Փաստ ինֆո

Նիկոլ Փաշինյանը Հայաստանի բանակցողն է։ Պատերազմի սկսվելը հենց նրա կողմից բանակցային անկարողության հետևանքն էր։ ԱԺ խմբակցությունների ճեպազրույցների ժամանակ այս մասին հայտարարեց ԱԺ «Պատիվ ունեմ» խմբակցության պատգամավոր Թագուհի Թովմասյանը։

Նրա համոզմամբ՝ Փաշինյանը չի կարող հայկական որևէ փաստարկ ներկայացնել, որովհետև հենց ինքն է հայտարարել, որ բանակցային մանրամասներին տեղեկացել է Ալիևից, իսկ Ալիևը չէր կարող պրոհայկական որևէ մոտեցում փոխանցել իրեն։

«Մենք Արցախի ժողովրդի ինքնորոշման իրավունքը պետք է դարձնենք թիվ մեկ թեման։ Սա պետք է դառնա բանակցային լուրջ հարց։ Նիկոլ Փաշինյանն այս առումով անելիք ունի՝ հղում կատարելով նաև միջազգային փորձի ու հայկական փաստարկների վրա։ Գիտեք, թե ինչպիսի դաժանությամբ են վարվել օրինակ՝ կանանց հետ, երբ խոշտանգել էին նրանց մարմինները, որոնց վրա իրենց ջոկատի անուններն էին փորագրել։ Ադրբեջանն էլ ի՞նչ պետք է անի, ու էլ ի՞նչ հայկական փաստարկ պետք է բերվի, որ հասկանալի լինի, որ նրանք (արցախցի մեր հայրենակիցներն ու ադրբեջանական կողմը – խմբ.) չեն կարող համագոյակցել»,- ասաց նա։

Թովմասյանը հայտարարեց, որ այս մասին մեկ անգամ չէ, որ բարձրաձայնվել է, թե՛ ամերիկյան, թե՛ ֆրանսիական կողմից։
«Ես Նիկոլ Փաշինյան խորհուրդ կտամ, որպես հայկական դիրքորոշման կողմնակից, հաճախ շփվի ֆրանսիական կողմի՝ Ֆրանսիայի նախագահի հետ, և այնտեղից կլսի պրոհայկական շատ ավելի շատ դիրքորոշումներ, քան իր կաբինետում նստած մարդկանցից»,- ասաց նա։

Հիշեցնենք, որ արդեն ավելի քասն 9 ամիս է, ինչ Ադրբեջանի իշխանությունների ագրեսիվ քաղաքականության հետևանքով, Արցախցի մեր հայրենակիցները շարունակում են մնալ լիակատար շրջափակման մեջ՝ մատնվելով սովահարության։ Կաթվածահար են եղել Արցախում առկա բոլոր ոլորտները, մարդիկ կանգնած են օրվա սնունդը հայթայթելու խնդրի առջև։
Իսկ օրերս հայտարարվեց, որ Ակնայի ճանապարհով ռուսական բեռնատարի անցնելու դեպքում ադրբեջանական կողմը պարտավորվել է ապաշրջափակել Բերձորի միջանցքը, սակայն, իր սովորության համաձայն, մինչև այժմ Հայաստանն Արցախին կապող միակ ճանապարհը շարունակում է փակ մնալ թշնամու կողմից։

Աղբյուր` Փաստինֆո