Փաստ ինֆո

Ադրբեջանի նախագահ Ալիևը Հայաստանն ընդունում է որպես իր երկրի մի մաս, իսկ հայկական տեղանուններն անվանում են ադրբեջանական տարբերակներով։ Սա հույժ լուրջ վիճակ է։ Լրագրողների հետ հանդիպմանն այս մասին հայտարարեց հատուկ առաքելությամբ Հայաստանում գտնվող Մեծ Բրիտանիայի լորդերի պալատի անդամ, բարոնուհի Քերոլայն Քոքսը, ով օրերս այցելել էր Բերձորի միջանցքի սկզբնամաս։

Քոքսը նկատեց, որ Ադրբեջանը կարողանում է ռազմական ու պատերազմական վայրագություններ անել ու միևնույն ժամանակ մնալ անպատիժ։ Այդ համատեքստում, նա մատնանշեց նաև ագրեսոր այդ երկրի կողմից ՀՀ սուվերեն տարածքի նկատմամբ ունեցած նկրտումներն ու այդ ուղղությամբ կատարած գործողությունները։

«Երբ մենք այդ տարածքում էինք, տեսանք ադրբեջանական ռազմական դիրքեր՝ հայկական հողի վրա։ Գործընթաց է ընթանում, որը կարող է խիստ վտանգավոր լինել Հայաստանի համար»,- համոզմունք հայտնեց հայ ժողովրդի բարեկամը։

Այս ամենի ֆոնին, ըստ բարոնուհու, միջազգային համայնքը, մասնավորապես նաև Միացյալ թագավորությունը, որևէ քայլ չեն ձեռնարկում տեղի ունեցող իրադարձությունները դադարեցնելու ուղղությամբ։ Այդ մասին, ըստ նրա, ինքը մի քանի անգամ բարձրաձայնել է Լորդերի պալատում՝ հավելելով, որ ադրբեջանական ագրեսիվ քայլերը պետք է դադարեցվեն՝ միջազգային պատժամիջոցներով։

Ինչ վերաբերում է Արցախին՝ Միջազգային քրիստոնեական համեշխության կազմակերպության նախագահ Ջոն Էբները հայտարարեց, որ որևէ մեկն իրավունք չունի հայտարարելու Արցախի ժողովրդի՝ ինքնորոշման իրավունք չունենալու մասին։ Նրա խոսքով՝ նրանք դա կարող են ընդունել կամ պարզապես չընդունել։

«Շատ ռիսկային փորձարկում կլինի, եթե Հայաստանի կառավարությունն ասի, որ Արցախը չունի այդ ինքնորոշման իրավունքը։ Նրանք, որոնք կհետևեն այս տրամաբանությանը, ստիպված կլինեն առերեսվել Սյունիքի հարցին։ Այսինքն, այդպիսի հայտարարությունը տանում է նրան, որ «ՀՀ ղեկավարությունը և երևանաբնակները կկարողանան դիմանալ այս իրավիճակին՝ առանց Սյունիքի»։ Դա շատ կասկածահարույց կլինի»,- ասաց նա։

Բանախոսները նաև հայտնեցին, որ Հայաստան կատարած այցի ընթացքում արձանագրածն ու արված եզրակացությունները ներկայացնելու են միջազգային տարբեր հարթակներում ու Բրիտանական խորհրդարանում։

Աղբյուր` Փաստինֆո