Փաստ ինֆո

Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը 100 մլն դրամի չափով գրավի դիմաց ազատ է արձակվել։

Ինչպես արդեն տեղեկացրել ենք՝ Սերգեյ Սմբատյանի նկատմամբ ընտրված խափանման միջոց կալանավորումը Վերաքննիչ դատարանի որոշմամբ փոխարինվել էր տնային կալանքով, ինչն, ի դեպ, պաշտպանության կողմի համար անընդունելի էր։ Պաշտպանները հայտնել էին վճռաբեկ բողոք ներկայացնելու մտադրության մասին՝ նշելով, որ առհասարակ բացակայում է Սմբատյանի նկատմամբ որևէ խափանման միջոցի կիրառումը։ Վերաքննիչ դատարանի որոշումից հետո՝ օգոստոսի 25-ին ՀՀ ԱՆ-ն հայտնեց, որ ԱՆ Պրոբացիայի ծառայության ծառայողները մեկնել են Սմբատյանի բնակարան՝ տնային կալանքի ապահովման համար։

Այսօր արդեն հայտնի դարձավ, որ սեպտեմբերի 14-ին կսկսվի Հայաստանի պետական սիմֆոնիկ նվագախմբի նոր համերգաշարը, որը կղեկավարի գեղավերստական ղեկավար և գլխավոր դիրիժոր Սերգեյ Սմբատյանը։

ՀՀ արդարադատության նախարարությունից «Փաստինֆո»-ի հետ զրույցում հայտնեցին, որ Սերգեյ Սմբատյանի նկատմամբ որպես խափանման միջոց կիրառված տնային կալանքը փոխվել է գրավով։

Վարույթն իրականացնող մարմնի կողմից խափանման միջոցի փոփոխման վերաբերյալ որոշումը կայացվել է սեպտեմբերի 8-ին։ ՀՀ գլխավոր դատախազությունից «Փաստինֆո»-ին փոխանցեցին, որ խափանման միջոցը փոխվել է դատախազի որոշմամբ։

«Նախաքննության ընթացքում ձեռք բերված տվյալների հիման վրա՝ հսկող դատախազի կողմից որոշում է կայացվել դատարանի կողմից ընտրված խափանման միջոցը փոխելու և Սերգեյ Սմբատյանի նկատմամբ գրավ կիրառելու մասին՝ 100 մլն դրամի չափով»,- հայտնեցին դատախազությունից՝ նշելով, որ հսկող դատախազի մեկ այլ որոշմամբ՝ 100 մլն դրամի չափով գրավ է կիրառվել նաեւ Արմեն Սմբատյանի նկատմամբ, ինչպես նաև համակցված այլընտրանքային մեկ այլ խափանման միջոց՝ բացակայելու արգելքը։

Հիշեցնենք, որ Իսրայելում ՀՀ նախկին դեսպան Արմեն Սմբատյանը ու նրա որդին`Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը ձերբակալվել, ապա՝ կալանավորվել են 10 տարվա վաղեմության ենթադրյալ խարդախության վերաբերյալ գործով, որը քննվում է շուրջ երեք տարի։ Իրավապահները նրանց մեղադրում են առանձնապես խոշոր չափերով խարդախությամբ առանձնապես խոշոր չափերի` շուրջ 966 մլն դրամի հափշտակության մեջ:

Մասնավորապես` պաշտոնապես ՀՀ Գլխավոր դատախազության տարածած հաղորդագրության համաձայն, քրեական վարույթով պարզվել է, որ արտակարգ և լիազոր դեսպան Ա.Ս.-ն, վերջինիս որդի, դիրիժոր Ս.Ս.-ն և գործարար Ա.Պ.-ն 2012 թվականին Հայաստանի Հանրապետության կառավարությանը ներկայացրել են 800 մլն դրամ արժողության «Գրքի աշխարհ» բազմաֆունկցիոնալ համալիր կառուցելու կեղծ ներդրումային ծրագիր և խարդախությամբ հափշտակել «Երևանի Պ.Չայկովսկու անվան միջնակարգ երաժշտական դպրոց» ՊՈԱԿ-ին անհատույց օգտագործման իրավունքով տրամադրված, Երևանի Կողբացի 36 հասցեում գտնվող հողամասից առանձնացված 300 քմ մակերեսով, 166 մլն 103 հազար դրամ արժողությամբ հողամասը:

Հեղինակ՝ Իզաբել Սահակյան

Աղբյուր` Փաստինֆո