Փաստ ինֆո

Խնդրում եմ տեղեկացնել, թե երբ Ալմա- Աթայի հռչակագիրը դարձավ Արցախյան հակամարտության կարգավորման հիմք և ով է դրա նախաձեռնողը։ ԱԺ-ում կառավարության հետ հարցուպատասխանի ժամանակ այս հարցը Նիկոլ Փաշինյանին ուղղեց ընդդիմադիր «Հայաստան» խմբակցության պատգամավոր Արթուր Խաչատրյանը՝ հավելելով, որ Փաշինյանի, պնդումը, թե Ալմա- Աթայի հռչակագիրը Հայաստանի կողմից վավերացվել է 1992 թվականի փետրվարին՝ իրականության հետ որևէ կապ չունի։

«Ոչ միայն ՀՀ-ն, այլև որևէ երկիր չի վավերացրել այդ հռչակագիրը՝ ո՛չ վերապահումներով, ո՛չ էլ առանց։ Ըստ այդմ, այն չի հանդիսանում Հայաստանի օրենսդրության անբաժանելի մաս»,- արձանագրեց նա՝ հավելելով, որ 1992 թվականին Հայաստանը վավերացրել է Ալմա- Աթայում ստորագրված մեկ այլ փաստաթուղթ՝ ՀՀ-ի կողմից Մինսկի համաձայնագրին միանալու մասին։ Միևնույն ժամանակ, պատգամավորը հայտարարեց, որ Ադրբեջանն այդ փաստաթուղթը չի վավերացրել, և միայն 1 տարի անց՝ 1993 թվականին, միացել է ԱՊՀ-ին

«Օրենսդրության մաս է հանդիսանում նաև 1992 թվականի հուլիսի 8-ին ընդունված ԼՂՀ-ում ստեղծված իրավիճակի մասին որոշումը, որտեղ հստակ գրված է, որ ՀՀ համար անընդունելի համարել միջազգային կամ ներպետական ցանկացած փաստաթուղթ, որտեղ ԼՂՀ-ն նշված կլինի Ադրբեջանի կազմում»,- մեջբերեց ընդդիմադիր պատգամավորը։

Արձագանքելով հարցին՝ Փաշինյանը նկատեց, որ «գուցե դե յուրե, տառի ձևակերպման իմաստով այնքան էլ ճշգրիտ չի եղել», սակայն, բառի բուն և ոգու իմաստով ճշգրիտ է եղել։

«Ալմա- Աթայի արձանագրությունը Ձեր նշած պայմանագրին Սովետական միության կազմալուծման և անկախ պետություններ դառնալու հայտարարությանը միանալու մասին է, և այդ հայտարարության համատեքստում է ընդունվել Ալմա- Աթայի հռչակագիրը»,- ասաց Փաշինյանը՝ հավելելով, որ այդ թեման եղել է հենց սկզբից։

Փաշինյանն անդրադարձավ նաև հռչակագրով Հայաստանի վերապահումներին՝ ինքնավար մարմիններն անկախ պետության մաս դիտարկելու մասով։ Մեջբերեց ՀՀ Առաջին նախագահ Լևոն Տեր- Պետրոսյանի հարցազրույցում արտահայտած տեսակետը, որ «Ռուսական մոդելի ինքնավարությունն այն է, ինչ մենք ուզում ենք ԼՂ համար, և մեզ ավելին պետք չէ»։
Խաչատրյանն արձագանքեց՝ խոսքն այս դեպքում վերաբերում է սովետական միության համաձայն հանրաքվե իրականացրած ու ԱՊՀ-ին միանալու համար դիմած ինքնավար կազմավորումներին։

«Լևոն Տեր- Պետրոսյանի հայտարարությունն էլի օրենսդրության մաս չէ։ Ի տարբերություն Ձեզ, գոնե ինձ համար նրա խոսքը սրբություն չէ, և որևէ արժեք չունի։ Հիմք ունեն ընդունված որոշումները, հիմք ունի փաստաթուղթը, որը ներկայացվել է, և որտեղ կարևորվում է ինքնորոշման իրավունքը»,- ասաց նա։

Աղբյուր` Փաստինֆո