Փաստ ինֆո

«Խաղաղության օրակարգի» անվան տակ Հայաստանը մտել է շատ վտանգավոր գործընթացի մեջ՝ չունենալով ո՛չ ռազմավարություն, ո՛չ բովանդակություն, ո՛չ տակտիկական քայլերի հաջորդականություն։ Եթե ՀՀ իշխանություններին թվում էր, թե դրանով կարող են կանխել վտանգավոր զարգացումները, ապա իրականում ավելի վտանգավոր իրավիճակ են ստեղծել․ ուղիղ մեկ տարի առաջ ՀՀ-ի դեմ Ադրբեջանն իրականացրեց ագրեսիա և ՀՀ սուվերեն տարածքից ևս 140 քառ․ կմ օկուպացրեց, հիմա էլ սահմանային կուտակումներ են, և ռազմական ագրեսիայի վտանգը բավականին իրական կրկին կախված է մեր գլխին։ «Փաստինֆո»-ի հետ զրույցում նման տեսակետ հնչեցրեց ադրբեջանագետ, պատմական գիտությունների թեկնածու Տաթևիկ Հայրապետյանը։

«Ադրբեջանն առաջարկելով, իբր, «խաղաղության պայմանագիր»՝ Հայաստանին ներքաշել է բավականին վտանգավոր գործընթացի մեջ՝ իր պայմաններով և իր թելադրած կանոններով։ Շատ անգամ եմ ասել, որ Ադրբեջանը մեզ ոչ թե առաջարկում է «խաղաղության պայմանագիր», այլ սպառնում է նման պայմանագրով։ Պարզ էր, որ այդ երկիրն ունի հստակ ռազմավարություն, մշակված ծրագիր և քայլ առ քայլ գնալու է դրանց իրագործմանը։ Ու եթե սկզբնական շրջանում ընդհանրական պահանջներ էին դրել, հետո արդեն անցան կոնկրետ պահանջների, իսկ ՀՀ իշխանություններն էլ մաքսիմալ զիջումների գնացին՝ դիմացը ոչինչ չստանալով։ Գետնի վրա ադրբեջանցիները շարունակում են իրավիճակ փոխել, ուժի և ուժի սպառնալիքի կիրառմամբ ՀՀ ղեկավարությունից պարբերաբար զիջումներ կորզել»,-շեշտում է ադրբեջանագետը։

Հայրապետյանի դիտարկմամբ՝ Ալիևն այս պահի դրությամբ որևէ թուղթ ստորագրելու մտադրություն չունի ու քանի դեռ կարողանում է նման իմիտացիա ստեղծելով՝ ՀՀ-ից պոկել այն ամենն, ինչ ուզում է, չի էլ ստորագրելու որևէ պայմանագիր։

«Ստանալով Արցախն Ադրբեջանի կազմում ճանաչելու և նույնիսկ ՀՀ-ն Իրանին ու Վրաստանին կապող միջպետական ճանապարհների նկատմամբ որոշակի վերահսկողության հաստատման խոստում՝ Ալիևն արդեն անցել է Հայաստան ադրբեջանցիների, այսպես կոչված, «վերադարձի» պահանջին։ Եթե ոմանց դա թվում է իլյուզիա, անհնարին բան, ապա նրանք չեն պատկերացնում Ադրբեջան պետության էությունը, խիստ կազմակերպված գործելու բնույթը, չգիտեն, որ այնտեղ բոլորը կատարում են մեկ կետից՝ Ալիևյան ռեժիմից գնացող հրահանգները»,-ասում է ադրբեջանագետն ու ավելացնում՝ թշնամու տեղեկատվական դաշտում որոշ ժամանակ է արդեն՝ ակտիվորեն շրջանառվում է շրջված A-ի սիմվոլը, որը, ադրբեջանցիների ներկայացմամբ, Նախիջևանը, Արցախն ու Սյունիքն են, այսինքն՝ նրանք համարում են, որ Արցախը նույնպես, իբր, իրենցն է ու հիմա Սյունիքն են փորձում զավթել, որ կապի Նախիջեւանն Արցախի հետ։

Ցավով արձանագրելով, որ Փաշինյանի վարած քաղաքականության հետևանքով լրջորեն վտանգված է ոչ միայն Արցախը, այլև բուն ՀՀ-ն, Հայրապետյանն այն կարծիքին է, որ Արցախը պետք է փորձի առանձին դիրքավորվել, քանի դեռ ՀՀ-ում իշխանության ղեկին իրեն հանձնելուն պատրաստ Փաշինյանն է։

«Անվտանգային նկատառումներից ելնելով՝ եթե Արցախի իշխանությունները որոշեն Ակնայից Ասկերան հատվածում անցակետ տեղադրել, լրիվ տրամաբանական քայլ կլինի։ Իրավիճակը, անխոս, բավականին լարված է, պայթյունավտանգ ու շատ լավ ծանրութեթև պետք է անել ամեն քայլը, հնարավոր հետևանքները հաշվարկել նոր անել, բայց կոնկետ անցակետի հետ կապված, կարծում եմ, ճիշտ կլինի այդ քայլին գնալը։ Միևնույն ժամանակ, չեմ կարծում, թե այդ ճանապարհը գործելու է՝ առավելևս այն բանից հետո, երբ հերթական անգամ Ադրբեջանը խախտեց պայմանավորվածությունը և չբացեց Բերձորի(Լաչինի) միջանցքը»,-եզրափակեց Տաթևիկ Հայրապետյանը։

Աղբյուր` Փաստինֆո