Փաստ ինֆո

44-օրյա աղետալի պատերազմի ժամանակ կրած պարտությունից հետո, իր պատմական հայրենիքում ինքնորոշված արցախահայությունը կանգնեց ցեղասպանության, իսկ ազգը՝ պատմական հայրենիքի կորստի վտանգի առջև։ ԱԺ հայտարարությունների ժամին այսպիսի հայտարարություն արեց «Հայաստան» խմբակցության պատգամավոր Արթուր Խաչատրյանը՝ նկատելով, որ Հայաստանի բազմադարյա պատմության ընթացքում միայն հայ բոլշևիկներն ու ՔՊ-ականներն են կասկածի տակ դնում Արցախի հայկականությունը։
«Թվում է, թե ՀՀ-ն պետք է ամեն քայլ ձեռնարկեր՝ ավելի սերտացնելու հայկական երկու պետությունների միջև կապերը, օգնելու վիրավոր Արցախին՝ դարմանելու իր վերքերն ու դիմագրավելու լկտիացած Ադրբեջանի նոր սպառնալիքներին»,- ասաց պատգամավորը։

Խաչատրյանի գնահատմամբ՝ 2020 թվականի նոյեմբերի 9-ի՝ կրակի դադարեցման մասին եռակողմ հայտարարությունը հակամարտության կարգավորման ու Արցախի կարգավիճակի վերաբերյալ փաստաթուղթ չէր, և ընդամենը հայկական կողմին ծանր ու կապիտուլյացիոն պայմաններ էր պարտադրում։

«Անցյալ տարվա դեկտեմբերին, երբ քաղաքական մեծամասնության ջանքերով ԱԺ-ն հրաժարվեց վերահաստատել Հայաստանի՝ Արցախի անվտանգության երաշխավորի հանձնառությունը, Ադրբեջանը հասկացավ, որ ՀՀ իշխանությունները մենակ են թողել Արցախին, ու բորենիների ոհմակի պես հարձակվեց մեր վիրավոր հայրենակիցների վրա՝ շրջափակելով Արցախը»,- արձանագրեց ընդդիմադիր պատգամավորը՝ հավելելով, որ այդ ֆոնին Հայաստանի իշխանությունները 2023 թվականի մայիսին հայտարարեցին «Ադրբեջանի՝ 86.600 քկմ տարածքային ամբողջականությունը»։

Այս ամենի ֆոնին, Խաչատրյանը հատուկ ուշադրություն հրավիրեց երեկ, Հանրային հեռուստատեսության եթերում, Արցախի Հանրապետության նախագահի մասին խոսելիս Փաշինյանի ձևակերպմանը, երբ նա Շահրամանյանին անվանեց «Լեռնային Ղարաբաղի առաջնորդ»՝ այդպիսով թիկունքից հարված հասցնելով Արցախի հանրապետությանթ։
«Չեմ զարմանա, եթե նա տեղի տալով Ադրբեջանի պահանջին, Արցախի Հանրապետության նախագահին կոչի Ղարաբաղի հայ համայնքի ներկայացուցիչ»,- ասաց նա։

Խաչատրյանը նկատեց, որ երեկ Փաշինյանը «շատ կարևոր» հեռախոսային զրույցներ է ունեցել աշխարհի գերտերությունների ղեկավարների հետ, հատուկ քննարկումներ է ունեցել նաև Թուրքիայի նախագահի հետ, սակայն, այդպես էլ ժամանակ ու ցանկություն չի ունեցել զանգահարելու Արցախի նորընտիր նախագահի՝ հայտարարելով, թե «ի՞նչ շնորհավորելու բան կա»։ «Չէիք ցանկանում շնորհավորել, ՀՀ զորակցությունը հայտնեիք Արցախի Հանրապետության մեր քույրերին ու եղբայրներին, թե կարծում եք Ադրբեջանն իր արյան ծարավը կհագեցնի միայն Արցախով»,- ընդգծել է Արթուր Խաչատրյանը։

Մանրամասները՝ տեսանյութում։

Աղբյուր` Փաստինֆո