ բոլորովին նոր տեսակի և որակի խախտումներ»,- ասում է Սերժ Սրապիոնյանը։

Վերջինս հավելում է՝ երեկ տեղի ունեցած ընտրություններից գոհ են այնքանով, որքանով դրանց արդյունքները ցույց տվեցին՝ մարդիկ, ի վերջո, արթնացել և հասկացել են, թե ինչ վտանգավոր ուժ է այսօր ղեկավարում Հայաստանն և ուր կտանի այն մեր երկու հանրապետություններն ու ժողովրդին.«Մենք հավատարիմ ենք մնում մեր հայտարարություններին և մինչև վերջ գնալու ենք համահայաստանյան իշխանությունների փոփոխության ճանապարհով։ Մենք, ի դեմս մեր դաշինքի ղեկավարի, իսկզբանե հայտարարել ենք՝ մեր նպատակը քաղաքապետ դառնալը չէ, այլ օրվա այս իշխանության ամբողջական փոփոխության հասնելն ու անկախ բոլոր տեսակի արդյունքներից, մենք շարունակելու ենք առաջ տանել այդ գիծը»։

Պատասխանելով հարցին՝ արդյո՞ք անցողիկ շեմը հաղթահարած ուժերի կողմից կկազմվե՞ն դաշինքներ, որոնք թույլ չեն տա ավագանիում իշխող կուսակցության անցանկալի վերարտադրությունը, Սերժ Սրապիոնյանը պատասխանում է՝ դատելով հնչած հայտարարութուններից, նման միտում այս պահի դրությամբ կա.«Այստեղ շատ կարևոր է այն հանգամանքը, թե այդ անցողիկ շեմը հաղթահարած հակաիշխանական ուժերն իրենց հիմնական սկզբունքների օգտագործման իմաստով, որքանո՞վ պատրաստ կլինեն գնալու փոխզիջումների ճանապարհով։ Ամեն դեպքում, մինչ հոկտեմբեր ամսվա կեսերին դեռևս ժամանակ կա՝ քննարկելու այդ հարցերն ու մի հայտարարի գալու, հետևաբար, ավելի նպատակահարմար է սպասել առաջիկա հնարավոր զարգացումներին»։

Ամփոփելով զրույցը՝ «Մայր Հայաստան» դաշինքի ներկայացուցիչ Սերժ Սրապիոնյանն ասում է՝ նույնիսկ մինչ ընտրությունների մեկնարկն, ինքն իր հրապարակային խոսքում և ելույթներում բազմիցս շեշտել է՝ սրանք պարզապես քաղաքային իշխանության համար մղվող ընտրություններ չպետք է դիտարկել, այլ, բացառապես, որպես քաղաքական պայքար՝ հայաստանյան օրվա իշխանութուններից ազատագրվելու համար. «Եվ սրանք, այո, դարձան քաղաքական ընտրություններ, ինչին մեր դաշինքը ձգտում էր՝ իր ողջ գործունեությամբ։ Արդյունքում, մենք լծակներ ստաացանք մեր ժողովրդի ակտիվ զանգվածից, որի թիվը, ցավոք, մեծ չէր, բայց փոխարենը՝ որոշիչ, վերջնանպատակին հասնելու համար, իսկ վերջնանպատակը խունտային իշխանական լծակներից հեռացնելն է։ Բոլոր նրանք, ովքեր այս նպատակը մեզ հետ միասին իրենց համար ընդունելի կհամարեն, կհամախմբվենք նրանց հետ ու կշարունակենք մեր պայքարը։ Մենք շատ լավ ենք հասկանում, որ սա մեր երկրի ու ժողովրդի համար սոսկ ընտրություն չէր, այլ՝ լինել – չլինելու գոյաբանական հարց և այստեղ որևէ չափազանցություն չկա»։

Աղբյուր` Փաստինֆո