Փաստ ինֆո

Հայաստանի իշխանությունները, ըստ էության, ճանաչել են Ադրբեջանի իրավազորությունը՝ Ղարաբաղի նկատմամբ։

Այսօր նման հայտարարությամբ հանդես է եկել ՌԴ նախագահ Վլադիմիր Պուտինը՝ նշելով, որ Ղարաբաղի կարգավիճակը հենց Երեւանն է սահմանել։

Վլադիվոստոկում Արեւելյան տնտեսական ֆորումի լիագումար նիստում պատասխանելով վարողի՝ հայ-ռուսական հարաբերությունների վերջին շրջադարձերին վերաբերող հարցին  ՌԴ նախագահ Վլադիմիր Պուտինը անդրադարձ է կատարել բանակցային գործընթացին ու գործող իշխանությունների հայտարարությունների քաղաքական նշանակությանը։

Նա նախ նշել է, թե չկա  ինչ-որ շրջադարձ ու ավելացրել, որ  հասկանում են, թե ինչ է կատարվում։ 

Պուտինի փոխանցմամբ՝ բանակցությունների ընթացքում առաջարկել են կարգավորման իրենց տարբերակները, որոնք հայտնի են։ «Հայաստանը վերահսկում էր յոթ շրջան, որոնք իր վերահսկողության տակ էր պահում հայ-ադրբեջանական հայտնի հակամարտությունից հետո։ Առաջարկել ենք Ադրբեջանի հետ համաձայնության գալ այնպես, որ երկու շրջանները՝ Քելբաջարն ու Լաչինը, նաեւ ամբողջ Ղարաբաղը, փաստացի մնան Հայաստանի իրավասության ներքո։ Բայց Հայաստանի ղեկավարությունը սրա հետ չհամաձայնեց, թեև մենք 10 կամ 15 տարի փորձում էինք համոզել Հայաստանի ղեկավարությանը»,- ասել է Պուտինը՝ նշելով, որ ամեն ինչ հասավ այն իրավիճակին, որն այժմ ձևավորվել է։

Ըստ նրա՝ Հայաստանի ղեկավարությունն, ըստ էության, ճանաչել է  Ադրբեջանի ինքնիշխանությունը Ղարաբաղի նկատմամբ։

«Հիմա նախագահ Ալիևն ինձ ասում է՝ դուք գիտեք, որ Հայաստանը ճանաչել է, որ Ղարաբաղը մերն է, որ Ղարաբաղի կարգավիճակի հարցն այլևս չկա, այն լուծված է։ Այդ մասին հրապարակավ հայտարարել է Հայաստանի ղեկավարությունը՝ համարելով մինչև 1991 թվականը եղած ողջ տարածքը Ադրբեջանական ԽՍՀ-ի շրջանակներում և նշելով տարածքի թիվ, որը ներառում է նաեւ Ղարաբաղի տարածքը։ Սա տեղի է ունեցել, եւ դա մեր որոշումը չէր։ Սա Հայաստանի այսօրվա ղեկավարության որոշումն է։ Իսկ եթե այդպես է, մեզ ասում են՝ հիմա դուք պետք է բոլոր հարցերը մեզ հետ լուծեք երկկողմ հենքի վրա, եթե ուզում եք ինչ-որ բան անել Ղարաբաղի հարցում։ Իսկ ի՞նչ ասենք, այստեղ ասելիք չկա, եթե Հայաստանն ինքը ճանաչել է Ղարաբաղը որպես Ադրբեջանի մաս»,- հայտարարել է Պուտինը։

Նրա արձանագրմամբ՝ նման իրավիճակում հարցեր են առաջանում՝ հումանիտար բաղադրիչի և խաղաղապահների մանդատի հետ կապված  ու նշել, որ ռուս խաղաղապահների մանդատը դեռ ուժի մեջ է, եւ մարդասիրական բնույթի, էթնիկ զտումների կանխարգելման հարցերը, իհարկե, չեն վերացել։

Աղբյուր` Փաստինֆո