Փաստ ինֆո

Սահմանապահ գյուղի բնակիչիերը ԵՄ դիտորդների աշխատանքը բավարար արդյունավետ չեն համարում։ Վերջին օրերին, այո, կրակոցները դադարել են, սակայն գյուղում համոզված են, որ պատճառը ոչ թե դիտորդների ներկայությունն է, այլ այն պարզ իրողությունը, որ ոչ ոք գործարանի տարածք չի մտնում։

Ինչպես արդեն տեղեկացրել ենք՝ ՀՀ-ում ԵՄ քաղաքացիական դիտորդական առաքելությունը X-ի իր միկրոբլոգում հայտարարել էր, որ Երասխում իրենց մշտական պարեկության արդյունքում, մետաղագործական գործարանի անվտանգային իրավիճակն ավելի բարենպաստ է դարձել։

«Այո, երևի մի 15-20 օր կլինի, ինչ ադրբեջանցիները չեն կրակել գործարանի ուղղությամբ, բայց դա նրա պատճառով է, որ այդտեղ որևէ մեկն այս ընթացքում չի գնացել։ Վախենում են մարդիկ էդ տարածքին մոտ գնալ։ Դրանից առաջ մեկը փորձել էր ներսից մի բան վերցնել։ Էլի կրակել էին, վախից լեզուն կապ էր ընկել։ Հիմա էլ եթե մտնեն, նույն րոպեին կկրակեն։ Ոչինչ հաշվի չեն առնի։ Էլ դրանից հետո, առանց անվտանգային երաշխիքների, ո՞վ մոտ կգնա էդ տարածքին։ Էդ պարագայում իրենց էլ պետք չէ կրակել»,- «Փաստինֆո»-ին ասել է բնակիչներից մեկը նա։

Մեր զրուցակցի կարծիքով՝ ԵՄ դիտորդներն այս պարագայում, իրենց ավելի շատ հովանավորում է, քան խանգարում։ Նրա խոսքով, այդուհանդերձ, գյուղի տարածքում ռուսական դրոշի տեղադրումից հետո իրավիճակը համեմատաբար կայունացել է, սակայն, Երասխում, ըստ մեր զրուցակցի, շարունակվում է «վտանգավոր խաղաղությունը»։

«Ժողովուրդն, իհարկե, խաղաղ չի քնում, միշտ էլ անհանգիստ են։ Ինչքան էլ ասեն՝ մենք ամուր կանգնած ենք՝ մեր անվտանգությունը երաշխավորված չէ։ Ամեն դեպքում, հայ ազգն իր հույսը պետք է դնի միայն իր ուժերի վրա, ուրիշ ոչ ոքի»,- ասաց նա։
Գյուղի բնակիչը կասկածանքով արտահայտվեց նաև հայտարարությանը, որ Երասխում կառուցված մետաղագործական գործարանը չի նախատեսվում տեղափոխել ու շինարարությունն առաջիկայում շարունակվելու է։ Հայտարարեց, գործարանում աշխատանքներն արդեն վաղուց են սառեցված։

Ավելի վաղ «GTB Holding» -ը հայտարարել էր, որ շարունակելու է հավատարիմ մնալ սահմանամերձ բնակավայրերի աջակցության իր սկզբունքին։ Ընկերությունից վստահեցրել էին, որ Երասխի մետաղագործական գործարանն այլ տարածք տեղափոխել չեն նախատեսում ու դրա կառուցումն առաջիկայում կշարունակվի՝ նույն վայրում։

«Գիտե՞ք ինչ, եթե բառասկզբում առկա է «կ-» պայմանական եղանակիչը, ապա այդ մասին խոսելն ավելորդ է։ Որ ասում են՝ «կկառուցենք»... Արևմտյան Հայաստանի դեպքում էլ էինք ասում՝ «կվերադառնանք մեր հողերը», ոսկի էինք վերցնում, բանալի էինք վերցնում։ Ես երբեք չեմ հավատա, որ գործարանն էստեղ կշարունակեն կառուցել։ Չեն թողնի։ Ես վախենում են մեր տարածքն էլ կորցնենք։ Եթե քո հարևանն ամեն վայրկյան ասի «թըխկ» ու դու փախչես... ինչի՞ մասին է խոսքը»,- վրդովված ասաց սահմանապահ գյուղի բնակիչը։

Աղբյուր` Փաստինֆո