Փաստ ինֆո

Ադրբեջանն ամեն ինչ անում է, որպեսզի աշխարհին համոզի, թե Արցախում հումանիտար ճգնաժամը լուծվելու է, եթե գործարվի օկուպացված Ակնայի ճանապարհը, մինչդեռ աշխարհի խոշոր դերակատարները ևս բազմիցս հայտարարել են, որ որևէ ճանապարհ չի կարող փոխարինել Բերձորի(Լաչինի) միջանցքին, քանի որ Արցախի կյանքի ճանապարհը Բերձորի միջանցքն է։ Ադրբեջանի ցանկացած փորձ՝ ստվերելու Բերձորի միջանցքի դերը, պետք է չեզոքացվի ու ամեն ջանք գործադրվի՝ այն բացելու համար։ «Փաստինֆո»-ի հետ զրույցում նման տեսակետ հայտնեց միջազգայնագետ, քաղաքագետ Դավիթ Կարապետյանը։

«Ռուսական Կարմիր Խաչի՝ Ակնայից Ասկերան մտնելու մասին լուրը տարածվելուն զուգահեռ՝ նաև ինֆորմացիա տարածվեց, թե այդ մեքենայի Արցախ մուտք գործելուց 12 ժամ անց Լաչինի միջանցքը բացվելու է։ Նախ՝ հետաքրքիր է այն, թե որտեղից է այդ ինֆորմացիան դուրս եկել, եթե պաշտոնական որևէ աղբյուր չկա։ Այսինքն՝ ռուսական կողմից որևէ պարզաբանում պահանջելու հիմք չկա։ Այս ամենով հանդերձ, Արցախի իշխանությունները պետք է ռուսական խաղաղապահ զորախմբից ու ՌԴ կառավարությունից պահանջեն հստակ նշել, թե ինչ ժամկետում են ապահովելու Բերձորի միջանցքի վերագործարկումը»,-շեշտեց քաղաքագետը։

Անդրադառնալով Բերձորի միջանցքի մինչև հիմա փակ լինելու հանգամանքին, Կարապետյանը նկատում է՝ Ադրբեջանի այդ պահվածքը անսպասելի չէր, քանի որ շարունակ պնդել է, որ միջանցքը չի բացելու։ Աշխարհի ու մասնավորապես ռուսական կողմի ճնշումներին տեղի չտալու և միջանցքը փակ պահելու դեպքում, ըստ քաղաքագետի, արցախահայությանը սովից փրկելու համար Ակնայով ևս մեկ-երկու մեքենա բեռ կարելի է ներս թողնել, բայց երկու պայմանով՝ 1․ բեռը որևէ առնչություն չունենա ադրբեջանցիների հետ, բացառվի ադրբեջանական ծագման որևէ ապրանքի մուտքը, ինչպես նաև նրանց մեքենաների ու ներկայացուցիչների, 2․ պարտադիր մանրազննին ստուգվի Ասկերան մտնելուց առաջ, 3․ մաքսազերծվի։

«Ոչինչ չի խանգարում, որ Ակնա-Ասկերան ճանապարհին Արցախը դնի մաքսակետ ու ցանկացած բեռ մտնի այդ անցակետով։ Դրանով կընդգծվի ու կբարձրանա Արցախի սուբյեկտայնությունը։ Կրկնում եմ՝ անգամ այդ դեպքում Ակնայից շատ սահմանափակ քանակությամբ բեռ կարելի է ներս թողնել, որպեսզի Բերձորի միջանցքի նշանակությունը, այն անհապաղ բացելու անհրաժեշտությունը չանտեսվի։

Ռիսկերը շատ են․ հնարավոր է՝ այդ դեպքում Ադրբեջանին հաջողվի համոզել, թե, իբր հումանիտար ճգնաժամը լուծվել է Արցախում, ուստի շատ զգույշ պետք է գործել»,-նշեց Կարապետյանը։

Ադրբեջանական քարոզչամեքենայի առաջ քաշած նարատիվը, թե, իբր, ռուսական ԿԽ մեքենայի մուտքն Ակնայից նախադեպ է և փաստում է, թե, իբր այդ ճանապարհը գործարկվել է, Կարապետյանի դիտարկմամբ, հենց Բերձորի միջանցքը փակ պահելու և Արցախի ադրբեջանացման նպատակ է հետապնդում։

Աղբյուր` Փաստինֆո