Փաստ ինֆո

Հայաստանի գործող իշխանությունը, այսպես կոչված, «խաղաղության գործընթացի» շղարշի ներքո իրականացնում է հայկական երկու պետությունների գոյությանն սպառնացող երկու քաղաքականություն։ ԱԺ ամբիոնից հայտարարել է «Հայաստան» խմբակցության ղեկավար Սեյրան Օհանյանը։

«Արցախը հայտարարելով Ադրբեջանի մաս՝ ՀՀ իշխանությունը հրաժարվում է Արցախի ժողովրդի ինքնորոշման իրավունքի և անվտանգության պաշտպանի հանձնառությունից՝ դրանք ուղեկցելով ՀՀ արտաքին քաղաքական վեկտորը փոխելու կործանարար փորձերով»,- մասնավորեցրեց ընդդիմադիր պատգամավորը։

Օհանյանի գնահատմամբ՝ ՀՀ ներկա իշխանություններն անպատասխանատու վերաբերմունք են ցուցաբերում նաև հայ- ռուսական հարաբերություններում առկա պատմական պոտենցիալի նկատմամբ։ Նրա արձանագրմամբ՝ արցախահայության, թեկուզև նվազագույն անվտանգությունն այսօր ապահովում են ռուս խաղաղապահները, հետեւապես հակառուսական մանիպուլյացիաները չեն նպաստելու ՀՀ և Արցախի Հանրապետության առջև ծառացած անվտանգային խնդիրների լուծմանը։

«Հայ ժողովուրդը ծանր, ճակատագրական հարվածներ է ստացել, և Հայաստանը վերածվել է գլոբալ- աշխարհաքաղաքական ուժերի միջև բախման թատերաբեմի։ Հայաստանում այդ ուժերի բախման նախադրյալների ստեղծումը կամ նրանց միջև հակասությունների խորացումը կործանարար է երկրի համար։ Հաշվի առնելով տարածաշրջանի ժողովուրդների էթնոկրոնական կազմը, ռեսուրսները, տարանցիկ հաղորդակցային պոտենցիալը, ինչպես նաև փոխադարձ ուժերի զսպման և միջոցների բաշխումը, Հարավային Կովկասի անվտանգության ճարտարապետությունը պետք է նվազագույնի հասցնի ռազմական գործողությունների ռիսկը»,- ասաց նա՝ հավելելով, որ առնվազն քաղաքական կարճատեսություն և արկածախնդրություն է կարծել, թե նման անվտանգային ճարտարապետություն կարելի է կերտել՝ առանց Ռուսաստանի մասնակցության։

Այս համատեքստում, Օհանյանն անհասկանալի ու անընդունելի համարեց նաև տարածաշրջանում Ռուսաստանի այսօրվա չեզոք կառուցողական, միջնորդական քաղաքականությունը։

«Հայաստանի իշխանությունները պարտավոր են վերադառնալ Արցախի ժողովրդի ինքնորոշման իրավունքի պաշտպանության հանձնառությանը, դադարեցնել Հայաստանում հակառուսական տրամադրությունների տարածումն ու խրախուսումը, պատրաստ լինել ինքնուրույն լուծել երկրի առջև ծառացած խնդիրները՝ մեղքն ուրիշի վրա գցելու փոխարեն։ Հայ ժողովուրդն ի վիճակի է անել դա»,- ասաց նա՝ կոչ անելով Ռուսաստանի իշխանություններին՝ հավատարիմ լինել տարածաշրջանում պատմականորեն ստանձնած անվտանգության հանձնառությանը, գործուն ու արդյունավետ քայլեր ձեռնարկել՝ ապահովելու Քաշաթաղի միջանցքում մարդկանց և բեռների անխոչընդոտ, երկկողմանի տեղաշարժը։

Աղբյուր` Փաստինֆո