Փաստ ինֆո

Երկարատև բողոքի ակցիաներից ու քաշքշուկներից հետո ՀՀ ԿԳՄՍ նախարարությունը տեղի տվեց ուսուցիչների պահանջին։ «Փաստինֆո»-ի հետ զրույցում այս մասին հայտնեց երեկ՝ ԿԳՄՍ նախարարության դիմաց բողոքի ակցիա իրականացրած  ուսուցիչներից Սուսաննա Ադամյանը։

Հիշեցնենք, որ երեկ ուսուցիչները բողոքի ակցիա էին իրականացրել՝ ՀՀ ԿԳՄՍ նախարարության դիմաց՝ բողոքելով կրթական գերատեսչության կողմից ներդրած և կրթական տարվա մեկնարկից ուժի մեջ մտած նոր մեխանիզմի դեմ՝։ Մանկավարժները պնդում են, որ դա խաթարում է երեխաների կրթությունն արդյունավետ իրականացնելու գործընթացը։

Մեր զրուցակիցը հայտնեց, որ  կրթական համակարգում՝ մասնավորապես 3-րդ, 5-րդ ու 7-րդ դասարաններում ներդրված նոր չափորոշիչներին դեմ չեն։ Իսկ կրթական տարեկան ու օրական պլանը նախկինում էլ ներկայացրել են։ Անհանգստություններն առաջացել են նոր համակարգը ներդնելուց հետո։ Այս համակարգով, նախկինի համեմատ, թղթային տարբերակին զուգահեռ, ներկայացվում է օրվա դասապրոցեսի ու այն անցկացնելու մեթոդաբանությունը՝ ամբողջ մանրամասնությամբ՝ նաև էլեկտրոնային տարբերակով։

Մեր զրուցակիցը հայտնեց, որ դա շատ ժամանակատար է, ու որևէ ձևով չի նպաստում դասապրոցեսի արդյունավետ անցկացմանը։

«Մի հատ այդ օրվա համար պետք է նկարագրեմ, մի հատ էլ հաջորդ օրվա բոլոր դասերիս նկարագրությունը պետք է իրականացնեմ։ Բնականաբար, ես դա դասապրոցեսի ժամանակ անել չեմ կարող, իսկ դպրոցում ունեցած ազատ ժամանակ ունենալու դեպքում կրթական պրոցեսի այլ աշխատանքներ եմ իրականացնում։ Ստիպված եմ այդ աշխատանքը շարունակել նաև տանը՝ իմ աշխատանքային ժամից հետո։ Պատկերացնո՞ւմ եք, թե ինչ իրավիճակ է առաջանում այս դեպքում»,- ասաց նա։

Սուսաննա Ադամյանի փոխանցմամբ՝ նման  որոշում կայացնելուց առաջ նախարարության որևէ ներկայացուցչի կողմից իրենց հետ որևէ քննարկում չի իրականացվել։ Ավելին, նախարարության դիմաց բողոքող ուսուցիչներին գերատեսչությունում հայտնել էին, որ ներդրված համակարգն ընդամենը մեթոդաբանական փորձ է եղել։

«Մենք այդպես էլ չհասկացանք՝ թե այդ ինչ տեսակի փորձ էր։ Իսկ մի գուցե ցածր օղակների կարծիքն է՞լ ինչ- որ ձևով հաշվի առնեին։ Այդպիսի փորձեր անելուց առաջ նախ և առաջ պետք էր ոլորտի ներկայացուցիչների հետ հանդիպել, հանրային քննարկում կազմակերպել, հետո արդեն որևէ քայլ անել։ Չէ՞ որ ուսուցիչը ես եմ, ես եմ աշխատելու այդ համակարգով ու կարող է ես տեսնում էի խնդիրներ, որոնք շտկման կարիք ունեին»,- ասաց նա։

Մեր զրուցակցի խոսքով՝ նախարարությունում բողոքի ժամանակ ընդունելության բարձրացած 10 մասնագետների հետ հանդիպում նախ կազմակերպվել էր Հանրակրթության բաժնի պետի հետ։ Ընդհանուր հայտարարի չգալուց հետո արդեն ուսուցիչներին իր մոտ էր ընդունել նաև ԿԳՄՍ նախարար Ժաննա Անդրեասյանը։ 1 ժամից ավելի տևած հանդիպմանը քննարկվել են ինչպես նոր ներդրված մեխանիզմը, այլև կրթական համակարգում առկա այլ խնդիրներ։

Ուսուցիչները հանգամանալից ներկայացրել են նախարարության նորամուծության կողմից կրթական համակարգին հասցվող անհարմարությունը։ Հանդիպումից անմիջապես հետո, այդուհանդերձ, ուսուցիչներն արձանագրել են, որ եթե նախկինում նոր ներդրված մեխանիզմը պարտադիր էր բոլոր ուսուցիչների համար,ապա կարճ ժամանակում համակարգ էր ներբեռնվել նաև նախկին համաիարգը՝ ուսուցիչներին հնարավորություն տալով որոշելու, թե որ համակարգով են ցանկանում աշխատել։

«Փաստինֆո»-ի մեկ այլ զրույցակից, այդուհանդերձ, հայտնեց, որ նախարարության, այսպես ասած, «զիջումը» ժամանակավոր է։ Նախարարությունից իրենց զգուշացվել է, որ արդեն հաջորդ տարվանից գործի է դրվելու նոր մեխանիզմը։

Մանկավարժները առաջիկայում  բացառված չէ, որ  կրկին ակցիաներ իրականացնեն՝ խնդրին վերջնական լուծում տալու համար։

Աղբյուր` Փաստինֆո