Փաստ ինֆո

Ադրբեջանը մինչ օրս չի արձագանքել հայկական կողմից խաղաղության պայմանագրի վերաբերյալ պաշտոնական Երեւանի նոր առաջարկներին։ Լրագրողների հետ ճեպազրույցի ժամանակ այս մասին հայտարարեց Ազգային ժողովի արտաքին հարաբերությունների մշտական հանձնաժողովի նախագահ Սարգիս Խանդանյանը՝ հավելելով, որ բանակցությունները շարունակելու նպատակով առաջիկա հանդիպման որևէ առաջարկ, այս պահին, առկա չէ։

«Հայաստանը չի պատրաստվում հետ կանգնել խաղաղ ճանապարհով խնդիրները հանգուցալուծելու և խաղաղության համաձայնագիր ստորագրելու իր նպատակից։ Հայաստանը պատրաստ է ցանկացած պահի վերադառնալ բանակցությունների սեղան ու շարունակել հարցերի քննարկումը»,- ասաց նա։

Միևնույն ժամանակ, Խանդանյանը տեսակետ հայտնեց, որ պետք է լուրջ վերաբերվել հայ-ադրբեջանական սահմանին Ադրբեջանի կողմից զորքի և տեխնիկայի կուտակումներին։

«Հայ-ադրբեջանական սահմանին Ադրբեջանի կողմից զորքերի և տեխնիկայի կուտակումները վկայում են Բաքվի ագրեսիվ քաղաքականության շարունակության մասին, ստանձնած պարտավորությունները չկատարելու և հարցերը ուժի միջոցով լուծելու հերթական փորձի մասին։ Այս խնդրին պետք է լուրջ վերաբերվել։

Գիտեք, որ բազմաթիվ միջազգային շփումներ են տեղի ունեցել, որպեսզի ավելացվի ճնշումը Ադրբեջանի վրա, և որպեսզի այդ երկիրը չփորձի որևէ հարց լուծել՝ ուժի կիրառմամբ»,- ասաց նա։

Խանդանյանի գնահատմամբ՝ Արցախում շարունակվող հումանիտար ճգնաժամն ու Ադրբեջանի ագրեսիվ քաղաքականությունը բացասաբար են անդրադառնում բանակցությունների ընթացքի վրա։ Այդուհանդերձ, նրա խոսքով, հայկական կողմը հետ չի կանգնելու խաղաղության օրակարգից։

Աղբյուր` Փաստինֆո